Budyšin (SN/bn). Hudźbny swjedźeń Fête­ de la Musique, z kotrymž wita mjeztym wjace hač 1 300 městow na lětnym zawróće słónca (Sommersonnenwende) lěćo, je předwčerawšim statysacy ludźi po cyłym swěće zahorił. W Budyšinje bě wothłós na fetu, kotruž tam třeći raz z dohromady 19 zarjadowanjemi wotměchu, w přirunowanju z metropolemi globusa skerje snadny. Přiwšěm žnějachu na přikład Popowy chór Kamjentneho domu kaž tež skupina The Rock Complex na wulkim jewišću na Hłownym torhošću sylny přiklesk publikuma, mjeztym zo mějachu so gitarist-spěwar Lex Hendrikson na samsnym městnje abo band Greyhound na Bohatej z tak mjenowanym zdwórliwostnym aplawsom spokojić. Połnje wobsadźena pak bě bywša byrgarska zahroda Budyšina. Tamniši dwójny koncert, wuhotowany zdobom jako třeći lětušeho rjadu Kulturna zahroda Serbskeho ludoweho ansambla, bě po słowach intendanta SLA Tomasa Kreibicha-Nawki wědomje cyle na serbski dorost wusměrjeny.