Při skale rostliny měnjeć
Miłoćicy. Njebjelčanska gmejna, towarstwo za zachowanje mnohotnosće wužitnych rostlin a towarstwo Kamjenjak přeprošuja na dalšu rostlinsku měnjensku bursu, kotraž wotměje so zajutřišim, srjedu, wot 14 hodź. při Miłočanskej skale. Tam móža wopytowarjo swoje samoćahnjene rostlinki z druhimi měnjeć abo je prosće wotedać. W 14 hodź. přednošuje Thomas Noack wo permakulturje a powjedźe hosći po zahrodźe, kotraž je pod tymle aspektom nastała.
Kak čłowjesce wostać?
Budyšin. We wobłuku wuměłstwoweho projekta „Swětło pozbudźa“ wotměje so srjedu, 1. meje, w 19.30 hodź. w zawodźe Kupke & Partner na Budyskej Njekowej 143 přednošk pod hesłom „Socialna wučba 4.0 – kak móžemy w času digitalizowanja čłowjesce wostać“. Heinrich Wullhorst z Duisburga zaběra so z prašenjom, hdźe su centralne towaršnostnopolitiske wužadanja našeho časa za digitalnu transformaciju a kotry wuznam ma katolska socialna wučba za tele wužadanja. Slěduje diskusija.
Koncertuja w cyrkwi
Na čitarski wječor
Komorow. Domowinska skupina Komorow-Trupin-Rakecy přeprošuje na čitarski wječor ze zastupowacym šefredaktorom Serbskich Nowin Axelom Arltom. Rozmołwne koło wotměje so jutře, pjatk, w 17 hodź. w Komorowskim młodźinskim klubje. Wopytowarjo změja składnosć, wšědne wužadanja a wjesela redakcije a redaktorow zeznać a zhonić, kak serbski wječornik wšědnje nastawa. Nimo skupinarjow su tež dalši zajimcy wutrobnje witani.
Jehnjata sej wobhladać
Dołha Boršć. Přirodoškitna stacija wuchodneje Hornjeje Łužicy přeprošuje předewšěm swójby z dźěćimi na dźeń wotewrjeneje wowčernje w Dołhej Boršći (Förstgen) pola Mikowa jutře, pjatk, wot 16 do 18 hodź. Tam je so minjene tydźenje wjele jehnjatow narodźiło. Wulcy a mali wopytowarjo móža sej je zbliska wobhladać, pomajkać a dóstanu nimo toho najwšelakoriše informacije wo jich wuznamje za přirodne hladanje płoninow w biosferowym rezerwaće Hornjołužiska hola a haty.
Farma w znamjenju Europy
Nowa wustajeńca
Pančicy-Kukow. W twarjenju zarjadniskeho zwjazka Při Klóšterskej wodźe je wot jutřišeho hač do julija 2019 nowa wustajeńca widźeć. Swoje twórby pokazatej w njej lajskej wuměłči Bärbel Dschietzig z Łutow a Helga Schönach z Nadrózneje Hrabowki. Wopytowarjo wuhladaja předewšěm krajinowe wobrazy a portrety, kotrež nastachu w rozdźělnych technikach. Přehladku wotewru štwórtk, 25. apryla, w 17 hodź. Po tym budźe přehladka k wotewrjenskim časam zarjadniskeho zwjazka přistupna.
Posledni raz „Čeplski recept“
Chrósćicy. Serbska lajska dźiwadłowa skupina Chrósćicy zahraje sobotu, 27. apryla, w 19.30 hodź. na Chróšćanskej Krawčikec žurli posledni raz swoju komediju „Čeplski recept“. Štóž njeměješe dotal hišće móžnosć sej inscenaciju wobhladać, ma přichodnu sobotu poslednju składnosć to nachwatać.
Prezentuja internetny projekt
Budyšin. Załožba za serbski lud přeproša wšitkich zajimcow na zjawnu prezentaciju internetneho projekta Serbšćinu online wuknyć srjedu, 24. apryla, w 15 hodź. na žurlu Budyskeho Serbskeho domu. W lěće 2017 su projekt wuspěšnje prěni raz w zjawnosći předstajili. We wobłuku prezentacije chcedźa zhromadnje z Multimedialnym centrom za wuknjenje rěčow na Drježdźanskej Techniskej uniwersiće, kiž je online-program wuwił, nowosće a dalewuwića předstajić a zajimcam składnosć poskićić, so wo natwarje a wobsahu wobšěrnje wobhonić.
