Koncert a wustajeńca
Smochćicy. Na koncert z duwom „acuerdo“ pod hesłom „Tango – Musette – Klezmer“ přeprošuje Smochčanski Dom biskopa Bena jutře w 19.30 hodź. Berlinskej hudźbnikaj Anja Dolak (akordeon) a Bernhard Hariolf Suhm (wioloncello) zanjesetaj mjez druhim tradicionelny argentinski tango, francoski ludowy walčik a klezmerowe kruchi. Při tej składnosći móža sej wopytowarjo fotowu wustajeńcu Andreasa Varnhorna „Heimat/Domizna“ wobhladać. Po Budyskim Serbskim domje je wona nětko w Smochćicach widźeć, a to we hłownym domje, w bróžni kaž tež w cyrkwi swjateho Bena.
Zmije a swinjorězanje
Čorny Chołmc. Zmijowy swjedźeń ze swinjorězanjom wotměje so njedźelu w Čornochołmčanskim Krabatowym młynje. Wot 11 hodź. móža sej zajimcy tam kulinariske słódnosće swinjorězanja k wobjedu popřeć. Hromadźe z dźěćimi chce Čorny młynk potom zmije pušćeć. A hdyž wětřik raz tak prawje njeduje, chcedźa na łuce na dworje młyna 2 000 krokusowych cyblow tykać, kotrež klětu nalěto nadźijomnje pisany wobraz tworja.
Kniha a jubilej
Radźićeljo so zetkaja
Róžant. Wutworić přidatne žłobikowe městna w Smjerdźacej budźe jedna z temow přichodneho posedźenja gmejnskeje rady Ralbicy-Róžant jutře, štwórtk, we 18.30 hodź. w Róžeńčanskej sydarni. Nimo toho budźe rěč wo nowym hašenskim jězdźidle za Konječansko-Šunowsku wohnjowu woboru a wo kreditowym zrěčenju.
Wotrow. Tohorunja jutře, ale w 19 hodź. zetkaja so čłonojo gmejnskeje rady Pančicy-Kukow, tónraz na Wotrowskej starej šuli. Na jich dnjowym porjedźe steji mjez druhim třeći wotrězk ponowjenja Šule Ćišinskeho. Dale chcedźa wobzamknyć, postawu swj. Bosćana w Swinjarni restawrować dać. Wobě posedźeni stej zjawnej, a wobydlerjo su přeprošeni.
Na slědach ptačkow
Rakecy. Přirodowědnu ekskursiju na slědach ćahatych ptačkow podłu hatow pola Kačeje Korčmy blisko Rakec přewjedźe Kamjenski Muzej zapadneje Łužicy njedźelu, 21. oktobra, wot 8 do 11 hodź. Wobdźělnicy wobkedźbuja tam sta kačkow a husow, kotrež na swojim nazymskim ćahanju přestawku zapołoža. Wobdźělenje płaći pjeć eurow. Při přizjewjenju pod telefonowym čisłom 0 35 78/ 7 88 30 zajimcy zhonja, hdźe so ekskursija započnje.
W prózdninach paslić
Łaz. We Łazowskim Domje Zejlerja a Smolerja móža prózdninske dźěći jutře, srjedu, paslić. Wot 9.30 do 11.30 hodź. nastanu tam z pomocu sobudźěłaćerjow biosferoweho rezerwata Hornjołužiska hola a haty kaž tež Łazowskeje gmejnskeje biblioteki nazymske dekoracije z přirodnych maćiznow. Nožicy, pisak a lěpk měł sej kóždy sam sobu přinjesć, nimo toho tři eura za material.
Neurobiologa přednošuje
Lipsk. Serbske blido Lipsk přeprosy pjatk, 19. oktobra, we 18 hodź. wšitkich zajimcow na přednošk neurobiologa dr. Jurja Brankačka do rumnosće 4.216 filologiskeje fakulty Lipšćanskeje uniwersity na Beethovenowej 15. Pod hesłom „Wědomosć je mjezynarodna – zaćišće z Japanskeje“ rozprawja dr. Brankačk wo swojim žiwjenju jako slědźer. Přizamknje so bjesada w kofejowni „Kowalski“ na Ferdinanda Rhodowej 12.
Zajimawostki ze studija
Kulow. Za kulisy filmowanja a telewizije pohladnyć móža zajimcy srjedu, 17. oktobra, w 14.30 hodź. na Kulowskim Starym dwórnišću we wobłuku popołdnja seniorow Křesćansko-socialneho kubłanskeho skutka. Martina Janus rozprawja tam wo Lipšćanskim studiju MDR.
