Hudźba, filmy a dźěłarnički pod hołym njebjom
Miłoćicy (SN/bn). Pod hesłom „Hromadźe njejsy sam“ wuhotuje mustwo wokoło spěwytwórca Jacke Schwarz lětsa na kóncu julija druhi Witaj festiwal při Miłočanskej skale. Program bu porno lońšemu jasnje rozšěrjeny. Sep takrjec hižo etablěrowanych dźěłarničkow, w kotrychž wobłuku móža zajimcy na přikład pizzy pjec, z pěskowcom rězbarić abo debjenki z kawrijowymi šlinkami a serbskimi parličkami zhotowić, chcedźa André Měrćink, Uta Šwejdźic a Michał Měrćink z dalšim workshopom wudospołnić. Wotpowědny poskitk mjenuja „Swobodne spěwanje w raju Krabata“. Po wašnju metodow circlesong a vocal painting ma nastać „spontany spěwny scenarij ze słownych kolažow w serbskej rěči“, wotbłyšćowacy drje najznaćiši łužiski mytos z wida kantorki Maruše, lubostnicy sławneho kuzłarja. Wuchadźišćo twori powědančko Hendricha Jordana „Koklaŕski“ z lěta 1879. Wosebitosć naspomnjeneju metodow je, zo „so ani tradicionalny hudźbny material njewužiwa, ani njejsu notowe znajomosće trěbne“, kaž we wopisowanju dźěłarnički rěka.
Starodawny nałožk Janskeho jěcharja pěstowali
Kózle (PB/SN). Hižo wjele lět přeprošuje mała wjes Kózle pola Drjowka juhozapadnje Choćebuza w lěću na swjedźeń wosebiteho razu: Na swjateho Jana, za čas zawróćenja słónca, organizuja tam Janske jěchanje. Při tym njeńdźe wo wubědźowanje a titul najspěšnišo. W srjedźišću steji swjedźensce wupyšeny Janski jěchar. Zmužići jěcharjo, mužojo kaž žony, spytaja, sej něšto z jeho pychi wottorhnyć. Hač do lěta 1880 je so nałožk swjećił, to je historisce dopokazane. Pozadk je stary słowjanski pohanski přiwěrk, zo přinjesu w najkrótšej nocy lěta kwětki a rostliny, kotryž je Janski jěchar nosył, zbožo.
Cyła wjes pěstuje nałožk. Wobydlerjo wupyša wrota swojich statokow z kwětkami a serbskimi seklemi. W małej wjesnej cyrkwi swjećachu dwurěčnu Božu słužbu. Žony přihotuja pyšnu krónu Janskeho jěcharja. Lětsa je Tobias Richter na swojim konju Lenox mjeztym šěsty raz tutón čestny nadawk přewzał. Hladajo na wulku horcotu pak wón konja njetrjebawšo njedračowaše a jěchanje po dźesać kołach po sportnišću skónči.
Serbski swjedźeń hosći zahorił
Choćebuz (NC/KP). Zbliska a zdaloka přichwatachu minjeny kónc tydźenja wopytowarjo do města, zo bychu Choćebuski měšćanski swjedźeń, kotryž je najwjetši swojeho razu w regionje, dožiwili. W ramiku tutoho zarjadowanja ma tež serbska kultura hižo wjele lět swoje krute městno. Tak wuhotowachu sobotu na jewišću sćelaka RBB w Puškinowym parku mjeztym 16. serbski swjedźeń. Po programje wodźeštej moderatorce Diana Šejcowa a Jasmin Šomber-Krausowa a stej – trochu pozdźišo hač planowane – witałoj wyšeho měšćanostu Tobiasa Schicka a wyšu měšćanostku z Gelsenkirchena Karin Welge (wobaj SPD), kotraž bě 30. jubileja měšćanskeho partnerstwa dla z wosebitym hosćom. K druhim podpěraćelam swjedźenja a čestnym hosćom, kotřiž so na jewišću zetkawachu, słušachu mjez druhim Ana Kosacojc-Kozelowa, zamołwita za serbske naležnosće a organizatorka swjedźenja; Choćebuska měšćanostka Doreen Mohaupt a Delia Münchowa, čłonka Serbskeje rady w Braniborskej.
Režijowy plan festiwala přešli
Łužica (SN/BŠe). Přihotowanski wuběrk mjezynarodneho folklorneho festiwala je so wčera posledni raz do zahajenja zarjadowanjow schadźował. Kaž nawodnica gremija Katharina Jurkowa zdźěli su čłonojo posledni raz režijowy plan přešli, w kotrymž su nadawki rozdźělene. „Wšitko po planje běži“, wona zwurazni. Wšě skupiny, kiž su sobuskutkowanje připrajili, přijědu. Jutře započnu dźěłaćerjo na statokach w Chrósćicach jewišća twarić.
