Policija (06.08.18)

Montag, 06. August 2018 geschrieben von:

Z třomi promilemi chětro wopity

Leppersdorf. Blisko Leppersdorfa, na dróze do směra na Kleinröhrsdorf, je wčera něhdźe w 2 hodź. chětro wopity muž z kolesa padnył. Jako wot awtoweho šofera zawołani policisća 29lětneho kontrolowachu, woni zwěsćichu, zo měješe tón 3,22 promilow alkohola w kreji.

Při horcoće štomy wobrězowali

Freitag, 03. August 2018 geschrieben von:
We wulkej horcoće su sobudźěłaćerjo Kamjenskeje dróhomištrownje wčera dopoł­dnja mjez Hrańcu a Sernjanami štomy wobrězowali. Wone ćerpja kaž wša přiroda pod pobrachowacymi spadkami. W někotrych kónčinach Budyskeho wokrjesa, tak na přikład w Ra­dworskej gmejnje, pak móžachu so ludźo popoł­dnju a wječor nad dešćom wjeselić. Z blakami běchu zliwki hnydom zaso chětro sylne. Kaž Serbski ­rozhłós dźensa rano rozprawješe, mějachu w Prawoćicach 17 litrow na kwadratny meter, w Chrósćicach 24 litrow. Porno tomu bě dešć na juhowuchodnej kromje ­Budyšina lědma pytnyć, a zahrodkarjo dyrbjachu znowa krjepić. Foto: Feliks Haza

Temperatura wody horceho wjedra dale stupa. Ćim bóle pak podźěl kislika we wodźe woteběra. Prawdźepodobnje tony mortwych rybow su dźensa ze Slěborneho ­jězora pola Łaza wułójili. Tu a tam mortwe ryby hišće na přibrjohu leža, štož je ­so wočerstwjacym při jězorje zawěsće njerjany napohlad. Foto: Gernot Menzel

Před smalacym słóncom so škitać

Freitag, 03. August 2018 geschrieben von:
Před smalacym słóncom swoju kožu škitać je přewšo wažne. Inženjerka farmacije Regina Becker tuž kupcow w Choćebuzu-Chmjelowje wo tym rady poradźuje. Předewšěm wudźěłki za škit kože dźěći maja tam w poskitku. Tón měli ludźo swojej ­koži w słóncu často a w dosahacej měrje popřeć. Zmysłapołne dale je swoju hłowu před słóncom škitać. Mjeztym chorownje zdźěleja, zo tuchwilu dale a wjac ludźi ­ze spalenej kožu lěkuja. Potrjecheni přichadźeja zwjetša hakle w nocy a z wulkimi bolosćemi. Hewak su fachowcy tajke pady skerje pola wosobow dožiwili, kotrež ­do solarija chodźa. Foto: Michael Helbig

W Nižej Wsy wotstronjeja sobudźěłaćerjo firmy SLB z Budyšina tele dny kolije stareho železniskeho přechoda. Dróha do Šešowa wostanje tuž hač do 10. awgusta zawrjena, kaž Budyski krajnoradny zarjad zdźěla. Tež w Chelnje do směra na Radwor tamniši železniski ­přechod wotstronja runje tak w Hlinje pola Malešec. Tak stej tohorunja wonej dróze hač do přichodneho pjatka zawrjenej. Kolije su zbytki bywšeje čary mjez ­Wojerecami a Budyšinom, kotruž běchu před nimale 20 lětami zawrěli. Foto: SN/Maćij Bulank

Zwyša wužiwanske popłatki

Freitag, 03. August 2018 geschrieben von:

Běła Woda (AK/SN). Město Běła Woda je popłatki za wužiwanje swojich komunalnych sportowych připrawow zwyšiło. Płaćić maja nowe tarify hač do lěta 2022, kaž měšćanska rada jednohłósnje wobzamkny. „Po strukturnym koncepće hospodarskeho plana chcemy ze zwyšenjom 58 000 eurow wjac dochodow docpěć“, rozłoži měšćanosta Torsten Pötzsch (Klatext). Zaměr města je, popłatki zběrać, kotrež tež kóšty zarunaja.

Chcedźa zběrku kupić

Freitag, 03. August 2018 geschrieben von:

Wojerowski kompjuterowy muzej a lutowarnja pjenjezy zběraja

Wojerecy (SN/JaW). Konrada Zusowy kompjuterowy muzej (ZCOM) we Wojerecach prócuje so wo nakup hódnotneje zběrki dokumentow wo swojim mjenodawarju. W nowinskej zdźělence muzej rozprawja, zo je projekt tak mjenowaneho crowdfundinga do žiwjenja zwołał.

