Budissa Budyšin młodźina A
– Sokoł Ralbicy/Hórki 2:1 (1:0)
Za hosći zasadźeni: Bjeńš – Šewc, Kobalc, M. Matka, K. Matka, Wałda, Budar, Rawš, Gloxyn, Šiman, G. Kurjat, M. Kurjat, Domaška, Nuk, Materna
Po jasnym dobyću 5:1 w prěnim tesće minjenu njedźelu w Kamjencu přećiwo SJ Njebjelčicam dojědźechu sej koparjo Sokoła Ralbicy/Hórki njedźelu do Humboldtoweho haja w Budyšinje. Na kumštnym trawniku přewjedźechu z juniorami młodźiny A Budissy Budyšin dalši test. Hižo w lěću běštej wobě mustwje w Delanach mocy měriłoj, tehdy so Sokoljo ze 4:0 přesadźichu.
Biskopičanske KT 08 II
– SJ Njebjelčicy 4:2 (2:1)
Za hosći zasadźeni: Matješk – Kral, Šołta, Haška, Hanuza, Korjeńk, Gödig, Pawlik, Malaškin, Mikławšk, O. Domš, F. Domš, Wagner, Lejnart, Hrjehor, Ričel
Na kumštnym trawniku w Biskopicach je so Njebjelčanske koparske mustwo lěpje prezentowało hač w Kamjencu. Hnydom w 2. min. přesadźi so Handrij Korjeńk w šěsnatce domjacych a třěli 1:0. Hosćićel pak wukonješe ze spěšnymi a krótkimi přihrawkami ćišć na Njebjelčanow a tak po derje wuhratym nadběhu přez prawu stronu w 11. min. wuruna. Krótko po tym wudoby sej róžk z lěweje strony. Józef Matješk w Njebjelčanskich wrotach sčasom njezapřimny, a domjacy nadběhowar zhłójčkowa bul k 2:1 do syće. Znowa bu Korjeńk w centralnym nadběhu derje nahraty, połoži pak sej kulowatu kožu předaloko, a šansa bě fuk.
Wobwodna wolejbulowa liga wuchodneje Sakskeje
1. Módro-běli Wojerecy II 10 29 : 7 27
2. ST Kupoj-Nowa Łuka 10 27 : 8 25
3. Viktoria Worklecy 9 26 : 8 23
4. CVJM Zhorjelc 9 15 : 17 13
5. TSV Kundraćicy 10 14 : 18 13
6. TSV Niederoderwitz 9 13 : 22 9
7. ST 1896 Wulka Dubrawa 9 12 : 21 9
8. MSV Budyšin 04 II 9 10 : 22 6
9. OSC Lubij 9 4 : 27 1
Nimale kóždy sportowc abo sportowy cyłk bě sej w silwesterskej nocy něšto předewzał, tak tež wolejbulisća Viktorije Worklecy. Jich předewzaće rěkaše: dale z połnej paru na wulkim cilu „mišterstwo“ dźěłać. Přećiwo Kundraćicam chcychu tuž na kóždy pad dobyć. Duele w Habrachćicach běchu minjene lěta přeco jara snadnje wušli, tak tež tónraz zaso. Bohužel pobrachowaštaj Viktoriji stajnaj hrajerjej, čehoždla běše nadawk wosebje ćežki. To pokaza hižo prěnja sadźba. Hosćićeljo hrajachu koncentrowanje, a w pólnym škiće jara stabilnje stejachu. K tomu přińdźe stara słabosć Worklečanow, a to špatna kwota nadaćow. Tak dobychu domjacy sadźbu z 25:19.