Hižo štwórtk dopołdnja budźe w Budyšinje předstajenje za šulerjow. W hodźinskim programje móža dźěći a młodostni wurězki z programa dožiwić. Skupiny z Rumunskeje, Senegala a Kolumbiskeje kaž tež Łužičanka tam wustupja. Rozhłosownik Beno Šołta zarjadowanje moderěruje. Nawječor přewjedu na zwučene wašnje swjedźenski ćah po sprjewinym měsće. 19.30 hodź. smědźa so wopytowarjo na pisany galaprogram w NSLDź wjeselić.
Předpředań zastupnych lisćikow za swjedźenski kónc tydźenja je zakónčeny. Dokładne ličby předatych kartkow drje hišće njepředleža, z wothłosom pak su organizatorojo spokojom.
Hudźbny dorost přeswědčił
Wo přećelstwje
W Ludowym nakładnistwje Domowina je pjata knižka Svena Nordqvista wušła, kiž wotkryje, kak je kocork Findus k starcej Petterssonej přišoł. Tón bydleše mjenujcy sam w swojej chěžce a měješe jenož swoje kokoše, chodźeše do bliskeho hata wudźić a filowaše na swojich njewšědnych wunamakankach. Rjaneho dnja dari jemu susodka karton z napisom „Findus. Zeleny hroch“. Ale što bě w nim? Nic hroch, ale kocork – tak małki, zo měješe w Petterssonowej dłóni městno. To bě spočatk přećelstwa.
Knižna premjera budźe 3. julija w 17. hodź. na Glawšec dworje w Róžeńće.
Ekskluziwne knihi sej zawěsćić
Wjelorake fasety wuměłstwa wotbłyšćowała
Tworjace wuměłstwo, literatura, hudźba wot punk rocka přez boogie-woogie hač k šlagrej: Dołha nóc kultury w Budyšinje
Dołha nóc kultury, kotruž je Pro Museo, spěchowanske towarstwo Muzeja Budyšin, minjenu sobotu zhromadnje z wobdźělenymi kulturnišćemi a wobchodami w sprjewinym měsće wuhotowało, je so wospjet jako atraktiwny magnet wopokazała. Najwjace wopytowarjow přiwabi – zawěsće nic naposledk woblubowaneje atmosfery na „najrjeńšim balkonje Budyšina“ dla – koncert orchestra Serbskeho ludoweho ansambla „Salonowa hudźba“ w bywšej byrgarskej zahrodźe města pod Röhrscheidtowej baštu. W małej wobsadce zamóchu hudźbnicy hosći z instrumentalnymi šlagrami předewšěm 1920tych lět zahorić, kajkež su na přikład přez skupinu Comedian Harmonists do dźensnišeho popularne. Ale tež z adapcijemi z tak mjenowaneje klasiskeje hudźby zasłužichu sej ansamblowcy sylny přiklesk. Přestawku wužichu někotři wopytowarjo, zo bychu sej po starym měsće dundajo dalše kulturne chłóšćenki wotkryli.
Powitaja lěćo ze swjedźenjom hudźby
Kamjenc/Budyšin (SN/bn). Fête de la Musique rěka hudźbny swjedźeń, kotrež swjećachu prěni raz w lěće 1982. Zaměr bě a je, regionalnych wuměłcow motiwować, na najdlěšim dnju lěta zdarma w zjawnym rumje wustupować, město z wotměnjawymi zynkami pjelnić a tak lěćo witać. Dalša maksima: Wšitke zarjadowanja su bjezpłatnje přistupne. Po premjerje w Parisu swjeća swjedźeń mjeztym po cyłym swěće, a to we wjace hač 1 300 městach, šěsć z nich we Łužicy.
Rumunske zynki pod hołym njebjom
Hudźbny swjedźeń Smochćicy słuša k prawidłownym wjerškam, kotrež tamniše kubłanišćo swj. Bena a Serbski ludowy ansambl wot lěta 2005 wuhotujetej. Pod hesłom „Rumunskej nocy“ steji tónraz hudźba w fokusu, kotraž je na zapadźe Europy lědma znata.
Smochćicy (SN/bn). „Dołho trajace rešerše“ kaž tež „wšo druhe hač lochke jednanja“ w zwisku z awtorskimi prawami wuzběhnywši poda intendant SLA Tomas Kreibich-Nawka wčera we wobłuku nowinarskeje rozmołwy dohlad do lětušeho programa. Nimo přewažnje sinfoniskich twórbow na přikład Georgea Enscuwa, Cipriana Porumbescuwa a Marţiana Negreje zaklinča kompozicije Béle Bartóka a Liany Bertók. Štyri rumunske ludowe spěwy je SLA ekstra za orchester a dudy aranžować dał, kotrež chcedźa na swjedźenju prapremjernje předstajić.
