Karnewal w znamjenju orienta

Montag, 04. März 2019 geschrieben von:

Žonjacy póstniski ćah magisku ličbu wobdźělenych skupin docpěł

Kulow (aha/SN). Wot lěta 1988 je w Kulowje z tradiciju, zo wuhotuja žony a młodostne sobotu do róžoweje póndźele swój wosebity póstniski ćah. Tón wopokaza so zawčerawšim jako přiwabliwa tradicija, k čemuž je poměrnje rjane wjedro přinošowało. Irena Nowakowa a Birgit Šimanowa stej na torhošću jednotliwe wobrazy na temu „Orient“ připowědźiłoj. Wonej zwěsćištej, zo su lětsa w Kulowje ze sto wobdźělenymi skupinami magisku ličbu docpěli. Wjace hač 1 500 žonow a holcow bě do ćaha zapřijatych. Wone su tydźenje do toho wjele dźěła na so wzali, zo bychu ze swojimi přewšo pisanymi a kreatiwnymi kostimami lóštnu naladu přisporjeli. Dwójce su nory na połtřeća kilometrow dołhej čarje, kotraž z wobdźělenej ličbu skupin runje tak dosahaše, tysacy ludźi zbliska a zdaloka zawjeselili. Napadnyło je, zo bě mjez wopytowarjemi wjele předrasćenych.

Tři kategorije za zahrodki

Montag, 04. März 2019 geschrieben von:

Prěni raz po lěće 1996 bě město Budyšin hromadźe z teritorialnym zwjazkom zahrodkarstwa zestajiło statistiski material wo małych zahrodkach na swojim teritoriju a je z toho koncepciju za přichod zdźěłało. Měšćanscy radźićeljo su ju na swojim zašłym posedźenju schwalili.

Budyšin (SN/MWj). W sprjewinym měsće Budyšinje je tuchwilu 48 małozahrodkowych připrawow z cyłkownje 3 008 parcelemi. Po informacijach z měšćanskeho zarjadnistwa su wone derje wućežene. Jeno­ 3,3 procenty z nich tuchwilu wob­sadźene njejsu. Tónle niwow chcedźa tež přichodnje zachować, za čož pak trjebaja zajimcow. Hač jich přichodnje dosć budźe, wotwisuje sobu wot ličby woby­dlerjow. W koncepciji wuchadźeja w najhóršim padźe z toho, zo ličba woby­dlerjow hač do lěta 2032 dale woteběra a na 35 000 spadnje. W najlěpšim padźe so dźensniša ličba zachowa.

Na fararja Jakuba Žura spominali

Montag, 04. März 2019 geschrieben von:
Jako jara angažowaneho měšnika předstaji farar Šćěpan Delan minjeny pjatk wječor na Ralbičanskim „Radlubinje“ jednoho ze swojich předchadnikow, duchowneho radu­ Jakuba Žura. Jako jednu z jeho wulkich zasłužbow wuzběhny Delan nowotwar cyrkwje w běhu třoch lět, kotraž bě so kónc Druheje swětoweje wójny wupaliła. Składnostnje 50. posmjertnin fararja Jakuba Žura – wón zemrě 92lětny 27. februara 1969 w Konjecach – stej Ralbičanska wosada a Towarstwo Cyrila a Metoda přepro­syłoj, zo bychu ludźo na kemšach a po tym we wosadnicy na njeho spominali. Wjacori­ přitomni powědachu wo tym, kak běchu jeho sami dožiwili, a pokazowachu k tomu fota. Foto: Rafael Ledźbor

Wojerecy (AK/SN). Z kongresom za demokratiju, kubłanje a žiwjensku kwalitu chce město Wojerecy akterow z praksy 7. měrca hromadu wjesć. Woni měli sej nazhonjenja wuměnjeć, so mjez sobu pozbudźeć a nowe ideje wuwiwać. „K dobrej žiwjenskej kwaliće słušatej demo­kratija a kubłanje“, podšmórny wyši měšćanosta Stefan Skora (CDU), jako je tele dny hromadźe z regionalnym běrowom za kubłanje, demokratiju a žiwjenske perspektiwy (RAA) program předstajił.

15 referentow a wjace hač 100 wobdźělnikow je so přizjewiło. „To njejsu jenož fachowcy z komunow, ale tež z młodźinskeho socialneho a šulskeho dźěła runje tak kaž z dźěła z ćěkancami “, rje­kny Jens Leschner z měšćanskeho zarjadnistwa. Tam móža swoje nazhonjenja z interkulturneho tydźenja a dalšich projektow zapřijeć. Helga Nikich z předsydstwa RAA skedźbni na to, zo su Wojerecy jedne z mało městow z wosebitym kubłanskim konceptom.

Krótkopowěsće (04.03.19)

Montag, 04. März 2019 geschrieben von:

Dobre wuchadźišćo njedocpěł

Połčnica. Serbski kandidat za lětuše wólby Sakskeho krajneho sejma Hajko Kozel njeje za nastajenje krajneje lisćiny sakskeje Lěwicy 13./14. apryla w Lipsku dobre wuchadźišćo docpěł. W rozsudnych wólbach wo druhe preferowanje kandidata z Budyskeho wokrjesa přesadźi so Felix Muster na zhromadźiznje bazo­wych zastu­pjerjow Lěwicy sobotu w Połčnicy přećiwo Kozelej.

