Póstniske piwko wotměli
Ćisk (JKa/SN). W Ćisku mějachu minjenu sobotu póstniske piwko. Wjesny předstejićel, něhdy bě to starosta, Jens Sarodnik, bě muži wsy hromadźe zwołał. Něhdźe sto z nich je na zarjadowanje přišło, zo bychu so při piwje wo aktualnych prašenjach Ćiska rozmołwjeli, ale tež zhromadnje karty placali.
VVO planuje nowe poskitki
Budyšin (SN). Mnohe naprawy zakónčaceje rozprawy brunicoweje komisije wěnuja so polěpšenju mobility we Łužicy. Wobchadny zwjazk Hornje Łobjo (VVO), kotremuž tež zapadna Łužica z městomaj Kamjencom a Wojerecami přisłuša, widźi nětko šansu, naprawy swojeho bliskowobchadneho koncepta lěpje přesadźić. Z wutwarom čarow budźe přichodnje móžno, zapadnu Łužicu z Drježdźanskej měšćanskej železnicu přiwjazać.
Nowe sportowe kursy
Dźěłarnja lampow přijědźe
Kamjenc (SN). Mnozy hižo na to čakaja, zo wona ze swojim bydlenskim mobilom a tójšto utensilijemi dźěłarnje lampow zaso do Kamjenca přijědźe: Marion Wagner-Dee. Wot 12. do 23. měrca zaćehnje wona tam do něhdyšeho ortopediskeho wobchoda na Budyskej dróze 19. Wagner-Dee hižo wot lěta 1989 tute wurjadne rjemjesło wukonja a so na swojich swěrnych kupcow wjeseli.
Z trutom škody analyzować
Budyšin (SN). Njewjedrow dla su w zašłych měsacach wjacore štomy při kolijach spadali a poćežuja železniski wobchad tež mjez Arnsdorfom a Kamjencom. Zo by škody prawje spóznał, zasadźa wobchadny zwjazk Hornje Łobjo na mjenowanej čarje wot měrca do meje trut (Drohne), z kotrymž chce škody a wegetaciju při kolijach analyzować.
Wuběrny spanski labor
Wojerecy (SN). Hižo třeći raz je spanski labor Wojerowskeje chorownje wosebity certifikat dóstał, z čimž je hač do 31. decembra 2020 jako spanskomedicinski centrum akreditowany. „Z certifikatom našim pacientam pokazujemy, zo su pola nas w dobrych rukach“, praji šeflěkar jězorinoweho klinikuma za spansku medicinu dr. Konrad Wetzer.
Wustajeńca wo lubosći
Wojerecy (SN). W štyrjoch rumnosćach Wojerowskeho hrodu je wosebita wustajeńca k sobučinjenju „lubuj lubosć“ přistupna, a to hač do 14. měrca. Přehladka je wosebity poskitk w času sakskich zymskich prózdnin. Na medijowych stacijach móža tam wopytowarjo animěrowane přinoški dožiwić.
Na wosypicy so šćěpić dać
Budyšin (SN). Schorjenja na wosypicy (Masern) so w Němskej zaso množa – a to, byrnjež tu skutkowny šćěpjenski srědk měli. Překupska chorobna kasa (KKH) žada sej tuž wyšu šćěpjensku kwotu za jara natykliwu infekcisku chorosć. Wona je hakle potom wutupjena, je-li 95 procentow wobydlerjow přećiwo njej imunych. Kaž z aktualneho wuhódnoćenja KKH wuchadźa, je ličba wosypicowych padow zaso jasnje přiběrała.
Wšo nowe čini měrc
Wojerecy. We Wojerowskej ludowej uniwersiće móža so zajimcy wot spočatka měrca na lětuši lětni dowol přihotować. „Nawukńće rozdźělne rěče za swój domjacy abo dowol na přibrjohu“, w nowinskim zdźělenju mjez druhim rěka. Tak nimale kóždy wotpowědny poskitk namaka, zo by něšto nowe nawuknył, abo jako dar přećelam.
