32 pasionskich zjednoćenstwow na kongresu Europasion so wobdźěliło

Chrósćicy (SN/MG). Zo je pasion wjace hač jenož dźiwadło, to su minjene dny wjacori ludźo rjekli. Tež hosćo kongresa Europasion, na kotryž bě nimale 150 wobdźělenych z cyłeje Europy přichwatało. Z Němskeje, Madźarskeje, Pólskeje, Rumunskeje, Awstriskeje, Španiskeje, Čěskeje, Italskeje, Belgiskeje, Słowjenskeje, Nižozemskeje a Francoskeje běchu delegacije z hosćom we Łužicy. Najwjace hosći pak bě z Němskeje: Wot 32 skupinow bě jědnaće wottud.

Štwórtk běchu swoje wuradźowanja w Chróšćanskej wjacezaměrowej hali Jednota zahajili, kotraž bě jim hač do soboty z domicilom wuradźowanjow. Wjesnjanosta Marko Kliman (CDU) jich witaše prajo, zo stej „w Chrósćicach Europa a swět stajnje witanej“. Nimo toho porěčeštaj předsyda Chróšćanskeho pasionskeho zjednoćenstwa Roman Mark a předsyda Towarstwa Cyrila a Metoda Cyril Hančik. Prezident towarstwa Europasion, Thomas Hummel, přeješe wobdźělnikam płódne rozmołwy a wuzna: „Mamy dom w Europje: Europasion.“