Bagdad (dpa/SN/K) Po tym zo běchu bojownicy teroristiskeje milicy Islamskeho stata (IS) njedźelu město Ramadi na zapadźe Iraka zdobyli, je po wudawanju UNO něhdźe 25 000 ludźi na ćěkańcy. Najwjetši dźěl z nich je po puću do stolicy Bagdada. Irakske instancy běchu do toho wo 7 000 ludźoch rěčeli, kiž su před namocu w regionje swoju domiznu wopušćili. Organizacije UNO kaž na přikład Program za zežiwjenje swěta (WFP) a dalše prócuja so wo to, zastarać ćěkancow ze wšěm najnuznišim, kaž z cyrobiznami, pitnej wodu a medikamentami.
Vatikan (B/SN). Vatikan chce swoju rólu jako posrědkowar w mjezynarodnych konfliktach wutwarić. Vatikanski wonkowny minister arcybiskop Paul Gallagher rjekny, zo rozmysluja wo zarjadowanju wotrjada za mjezynarodnu mediaciju. Katolska cyrkej ze swojej syću diplomatiskich kontaktow njese tu wulku zamołwitosć, rjekny Gallagher.
Politikarjo za socialnu pomoc
Z awtom swojeho wuja je třilětny hólc na awtodróhowym wotpočowanišću w bayerskim Türkheimje njezbožo zawinował. Po informacijach policije sydny so hólc w njewobkedźbowanym wokomiku za wodźidło awta. Při tym prawdźepodobnje borzdźidło pušći. Awto jědźeše po skłoninje a wobškodźi dalšej awće a płót. Škodu trochuja na 3 100 eurow. Wuj dósta chłostanku, dokelž njebě kedźbował.
Najstarši wobydler Němskeje je w starobje 111 lět zemrěł. Charlotte Klamroth wudycha minjenu sobotu w Ludwigshafenje, hdźež wona wot lěta 1955 bydleše. Tole zdźěli jeje syn powěsćerni dpa. Wona steješe na wodźacym městnje lisćiny slědźerskeje skupiny Gerontology Resaerch Group, po tym zo bě 112lětna Johanna Klink z Oschatza w februaru zemrěła. Klamroth narodźi so lěta 1903 w saksko-anhaltskim Krottendorfje.