Energijowe poradźowanje
Rekordny kónc tydźenja
Wojerecy (SN). Wojerowski hród a zwěrjenc staj minjeny kónc tydźenja wulki wopytowarski nawal dožiwiłoj. Mjeztym zo měješe zwěrjenc wjace hač 700 hosći sobotu a 1 000 ludźi njedźelu, móžachu cyłkownje 330 ludźi w měšćanskim muzeju witać. To bě z wulkim wotstawkom najwuspěšniši februarski kónc tydźenja po zawjedźenju digitalneho ličenja wopytowarjow.
Přichodni lěkarjo wužadani
Budyšin (SN). Šeflěkar a praktiske lěto wukonjacych studentow mediciny přewodźacy mentor Hornjołužiskich klinikow Budyšin dr. Matthias Linke je tuchwilu za šěsć přichodnych lěkarjow zamołwity. Wšako dyrbja studenća w běhu swojeho studija a jako dźěl lěkarskeho pruwowanja praktiske lěto w jednej uniwersitnej klinice abo w jednej wot uniwersity připóznatej klinice wukonjeć. Hornjołužiske kliniki tajkej připóznatej akademiskej kubłanskej chorowni přisłušeja.
Digitalne čitanje požadane
Počesća Michała Hórnika
Budyšin/Worklecy. Składnostnje 125. posmjertnin kanonika Michała Hórnika chcedźa horliweho serbskeho prócowarja na wšelake wašnje počesćić. Zajutřišim, pjatk, w 15 hodź. su wšitcy na Budyski Mikławšk k jeho rowej přeprošeni. Zarjadowar je Towarstwo Cyrila a Metoda. Wone přewjedźe dalšej počesćeni štwórtk, 7. měrca, we Worklečanskej kapałce zhromadnje z tamnišim kapałkowym towarstwom a ze župu „Michał Hórnik“ kaž tež pjatk, 8. měrca, z Worklečanskej šulu, kotraž je tohorunja po Michale Hórniku pomjenowana. Zajimcy su wutrobnje přeprošeni.
Bajowe figury w srjedźišću
Stróža. Na popołdnjo za dźěći a šulerjow přeprošatej towarstwo Radiška a zarjadnistwo biosferoweho rezerwata Hornjołužiska hola a haty pjatk, 22. februara, wot 15 do 17 hodź. do Stróžanskeho Domu tysac hatow. Tam chcedźa so z pisanym swětom bajowych figurow, kaž wódneho muža abo připołdnicy, zaběrać. Wšitcy su witani. Zastup je darmotny.
Zo móhli pčołki přežiwić
Dźěłarnička a přednošk
Kamjenc. 52. Kamjenske Lessingowe dny jutře, srjedu, z dwěmaj dalšimaj zarjadowanjomaj dale du. Wot 9 do 12 hodź. wotměje so w Röhrmeisterowym domje Lessingoweho muzeja prózdninska dźěłarnička za dźěći wot wosom do dwanaće lět. Wobdźělnicy zaběraja so tam ze starymi pismami. Samsny dźeń a na samsnym městnje porěči w 19 hodź. dr. Stefan Rhein z Wittenberga wo spočatkach reformacije lěta 1517. W tym zwisku předstaja zjawnosći nowy katalog Kamjenskeje radneje biblioteki.
Wołmu předźěłać
Dołha Boršć. Wowča wołma steji w srjedźišću prózdninskeho poskitka jutře, srjedu, w Dołhoboršćanskej přirodoškitnej staciji w gmejnje Mikow. Tam chcedźa zajimcam wot 9 do 13 hodź. předstajić, kak z wołmy wužitny wudźěłk nastawa. Mjez druhim zhotowja woni z pjelsćeneje wołmy mału dopomnjenku. Wšitke prózdninske dźěći su ze staršimi abo z dźědom a wowku přeprošene. Zastup je darmotny.
