Budyšin. Maćična akademija přeprošuje srjedu, 23. septembra, w 19 hodź. na dalše zarjadowanje do Budyskeho Serbskeho domu. W srjedźišću steji Handrij Zejler jako twórc melodijow. Wo nim pisaše Bjarnat Krawc 1933 w Serbskich Nowinach: „Handrij Zejler ... zasłuži sej być mjenowany jako prěni hornjołužiski kompozitor“. Arnošt Muka je 19 jeho melodijow naličił, Krawc samo 24. Je jich hišće wjace? Z tymle prašenjom zaběrataj so Měrko Šołta a dr. Franc Šěn.
Radźićeljo wuradźuja
Róžant. Twarski staw nowotwara horta w Ralbicach budźe jedna z temow přichodneho posedźenja gmejnskeje rady Ralbic-Róžanta štwórtk, 24. septembra, we 18.30 hodź. w Róžeńčanskej gmejnskej sydarni. Dale wuradźuja wo wotličenju nowotwara pěstowarnje w Ralbicach a wo přepodaću nadawka za ponowjenje nadróžneho wobswětlenja w Smjerdźacej.
Chrósćicy. Tohorunja přichodny štwórtk, ale w 19 hodź. zetka so Chróšćanska gmejnska rada w sydarni „Łužica“. Mjez druhim předstaja radźićelam projekt Serbskeho kulturneho turizma „Serbske impresije“. Dalša tema budźe nadróžne wobswětlenje w Nuknicy.