Nowy hotel wotewrěli

Lubnjow. Błóta su mjez turistami jara woblubowane. Po ličbje přenocowanjow leži region po cyłej Němskej na 3. městnje. Tuž tam přenocowanske poskitki turi­stam rozšěrja. Minjeny pjatk su w Lubnjowje nowy hotel „Při Błótowskej termje“ wotewrěli. Za cyłkownje 60 stwow je so tam hač do měrca hižo něhdźe 4 400 hosći přizjewiło.

Polak je kandidat Europy

Policija (04.03.19)

Montag, 04. März 2019 geschrieben von:

Spěšnišo hač dowolene

Kulow. Dobre wóčko mějachu sobotu wječor policisća w Kulowje. Jim napadny tak mjenowane lochke jězdźidło z nalěpkom 45 km/h. Dokelž pak bě awtko wočiwidnje spěšnišo po puću, kontrolowachu je a prošachu wo jězbnu dowolnosć 15lětneje wodźerki. Wona měješe swojej starobje wotpowědnje dowolnosć klasy AM. Za awto, spěšniše hač 45 km/h, pak by klasu B trjebała. Nětko chcedźa zwěsćić, hač bu jězdźidło manipulowane.

Podhladneho zajeli

Budyšin. K hašenju wołali su wohnjowych wobornikow w nocy na sobotu na Budysku­ Sukelnsku. Tam so w pincy bydlenskeho domu wjacore składowane wobruče palachu. Cyły dom dyrbjachu ewakuować. 45lětny muž je podhladny, zo bě woheń zamiškrił. Jeho policisća nachwilnje­ zajachu.

Nowy pospyt

Freitag, 01. März 2019 geschrieben von:

Budyšin (SN). Dźěćaca a młodźinska biblioteka sprjewineho města móhła bórze „Jurij Brězan“ rěkać. Namjet, biblioteku po serbskim spisowaćelu pomjenować, stej na minjenej Budyskej měšćanskej radźe srjedu frakciji Lěwicy a SPD zapodałoj. Budyski wyši měšćanosta Alexander Ahrens (SPD) namjet wita. Wón pak zwurazni, zo měli Serbja sami namjet dale podpěrać, chcyli-li jón zwoprawdźić.

Chětro zadźiwany

Freitag, 01. März 2019 geschrieben von:
Loni składnostnje 750lětneho wobstaća města Wojerec su w tamnišim starym mě­sće­ přewjedli tak mjenowany „Bulwar Cyr­kwin­ska hasa“. Zapřijeli běchu do měsac trajaceho zarjadowanja tež serbske temy. W tym nastupanju wšak su Wojerecy přikładne a na swoje korjenje njezabywaja. Runje tohodla mje zadźiwa, zo njejsu lětsa při planowanju projekta „Bulwar stare město“ dotal ani kuska na serbskosć mys­lili­ a ju hišće do koncepta zapřijeli. Serbsku rěč a kulturu samozrozumliwje do měšćanskeho wšědneho dnja integrować po mojim měnjenju hinak wupada. Wězo je wažne zajimawosće města předstajić. Ale swoje korjenje zaprěć a je scyła njewobkedźbować? K wěrnosći pak tež słuša, zo móhli so Wojerowske Domowinske cyłki­ přizjewić a same wot so swoje sobudźěło a pomoc poskićić, zo njeby scyła k tajkemu wuwiću dóšło. Plany wo nowym projekće dźě njejsu hakle wot wčerawšeho znate, a město je dalšim namjetam wote­wrjene. Janek Wowčer

Wěstoty dla štomy pušćeli

Freitag, 01. März 2019 geschrieben von:

Smjerdźaca (aha/SN). Štóž je minjeny tydźeń­ po statnej dróze S 92 ze Smjerdźaceje do směra na Debricy jěł, so njemało dźiwaše, zo běchu na lěwej stronje před Bušenku po šěrokosći ně­hdźe wosom metrow štomy pušćane. Tukanja, zo móhł tam snano kolesowarski puć nastać, pak běchu wopačne. Pozadk akcije je, tak rewěrowy hajnik klóštra Marijineje hwězdy Ullrich Furchner roz­ło­žuje, zo bě sej krajny zarjad za dró­­hotwar a wobchad (LASuV) pušćensku naprawu žadał, zo njebychu štomy při njewjedrach a wichorojtym wjedrje wob­chad na dróze wohroželi.

Historiske žro trajnje wožiwić

Freitag, 01. März 2019 geschrieben von:

Zakładny koncept za třiměsačny „Bulwar stare město“ předstajili

Wojerecy (AK/SN). Staroměšćanski dźěl Wojerec sylnišo a trajnje wožiwić je za­měr projekta „Bulwar stare město“, kotryž chcedźa wot 3. junija hač do 25. awgusta přewjesć. Z nim nawjazaja na lońši ­štyritydźenski „Bulwar Cyrkwinska hasa“ we wobłuku Wojerowskeho měšćanskeho jubileja. „Rozšěrimy čas na tři měsacy, runje tak teritorij kaž tež wobsahi. ­Nimo Cyrkwinskeje hasy zapřijmjemy torhošćo z městnom před Wobydlerskim centrumom Piwarska hasa 1 kaž tež Friedri­chowu hač ke Komercnej bance“, rozłoži archi­tektka a cityjowa managerka Dorit Baumeister, kotraž je projekt zawčera­wšim předstajiła.

Anzeige