Muzej ma jónkrótnu móžnosć „nimo originalnych mólbow tež wulke mnóstwo spisow, mjez nimi originalnu rozprawu rukowaćelstwa Zuse KG a dalše objekty, kotrež zběrka wopřijima, kupić. Dohromady je 7 000 eurow trěbnych. „Kompjuterowy muzej chcył zběrku rady za Wojerecy měć. Zhromadnje z Wuchodosakskej lutowarnju Drježdźany smy tuž crowdfundingowy projekt załožili, zo bychmy trěbne pjenjezy zezběrali. Wšako je muzej ze zběrkow originalow, kotrež su wosebite pokłady za naše dźěło, žiwy“, zdźěla ZCOM.

Motorske a krajina nadměru wabja

Freitag, 03. August 2018 geschrieben von:
Kóždolětne zetkanje motorskich w Bórkhamoru je dale a woblubowaniše. Na dźewjatym wudaću minjeny njedawno při Jantarowym jězoru wobdźěli so lětsa wjace hač 150 bikerow ze swojimi mašinami. Při tym njewabjachu jich jenož motorske, ale tež rjana krajina wokoło łužiskeho jězora. „Tu móžemy so wočerstwić, sej přirodu lubić dać a so runočasnje swojemu hobbyjej wěnować“, měnještaj Kathleen Brandt a jeje přećel Bolle z Taucha pola Lipska. Zarjadowała bě zetkanje motorskich znowa „Kurvenliga Łužica“, kotraž zwjesela so kóžde lěto znowa nad wulkotnej podpěru Bórkhamorčanow. Tak pomhaja woni při na- a wottwarje swjedźenišća, tež swobodne dowolowe stwy we wsy smědźa bikerojo wužiwać, štož předewšěm wobdźělnicy z Pólskeje a dalšich krajow rady činja. Foto: Jost Schmidtchen

Wědźeć, što so stawa

Freitag, 03. August 2018 geschrieben von:

Je dźensa přemało z wašeho regiona w Serbskich Nowinach abo njeje scyła ničo z wašeje wsy? Změńće to a stańće so z korespondentom jeničkeho serbskeho wječornika. Informujće nas wo nowosćach w swojej wsy a wokolinje kaž tež wo podawkach w swojich towarstwach. Zazwońće redakciju wječornika w Budyšinje pod telefonowym čisłom 0 35 91 / 57 72 32 abo pósćelće nam informacije abo tež wobrazy z e-mailku na .

Chcemy wědźeć, što so stawa, zo móhli čitarjam SN a dalšim zajimcam wo nowosćach na serbskich a dwurěčnych wsach rozprawjeć. Informujće nas, wjeselimy so nad kóždym pokiwom.

Redakcija Serbskich Nowin

Přeju dale dosć podpěry

Freitag, 03. August 2018 geschrieben von:
Hižo wot lěta 1990 přeprošeja čłonojo ­Kamjenskeje Iniciatiwy dźěći z Černobyla běłoruske, na diabetes schorjene dźěći na wočerstwjenje do Łužicy. Mjeztym nimale tři lětdźesatki čestnohamtsce tajki přebytk organizować, za tym tči tójšto prócy a dźěła. Njezejmuju kłobuk jeno před čłonami iniciatiwy, za kotruž angažuja so tež wjaco­ri Serbja, ale zdobom před wšěmi, kotřiž iniciatiwu po swojich móžnosćach podpěruja, a to hižo cyły čas. Wěm so dopomnić, zo běchu před někotrymi lětami dźěći a młodostni z Černobyla hišće w hóstnych, tež serbskich swójbach zaměstnjeli, na přikład na wsach wokoło Pančic-Kukowa. Tomu drje dźensa wjac tak njeje, dokelž je dale a ćešo hóstnych staršich nańć. Přiwšěm njeje Kamjenska iniciatiwa wótku do žita ćisnyła, ale je nowe puće namakała dźěćom z Černobyla pomhać. Přeju iniciatiwje, zo dóstawa dale dosć podpěry. Tak móže dźěćom spodobne dny we Łužicy zmóžnjeć. Janek Wowčer

Anzeige