Budyšin (SN/bn). Dźensa před 125 lětami je so Měrćin Nowak-Njechorński narodźił. Składnostnje jubileja stej towarstwo Přećeljo Smolerjec kniharnje a předawanišćo same wčera wopominanske zarjadowanje wuhotowałoj. Marka Maćijowa zahaji ­wječor ze swójskimi dopomnjenkami, wu­zběhujo hłuboke zaćišće, kajkež stej na přikład „Serbski kwartet“ a kniha „Mišter Krabat“ za čas dźěćatstwa w njej zawostajiłoj. Pozdźišo wotkry sej Nowaka přede­wšěm jako wusahowaceho publicista, kotryž zamó napisać reportaže a fejetony, kajkež so dźensa lědma hišće w nowinach jewja: „Jeho přewšo charakteristisku rěč wuznamjenja hoberski słowoskład a patetiskosć, kotruž w přichodnym wokomiku ze šwarnym čwakom sebjeironije złahodnja.“ Trudla Malinkowa podšmórny, zo je „narodna, nabožna a socialna izolacija młodźenca-samotarja kluč k zrozumjenju“ tworjenja Nowaka, kiž je sej na tym zakładźe stajił „žiwjenski cil, stać so z wuměłcom serbskeho ludu“.