Regionalny koparski ligist FC Energija Choćebuz dyrbi wotchad wažneho hrajerja předźěłać. Wot 1. FC Union Berlina wupožčeny wrotar Lennart Moser je hišće do zazběha nalětnjeho koła sportowe towarstwo wopušćił, zo by přichodnje za belgiskeho prěnjeho ligista Cercle Brügge mjez žerdźomaj stał. Jenički tróšt za Choćebužanow su pjenjezy, kotrež z transfera mjez zwjazkowym koparskim ligistom a šěsnatym tabulki Jupiler Pro League dóstanu. „Nam bě stajnje wědome, zo njedamy Lennarta na zakładźe zrěčenja bjez porjadneho zarunanja ćahnyć. Runočasnje přejemy jemu wšo dobre a dźakujemy so za wukony we wrotach FC Energije Choćebuz“, sportowy nawoda Sebastian König wuzběhny. Tak budźe nětko Toni Stahl stajny wrotar prěnjeho mustwa muži. Swobodnu poziciju na polu wrotarjow pak chce FC Energija sčasom zaso wupjelnić, prócujo so wo aktualneho wrotarja Wacker Nordhausena Jana Glinkera.
Wo pro a kontra techniskich pomocnych srědkow w sporće knježi hižo wjele lět diskusija. Su tajke na kóždy pad trěbne, zo bychu so wo wjac sprawnosće postarali? Abo myla wone wotběh hrow? Wokoło tajkich a hinašich prašenjow wuwiwa so debata, wšojedne, hač w kopańcy, wolejbulu abo na polu american footballa. Argumentacija wobeju stronow je zrozumliwa. Na jednym boku maš wěstosć, zo maš prawje ze swojej skóržbu, na tamnej stronje rěka, zo widejowe dopokazy hru zas a zaso přetorhnu, a tak so powabk hry zhubi.
Worklečanki z domjacej lěpšinu
Dorostowe žonjace wolejbulowe mustwo Viktorije Worklecy změje jutře swój prěni domjacy hrajny dźeń w nowym lěće, a to w 14 hodź. přećiwo třećemu mustwu MSV Budyšin 04. W 16 hodź. nastupi wone přećiwo rezerwje Módro-běłych Wojerecy. Dalše wolejbulowe hry:
01.02. 14:00 ST Wulka Dubrawa –
Viktoria Worklecy
01.02. 14:00 Ochranow. wolejfantki – HZ Pančicy-Worklecy (ž)
01.02. 14:00 MSV Budyšin 04 III –
HZ Pančicy-Workl. II (ž)
Dźensa na blidotenis
Prěnje blidotenisowe mustwo DJK Konjecy prezentuje so dźensa wot 19 hodź. prěni raz w nowych trikotach. To wočakuje třeći 1. wokrjesneje ligi cyłk z Łužnicy, kotryž steji na 7. městnje tabulki.
Mišterstwa w pjasćobulu
ST Kubšicy wuhotuje druhi kónc tydźenja w februaru južnoněmske mišterstwa w pjasćobulu w starobnej skupinje U 14. Na nich wobdźěla so tež šulerjo z Budyšina a Slepoho. Hry budu 8./9. februara w Budyskej Daimlerowej sportowej hali. Sobotu započnje so předkoło hólcow U 14 w 9 hodź., oficialne wotewrjenje pak budźe hakle w 13 hodź. Po tym přewjedu předkoło holcow sk U 14. Njedźelu započnje so kónčne koło w 9.30 hodź., přizamknje so mytowanje dobyćerjow.
Tróšku prjedy hač zwučene bě Wojerowski FC swój štwórty halowy koparski cup za starych knjezow wuhotował. Tež stara garda Sokoła Ralbicy/Hórki so zaso wobdźěli. Lětsa pak běchu sej mustwo wjace přeprosyli a tak je wosom cyłkow w dwěmaj staflomaj wo požadany pokal wojowało.
W stafli A hraješe zakitowar pokala Natwar Wojerecy a měješe na kóncu skupinskeje fazy sydom dypkow, z čimž docpě połfinale. Bój wo druhe městno běše chětro napjaty. Motor Kumwałd měješe po třoch partijach štyri dypki na konće. Natwar Němske Pazlicy (2 dypkaj), jako nowačk, hraješe w poslednjej skupinskej partiji přećiwo Lok Wojerecam. Z dobyćom by pjeć dypkow měł. Hrajerjo Lokomotiwy běchu prěnjej duelej přěhrali, ale stopnjowachu so a dobychu 3:1. Tak je Kumwałd do połfinala zaćahnył.
