27. koparski dwubój mjez wučerjemi a maturantami Serbskeho gymnazija Budyšin (SGB) bě so z dobyćom 7:2 młódšeje generacije skónčił. Statistika dotalnych hrow z wida šulerjow wučinja nětko 20 dobyćow, tři njerozsudne wuslědki a štyri poražki.

Po wolejbulowej hrě mjez wučerjemi a dwa­natkarjemi na SGB (SN wo tym rozprawjachu) slědowaše dwaj dnjej po tym tradicionalna kopańca. Bě to mjeztym 27. rozestajenje, kotrehož spočatki sa­haja do lěta 1994. Šulerjo běchu dotal dźewjatnaće króć dobyli, nětko je dalši triumf k tomu přišoł.

Koparski duel wotmě so w sportowej hali Budyskeho Serbskeho šulskeho a zetkawanskeho centruma, dokelž bě tartanowa podłoha wonka po dešćiku ekstremnje hładka a strach zranjenja jara wulki. Dwanatkarjo nastupichu z dźesać hrajerjemi, wjetšina z nich su aktiwni kopa­rjo. Wučerjo njemějachu tónraz ža­no­ho aktera za wuměnu. Znowa wupomha Damian Bogusz, nětko sportowy wučer w Naunhofje pola Lipska.