Tworjace wuměłstwo, literatura, hudźba wot punk rocka přez boogie-woogie hač k šlagrej: Dołha nóc kultury w Budyšinje

Dołha nóc kultury, kotruž je Pro Museo, spěchowanske towarstwo Muzeja Budyšin, minjenu sobotu zhromadnje z wobdźělenymi kulturnišćemi a wobchodami w sprjewinym měsće wuhotowało, je so wospjet jako atraktiwny magnet wopokazała. Najwjace wopytowarjow přiwabi – zawěsće nic naposledk woblubowaneje atmosfery na „najrjeńšim balkonje Budyšina“ dla – koncert orchestra Serbskeho ludoweho ansambla „Salonowa hudźba“ w bywšej byrgarskej zahrodźe města pod Röhrscheidtowej baštu. W małej wobsadce zamóchu hudźbnicy hosći z instrumentalnymi šlagrami předewšěm 1920tych lět zahorić, kajkež su na přikład přez skupinu Comedian Harmonists do dźensnišeho popularne. Ale tež z adapcijemi z tak mjenowaneje klasiskeje hudźby zasłužichu sej ansamblowcy sylny přiklesk. Přestawku wužichu někotři wopytowarjo, zo bychu sej po starym měsće dundajo dalše kulturne chłóšćenki wotkryli.