Wobwodna wolejbulowa klasa žonow wuchodneje Sakskeje
1. Schönbachske VV 11 28 : 13 25
2. VV Žitawa 09 II 8 24 : 5 22
3. VV Žitawa 09 III 9 21 : 14 16
4. HZ Pančicy-Worklecy II 9 16 : 14 14
5. Módro-běłe Wojerecy II 8 11 : 16 10
6. MSV Budyšin 04 III 7 10 : 12 9
7. Viktoria Worklecy 8 3 : 21 3
8. Nysa Wolejs II 8 0 : 24 0
Na šestym hrajnym dnju dojěchu sej wolejbulistki druheho zastupnistwa Hrajneho zjednoćenstwa PančicyWorklecy do Lubija, hdźež běchu pola žonow Schönbachskeho VV z hosćom. Domjace mustwo je tuchwilu prěnje wobwodneje klasy. Tak bě hižo zwoprědka jasne, zo njebudźe to žana lochka partija. Hwězdźičkam-mickam běštaj tón kónc tydźenja Jennifer Otto jako trenarka a Daniel Gall jako kotrenar poboku. Jimaj wutrobny dźak za pomoc a pozitiwny pohon.
Schönbachski VV – HZ Pančicy-Worklecy II 3:1 (25:19, 12:25, 25:13, 25:21)
14. raz přebywaše Jan Hrjehor, sportowy wučer Serbskeje wyšeje šule Budyšin, ze swojimi šulerjemi w sněhakowarskim lěhwje w kurowym městačku Janské Lázně w čěskich Kyrkonošach. Prěni raz bě so wón z dwěmaj šulerskimaj skupinomaj na Čornu horu podał. Hišće ženje pak njejsu tam tak mało přirodneho a kumštneho sněha měli.
Nimo šulerkow a šulerjow 7. a 8. lětnika z města wobdźěli so na prěnim zhromadnym sněhakowarskim lěhwje SWŠ Budyšin/SWŠ Worklecy tež 7. lětnik Serbskeje wyšeje šule „Michał Hórnik“ Worklecy. Tam bě mjenujcy sportowy wučer, kiž lěhwo hewak organizuje, wupadnył. Nimo toho zesylnichu wulku serbsku skupinu pjeć studentow wučerstwa, kotřiž hišće w Lipsku a Drježdźanach studuja, kaž tež šěsć maćerjow a nanow. Tak přebywaše 78 ludźi wopřijaca skupina wot póndźele do pjatka w pensijomaj Adélka a Flora.
Kulowčanka Magdalena Šeferec je lětuši Eggersmannowy juniorski cup dobyła. Tón wotměwaja kóždolětnje k zahajenju konjacych wikow Partner Pferd w Lipsku.
Lipsk (SN). „To je woprawdźe něšto wurjadneho“, přeradźi 19lětna studentka zawodneho hospodarstwa a čłonka Kulowskeho jěchanskeho towarstwa po wuspěchu minjeny štwórtk w měsće nad Plesnu. „Sym so jara prócowała spěšniša być hač kontrahenća, a by tež hišće trochu spěšnišo šło. Přiwšěm je dosahało.“ W kónčnym přechodźe přesadźi so wona na dźesaćlětnej koble Kandela R, kotraž je mjeztym sydom lět we wobsydstwje Šeferec swójby.
Po lońšim wobdźělenju bě so Magdalena Šeferec lětsa druhi króć za finale Eggersmannoweho juniorskeho cupa w Lipsku skwalifikowała a je wobdźělenje z triumfom skrónowała. Z časom 33,46 sekundow zmištrowa wona naročny finalny parcours, wobstejacy ze šěsć zadźěwkow – jedyn z nich bě dwójny skok – w klasy M*, bjez zmylka w Lipšćanskich wikowych halach a wostaji Lenu Dreilich z Möckerna na konju L’amie de Coeur a Lilli Plath z Wismara na Zidane D. na 2. a 3. městnje zady so.