Dyrdomdej do srjedźowěka
Nominuja kandidatow
Pančicy-Kukow. Serbske wolerske zjednoćenstwo přeproša wšitkich zajimcow na zjawnu zhromadźiznu, na kotrejž wuzwola kandidatow na žanu politisku stronu wjazaneho wolerskeho zjednoćenstwa za nowy sejmik Budyskeho wokrjesa. Za to chcedźa kandidatow za wšitke wólbne wokrjesy nastajić. Tak su na zhromadźiznu tež dalši Serbja prošeni, kotřiž móžnu kandidaturu njewotpokazuja abo chcedźa Serbske wolerske zjednoćenstwo podpěrać. Wólbna zhromadźizna wotměje so jutře, wutoru, w 17 hodź. w rumnosći zarjadniskeho zwjazka w Pančicach-Kukowje.
Stipendije za kurs čěšćiny
Budyšin. Čěske knježerstwo přewostaja tež lětsa zajimowanym Serbam stipendije za wobdźělenje na intensiwnym rěčnym kursu čěšćiny w Praze wot 26. julija do 23. awgusta abo w Českich Budějovicach wot 18. awgusta do 9. septembra. Stipendije posrědkuje Rěčny centrum WITAJ (tel. 03591/ 550 400, e-mail: ). Zajimcy njech tam hač do 15. měrca swoje podłožki wotedadźa.
Nominuja kandidatow
Pančicy-Kukow. Serbske wolerske zjednoćenstwo přeproša wšitkich zajimcow na zjawnu zhromadźiznu, na kotrejž wuzwola kandidatow na žanu politisku stronu wjazaneho wolerskeho zjednoćenstwa za nowy sejmik Budyskeho wokrjesa. Za to chcedźa kandidatow za wšitke wólbne wokrjesy nastajić. Tak su na zhromadźiznu tež dalši Serbja prošeni, kiž móžnu kandidaturu njewotpokazuja abo kotřiž chcedźa Serbske wolerske zjednoćenstwo podpěrać. Wólbna zhromadźizna wotměje so wutoru, 19. februara, w 17 hodź. w rumnosći zarjadniskeho zwjazka Při Klóšterskej wodźe w Pančicach-Kukowje.
Bajowe figury w srjedźišću
Stróža. Na popołdnjo za dźěći a šulerjow přeprošatej towarstwo Radiška a zarjadnistwo biosferoweho rezerwata Hornjołužiska hola a haty dźens za tydźeń, 22. februara, wot 15 do 17 hodź. do Stróžanskeho Domu tysac hatow. Tam chcedźa so z pisanym swětom bajowych figurow, kaž wódneho muža abo připołdnicy, zaběrać. Wšitcy su wutrobnje witani. Zastup je darmotny.
Předstaja „Čeplski recept“
Nowy swójbny poskitk
Budyšin. „Hrajkownja“ rěka nowy poskitk za swójby, kotryž organizuje swójbne kubłanje Rěčneho centruma WITAJ jutře, štwórtk, w foyeru a w bašće Serbskeho ludoweho ansambla. Tam móža swójby z dźěćimi wšelake towaršne a deskowe hry pospytać a sej při tym kofej, čaj a sad zesłodźeć dać. Wot 14.30 do 18 hodź. móža so swójby prosće na so koncentrować, zhromadnje hrać a bjesadować. Wosebje přeprošene su Witaj-swójby.
Wo nałožkach we wobchodźe
Wojerecy. Přichodne dopołdniše zetkanje seniorow Křesćansko-socialneho kubłanskeho skutka wotměje so jutře, štwórtk, w 10 hodź. we Wojerowskim Wjacsławkec drastowym domje na Złokomorowskej 19. Tam chcedźa wopytowarjam serbske zymske nałožki wot ptačeho kwasa hač k camprowanju zbližić. Zajimcy su wutrobnje witani.
