Wojerecy (SN). Tež w strowotnistwje digitalizacija pokročuje. Tak je we Wojerowskim klinikumje Łužiska jězorina wjele projektow planowanych a samo hižo zwoprawdźenych. Wulki dźěl spěchowanskich pjenjez dósta chorownja na zakładźe zakonja za přichod chorownjow (KHZG). K tomu słušeja na přikład elektroniska powěsćernja za infekciske chorosće přez přizjewjenski portal Roberta Kochoweho instituta, z kotrymž w klinikumje wot lońšeho septembra dźěłaja. Tohorunja móža lěkarjo zranjenja pacientow elektronisce dokumentować. Tohodla njeje hižo dokumentacija na papjery w aktach pacienta trěbna.