Za dźěłarničku so přizjewić
Budyšin. Spěchowanski kruh za serbsku ludowu kulturu wuhotuje sobotu, 27. apryla wot 10 do 17 hodź. w Budyskim Serbskim muzeju dźełarničku, w kotrejž zajimcam techniku škrabanja serbskich jutrownych jejkow zbliža. Wobdźělenje płaći na wosobu dźesać eurow. Zajimcy njech přizjewja so pod telefonowym čisłom 03591/550 108.
Zahraja na dudach
Dóstanu spěchowanje
Łaz (AK/SN). Farski dom Łazowskeje ewangelskeje wosady ma lětsa zbrašenym wotpowědowacy zachod dóstać. Kaž Günter Wjenk z wosadneje cyrkwinskeje rady informuje, dóstachu tele dny přizwolenje za spěchowanske srědki sakskeho socialneho ministerswa. Za 23 500 eurow ma před zachodom skłonina nastać. Nimo toho zatwarja durje, kotrež hodźa so elektrisce wočinić.
Změja serbsku zamołwitu
Rakecy. Přichodne posedźenje Rakečanskeje gmejnskeje rady je jutře, srjedu, w 17 hodź. w zetkanišću při Nowowjesnjanskej dróze. Wuradźować chcedźa tam mjez druhim wo pomjenowanju zamołwiteje za naležnosće Serbow w gmejnje. Dale póńdźe wo zhromadne dźěło mjez Rakečanskej a Njeswačanskej gmejnu.
Center přetwarja
Budyšin. Wutoru po jutrach započnu w Budyšinje Center na Žitnych wikach přetwarjeć. Tam chcedźa dohromady 1,85 milionow eurow inwestować a tak serwisowy poskitk kaž tež přebywansku kwalitu za wopytowarjow polěpšić, zdźěli wjednistwo nakupowanišća. Parkowanski wobłuk dóstanje nowe barbne wuhotowanje a polěpšene wupisanje. Změnić chcedźa wjetše a mjeńše tafle w centeru, zo bychu kupcow wo serwisowych poskitkach lěpje informowali. Dale instaluja nowe sedźenske móžnosće za wotpočnjenje a nabiwansku staciju za smartphony a tablety. Nimo toho ponowja nuzniki a natwarja hrajkanišćo. W oktobru ma přetwar hotowy być.
Dźěłarnička za seniorow
Budyšin. Wosebje na seniorow wusměrjena je nowa dźěłarnička SAEK, kotraž zaběra so z wužiwanjom smartphonow a tabletow. Rozłožić chcedźa zawodowy system Android, za čo trjebaš konto pola Google, a kak swójski nastroj škitaš. Dźěłarnička wotměje so šěsć razow w meji, pak dopołdnja pak popołdnju. Wobdźělenje płaći 20 eurow. Zajimcy njech přizjewja so pod telefonowym čisłom 03591/ 464 177.
Koncertuja do nalěća
Wulke Ždźary. Hudźba do nalěća zaklinči jutře, sobotu, wot 15 hodź. we Wulkoždźarowskej ewangelskej cyrkwi. Koncert wuhotujetej Łazowski muski chór a orchester gitarow Iuventa musica. Wšitcy zajimcy su wutrobnje witani.
Popołdnjo za swójby
Brězowka. Brězowska Domowinska skupina a tamniše domizniske towarstwo přeprošatej njedźelu na debjenje jutrownych jejkow na starej šuli. W poskitku změja „set započatkarjam“. W 14 hodź. wustupi Slepjanski dźěćacy a młodźinski ansambl, w 15 hodź. pokazaja dźěći Brězowskeje pěstowarnje swój program a w 16 hodź. zaćehnje Slepjanski kwasny ćah z Grodkowskimi hercami.
Kolekcije jejkow wotedać
Porěči wo měznikach
Jutře na knižnu premjeru
Budyšin. Štwórtk, 11. apryla, w 19.30 hodź. předstaji so w Budyskej Smolerjec kniharni literarny dorost. Awtorki a awtorojo Paternostra čo. 8 su Annamaria Hadankec, Judith Handrikec, Božena Hojerec, Kira Hrjehorjec, Cecilija Neterec, Halina Pohončec, Julia Šnajderec, Luiza Šubertec, Clemens Bobka, Fabian Brycka, Michał Donat, Damian Dyrlich a Pětr Dźisławk.
Zaběraja so z biowudźěłkami
Njebjelčicy. Marketingowe strategije, sebjepomocne koncepty a móžnosće direktneho zwičnjenja ratarskich biowudźěłkow steja w srjedźišću informaciskeho zarjadowanja jutře, štwórtk, w 19 hodź. w Njebjelčanskim gmejnskim centrumje. Mjez iniciatorami wječora staj ratarski poradźowar Jens Gülde a předewzaćelski poradźowar Hubert F. Lange. Zajimcy su wutrobnje witani.