Na serbsku rozmołwu
Drježdźany. Na wólnu bjesadu w maćernej rěči přeprošeja někotři Serbja, bydlacy w sakskej stolicy. Wona wotměje so štwórtk, 18. oktobra, wot 19 hodź. w hospodźe „Altes Wettbüro“ na Antonowej 8 (blisko dwórnišća Drježdźany-Nowe město). Wšitcy zajimcy, hornjo- abo delnjoserbšćinu rěčacy a wuknjacy, su na rozmołwu wutrobnje witani.
Porěči wo domjacych pawkach
Łaz. Kak su pawki žiwe, kak so zežiwjeja a kak wažne su, z tajkimi a dalšimi prašenjemi zaběra so přednošk zajutřišim, srjedu, 17. oktobra, we 18 hodź. we Łazowskim Domje Zejlerja a Smolerja. Referent budźe Wolfgang Kotisek, hobbyjowy fotograf a wjelelětny nawoda Serbskeho folklorneho ansambla Slepo.
Posledni raz po wustajeńcy
Budyšin. Zakónčace wodźenje po wosebitej wustajeńcy Reginy Herrmann „Dźěl wote mnje“ budźe njedźelu, 14. oktobra, w 15 hodź. w Budyskim Serbskim muzeju. Přehladka pokazuje mnohostronskosć wuměłče, kotraž so nimo serbskeje tematiki tež z kulturami a nabožinami swěta zaběra. Jeje wušiknosć spóznawaš w kóždej jednotliwej tekstilnej plastice. Na wodźenju porěči wuměłča tež wo swojim žiwjenju a tworjenju. Wězo móža wopytowarjo twórby kupić.
Pytaja požčonki za wustajeńcu
Łaz. Spěchowanske towarstwo zetkanišća Dom Zejlerja a Smolerja organizuje lětušu adwentnu wustajeńcu wo modelach wohnjowobornych jězdźidłow. Za to pyta stare a nowe, wulke a małe modele hašenskich a dalšich awtow z wotpowědnym přisłuškom. Podpěraćeljo njech přizjewja so wot 22. oktobra hač do 15. nowembra we Łazowskim Domje Zejlerja a Smolerja pod telefonowym čisłom 035724/ 502 56. Wotewrěć chcedźa přehladku 2. decembra. Wona budźe přistupna póndźelu a štwórtk wot 10 do 12 hodź. a wot 13 do 17 hodź. kaž tež we wobłuku Łazowskich adwentnych wikow 15. decembra. Dalše informacije zhonja zajimcy pod www.zejler-smoler-haus-lohsa.de
Za zetkanje so přizjewić
Worklecy. Dekanatne dušepastyrstwo dźěći přeprosy šulerki a šulerjow 3. a 4. lětnika wutoru, 16. oktobra, wot 9 do 15 hodź. do Worklečanskeho Don Boskoweho domu. Tam chcedźa so ze swjedźenjom domchowanki zaběrać, sej zhromadnje a z wjeselom słódny nazymski meni zwarić a sej jón wězo słodźeć dać. Zajimcy njech přizjewja so hač do jutřišeho pjatka pod tel. čo. 035796/88 707 abo e-mailnje pod worklecy-kise@gmx. de. Za wudawki dnja zběraja wobdźělenski přinošk pjeć eurow.
Programěrować wuknyć
Wojerecy. Prózdninski poskitk za dźěći a młodostnych w starobje dźesać do 15 lět ma Wojerowski kompjuterowy muzej ZCOM jutře, pjatk, wot 15.30 do 18 hodź. Tam rozłoža, kak mikrokontrolery, kotrež su w nimale kóždym elektroniskim nastroju zatwarjene, funguja. Wobdźělnicy budu tajke kontrolery sami programěrować móc. Wobdźělenje je darmotne.
Wotewru durje muzeja
Choćebuz. W minjenymaj lětomaj su Choćebuski Serbski muzej na Młynskej 12 wobšěrnje saněrowali a přetwarili. To je nětko zakónčene. Tohodla přeproša tam jutře, 10. oktobra, wot 17 do 19 hodź. na dźeń wotewrjenych duri. W 17, w 17.45 a we 18.30 hodź. poskića połhodźinske wodźenje po domje. Wopytowarjo njebudu sej jenož wobhladać móc, što wšo je so w Serbskim muzeju twarsce změniło. Woni tam tohorunja zhonja, kak budźe nowa trajna wustajeńca rozrjadowana.
