Łaz (AK/SN). Sakski krajny zarjad za dróhotwar a wobchad (LASUV) chce statnu dróhu S 108 we Łazu a dale hač k wotbóčce do Běłeho Chołmca hač do 2026 w třoch hłownych wotrězkach saněrować. Zahajić chcedźa projekt lětsa wot kupnicy Penny hač ke kromje wsy do Běłeho Chołmca. 2025 slěduje wotrězk wot kromy wsy ze směra Delnjeho Wujězda hač ke kupnicy a 2026 dalši wobłuk wot kromy wsy hač k wotbóčce do Běłeho Chołmca. „Zhromadna twarska naprawa je nuznje trěbna. Jako krajny zarjad přewozmjemy dróhotwar. Wotwodźowanje dešćikoweje wody, pitna woda a nadróžne wobswětlenje su nadawk gmejny“, rjekny zamołwity twarski nawoda Oliver Knick wutoru na informaciskim zarjadowanju za wobydlerjow. Něhdźe sto zajimcow je do hosćenca „Stare dwórnišćo“ přišło.
Drjewo zapalili
Nowa Wjeska. Njeznaći su wutoru składowanišćo drjewa na Hrańčanskej dróze w Nowej Wjesce zapalili. Woheń składowane drjewo kaž tež składowanišćo same zniči. Horcota wohenja wobškodźeše nimo toho wokna a durje bliskeho domskeho. Wohnjowi wobornicy wokolnych wsow woheń zhašachu. Wěcnu škodu trochuja na někak 10 000 eurow. Kriminalna posłužba pad nětko přepytuje. Wo motiwach skućićelow nětko hišće ničo prajić njemóža.
Wojerecy (SiR/SN). Na Wojerowskej dźěćacej a młodźinskej farmje, kotraž je w nošerstwje Křesćansko-socialneho kubłanskeho skutka, móžeše njedawno 20 nuklow do nowych puklotow přećahnyć. Mjez nimi je wot wotemrěća wohrožena Mišnjanska družina. „Smy sej modernu a wjetšu připrawu hižo dołho přeli“, praji nawoda farmy Klaus Helbig. Do projekta inwestowachu štyricyfrowu sumu pjenjez. Při tym pomhachu mnozy partnerojo, mjez druhim Łužiski center, drogerijowa kupnica „dm“ a Wuchodosakska lutowarnja.
Šulerjo Foucaultoweho gymnazija podpěrachu předewzaće z akciju „Genialnje socialnje“. Je to sakska najwjetša młodźinska solidaritna akcija, při kotrejž so šulerjo na najwšelakorišich polach angažuja a zasłužene pjenjezy za socialne projekty přewostaja. „Běchmy we wšelakich zarjadnišćach a firmach a smy tam sobu dźěłali. Dźěl nadźěłanych pjenjez, dokładnje 700 eurow, přepodachmy farmje“, powěda 15lětna Lea. Wona je na akciskim dnju w hladanskej słužbje dźěłała. Za angažowanu pomoc wšitkich wobdźělenych je Klaus Helbig jara dźakowny.
„Karls“ wjeska dožiwjenjow
Döbeln. Zajutřišim wotewrě so nowy wólnočasny park při awtodróze A14, kotryž budźe přez cyłe lěto a tež při špatnym wjedrje přistupny. Na cyłkownje 6 hektarach skića mjez druhim husańcowu čaru, truskalcu, po kotrejž móžeš łazyć, abo skakanski zawk we wulkosći XXL. W lěću so 1,5 hektarow wulka płonina přidruži, na kotrejž ma nastać labyrint w kukuricy. Wosebitosć w Sakskej budźe raj kołbaskow ze žonopowym suwadłom.
Wo spěchowanju wutwara rěčeli
Kumwałd. Krajnej radaj wokrjesow Budyšin a Zhorjelc staj so wčera z něhdźe 80 wjesnjanostami swojeju wokrjesow zešłoj, zo byštaj wo financnej podpěrje wutwarej A4 kaž tež elektrifikaciji železniskeje čary Drježdźany-Zhorjelc ze srědkami za změnu strukturow diskutowałoj. Na kóncu so wšitcy na to dojednachu, zo diskusiju w gremijach městow a gmejnow dale wjedu a tam wo tym rozsudźa.
Knižne wiki wotewrjene
Wojerecy. Dojutrownu dźěłarničku přewjedźetej župa „Handrij Zejler“ a syć ZARI jutře, štwórtk, wot 14 do 17 hodź. we Wojerowskej bibliotece „Brigitty Reimann“. Tam móža zajimcy jutrowne jejka po serbskich technikach debić. Nimo toho profesionelnje debjene jejka wustajeja a wo nich informuja. Wobdźělnicy njech přinjesu dwě wudutej abo zwarjenej jejce sobu. Zastup je darmotny. Wšitcy su wutrobnje witani
Čita wo pradźědu
Njeswačidło. Ze swojeje knihi „Johann Zautes Lebensfahrt“ čita jutře, štwórtk, w 19.30 hodź. Sabine Bauer-Helpert na Njeswačanskej cyrkwinskej žurli. Kniha jedna wo jeje serbskim pradźědu a je zajimawy biografiski roman wo hornjołužiskim žiwjenju w 19. lětstotku. Wopytowarjo móža sej knihu po čitanju za 19,80 eurow kupić. Awtorka jednotliwe eksemplary rady signuje. Knižne čitanje so w běhu lěta na dalšich městnach Hornjeje Łužicy wospjetuje. Čitanje budźe w němskej rěči.
Kolesowarka smjertnje znjezbožiła
Běła Woda. Tragiske wobchadne njezbožo sta so póndźelu dopołdnja w Běłej Wodźe. 38lětny wodźer nakładneho awta chcyše z pódlanskeje na hłownu dróhu wotbočić, njewobkedźbowaše pak předjězbu kolesowarki, kotraž wotlěwa přijědźe. 85lětna zajědźe do nakładneho awta, padny a so ćežko zrani. Žonu dowjezechu z helikopterom do chorownje, hdźež wona we wječornych hodźinach na sćěhi swojich zranjenjow zemrě.