Dwanaće cyłkow z dźesać krajow prezentuje swoju ludowu kulturu

Chrósćicy (SN/bn). We wobłuku nowinarskeje rozmołwy předstaji wčera přihotowanski wuběrk detaile programa 15. mjezynarodneho folklorneho festiwala Łužica – Łužyca – Lausitz w sydarni Chróšćanskeho gmejnskeho zarjada. Swjedźeń zahaji so 26. junija z ćahom wobdźělenych skupinow po Budyšinje a slědowacej galu na hłownym jewišću Němsko-Serbskeho ludoweho dźiwadła. Dźeń pozdźišo „pućuje“ festiwal do Hochozy, hdźež wuhotuja ansamble wustupy na cyłkownje štyrjoch statokach. Zajimcam z Hornjeje Łužicy poskića tak mjenowany shuttle service z Budyšina přez Radwor a Chrósćicy. Jězdźenki hodźa so inkluziwnje zastupneho lisćika z mailku na knihować. Tež na sobotne zarjadowanja w Chrósćicach móža sej hosćo z wosebitym busom dojěć, a to po čaromaj Sulšecy – Smjerdźaca – Róžant resp. Budyšin – Radwor – Njeswačidło. Samozrozumliwje posłužuja tohorunja napřećiwne směry.