Chcedźa wjesnjanku počesćić
Čorny Chołmc. W Čornochołmčanskim Krabatowym młynje chcedźa jeho iniciatorku Gertrud Wincarjowu za jeje wurjadny žiwjenski skutk na wosebite wašnje počesćić. Na kromje noweje studnje před Domom Jurja Brězana ma w serbskej drasće žona z wobličom Gertrud Wincarjoweje sedźeć. Kaž jednaćel Krabatoweho młyna Tobias Čižik zdźěli, namołwjeja k darowanskej akciji, zo móhli bronzowu plastiku financować. Tohodla je nětko internetna strona www.99funken.de/brunnen-krabat-muehle přistupna, na kotrejž móža zajimcy swój pjenježny přinošk darić.
Z knihi dźěda čitał
Zarěč (Łu/SN). Wustajeńcu „Molowana swěca – formowana pjeršć“ z mólbami Petera Ehrlicha a z keramiku Drježdźanskeje wuměłče Rity Goldschmid su tele dny w Zarěčanskej „Konsumowej galeriji“ zakónčili. Na to je sej wobsedźer bywšeho knježeho dwora Stefan Triebs přeprosył archeologu a spisowaćela Thomasa Gerlacha, zo by z knihi wo Krabaće čitał. Dźěd Gerlacha, Drježdźanski wučer a spisowaćel Kurt Gerlach bě 1925 prěni roman wo Krabaće „Krabat – abo mała kuzłarska šula“ napisał. Po čitanju z knihi powědaše Thomas Gerlach wo swojej swójbje. Tak přitomni zhonichu, zo bě mjez jeho prjedownikami tež serbski wučer a spisowaćel Jan Bohuwěr Mučink, kotrehož dźowka bě so na Gerlacha do Drježdźan wudała. Nowy nakład knihi wo „Krabaće“ Kurta Gerlacha je lětsa wušoł. Dokelž pak je hižo rozebrany, budźe spočatk přichodneho lěta dalši nakład, Thomas Gerlach připowědźi.
Nazyma w měsće
Budyšin. Na Hłownym torhošću a na Bohatej hasy swjeća zajutřišim, njedźelu, Budyski nazymski swjedźeń. Wot 13 do 18 hodź. su wobchody wočinjene. Nimo toho budźe mała přehladka domjaceho skotu Helmec ratarskeho zawoda z Jitka widźeć. Na Hłownym torhošću móža so dźěći na słomjanych walčkach wucychnować. Tež live-hudźba zaklinči. A na Bohatej budźe 190 metrow dołha kofejowa tafla spřihotowana.
Nowy termin dźěłarnički
Žuricy. Swoju rězbarsku dźěłarničku wo serbskich bajach planuje Spěchowanski kruh za serbsku ludowu kulturu 26. a 27. oktobra pola rězbarja Alojsa Šołty w Žuricach. Wobdźělenje płaći pjeć eurow za dźěći a młodostnych, 20 eurow za dorosćenych. Drjewo přewostaji rězbar, trěbny grat njech sej kóždy wobdźělnik sam sobu přinjese. Zajimcy maja so hač do 19. oktobra pod telefonowymaj čisłomaj 03591/ 550 108 (wotmołwjak) abo 0172/ 916 94 55 (Alojs Šołta) abo e-mailnje pod přizjewić.
Nazymski koncert z kofejom
Postrow hórnikam zahudźili
Annaberg-Buchholz (SL/SN). Dujerska kapała Horjany je minjenu sobotu na wulkich burskich wikach na torhošću w Annabergu-Buchholzu wopytowarjow z wobšěrnym programom zawjeseliła. Hudźbnicy zapiskachu čěske štučki, naročne morawske pólki, němske ludowe spěwy a šlagry a wězo tež serbske pěsnički. W lóštnej a zabawnej moderaciji předstaji Uwe Macka němsce a serbsce domiznu kapały. Horjenjo wustupichu trójce 90 mjeńšin. Při krasnym nazymskim wjedrje dachu so ludźo, mjez nimi fanojo z Łužicy, wot temperamentneje hudźby zahorić. Jako překwapjenku zahrachu Horjenjo postrow hórnikam „Glück auf“. Jako přihladowarjo stanywši mócnje sobu spěwachu, běchu muzikanća jara hnući.
Woraja z traktorami
Kamjenej. Kak z traktorom najlěpje worać, to móža sej zajimcy jutře, srjedu, w Kamjenej pola Radworja wobhladać. Wot 13 hodź. wočakuja tam něhdźe dźesać mjeńšich a pjeć wjetšich traktorow a jich wodźerjow. Jedna z atrakcijow drje budźe tak mjenowany K 700. Wo ćělne derjeměće je postarane.
Budyšanka wustaja akwarele
