Někak 400 medikamentow najebać recept tuchwilu w apotece njedóstanješ
Budyšin (SN/MiP). Znajmjeńša hižo wot kónca lońšeho lěta bědźa so apoteki w Němskej z ćežemi dodawanja wažnych medikamentow. Zwjazkowy institut za lěkarstwa a medicinske twory listuje tuchwilu něhdźe 400 na recept wjazanych medikamentow jako njedodawajomnych. Tež w Sakskim krajnym sejmje su minjeny tydźeń wo napjatej situaciji němskich apotekow debatowali. Statna ministerka Petra Köpping (SPD) je w krajnym sejmje někotre hnydomne naprawy mjenowała, zo bychu apotekarjow podpěrali. „W tuchwilnej situaciji wukładujemy apotekarske prawo jara wulkomyslnje, zo bychmy tak lěpšu a spěšnišu wuměnu medikamentow mjez apotekami zmóžnili,“ wona praji. Dalša pomocna naprawa je, zo smědźa apotekarjo nětko wěste, za to so přihodźace, medikamenty sami w filiali zhotowić. Nowe tež je, zo smědźa apoteki medikamenty direktnje z druhich krajow dowožować.