Krótkopowěsće (22.01.24)
Kandidaća za wólby w Sakskej
Drježdźany. CDU, SPD a FDP su sobotu kandidatow za lětuše wólby do sakskeho krajneho sejma nastajili. CDU je nimo toho Olivera Schenka jako kandidata za europske wólby nominowała. Dotalny šef statneje kenclije Schenk, kiž je njedawno w Chrósćicach składnostnje spěchowanja kongresa Europasiona pobył, ma z tym wuhlady na nowy nadawk. Čitajće prošu wjac na 2. stronje!
Z ličbu zajimcow su spokojom
Drježdźany. Wjace hač 36 000 zajimcow je minjeny kónc tydźenja wiki „KarriereStart“ w Drježdźanach wopytało. Předewšěm młodostni wobhonichu so wo powołanskich móžnosćach, zdźěli wčera zarjadowar wikow Ortec. Cyłkownje su wjace hač 560 wustajerjow na přehladce prezentowali.
Kozel zaso kandiduje
Kajka to krasna „zymička“
Štó drje pokal lětsa dobudźe?
Nětko je trjeba so přizjewić
Policija (19.01.24)
Wšelake drogi namakali
Wojerecy. Zastojnicy policije su wčera w bydlenju na Budyskej aleji wšelake družiny drogow namakali. 36lětna žona a jeje 38lětny přećel němskeho pochada, dyrbitaj so nětko před sudnistwom zamołwić.
Na wólbnu zhromadźiznu
Hórki. Serbscy Sokoljo přeprošuja wšitkich zajimcow na hłownu a wólbnu zhromadźiznu Serbskeho Sokoła z.t. Zarjadowanje budźe pjatk, 2. februara, wot 18 hodź. w Hórkach w tamnišim Młynkec hosćencu.
Sobotu do šule
Kulow. Na Kulowskej wyšej šuli „Korla Awgust Kocor“ zetkaja so jutře wot 17 do 19 hodź. wšitcy zajimcy na dźeń wotewrjenych duri. Šulerjo, wučerjo, zastupjerjo staršich a sobudźěłaćerjo přeprošeja swójby, wosebje dźěći, kotrež tuchwilu do 4. lětnika chodźa. Móža rejowansku skupinu a šulsku band dožiwić a so z konceptom šule zeznajomić.
Dowěru sebi sylnić
Budyšin. Šulski centrum Caritas Budyšin přeprosy sobotu, 3. februara, na Dźeń wotewrjenych duri. Wot 9.30 do 12.30 hodź. maja zajimcy składnosć, wo poskitkach, wobsahach, metodice a zaměrach wukubłanja na socialneho asistenta a kubłarja zhonić.
Dźěłowa skupina wutworjena
Radwor (SN/MkWj). Dźěłowa skupina „Energija a klima“ móže w Radworskej gmejnje dźěłać započeć. Gmejnscy radźićeljo su na swojim posedźenju tutón tydźeń srjedu z dwanaće wosobow wobstejacy gremij wobzamknyli. Do toho bě klimowy manager gmejny Marcel Bellmann radźićelow a hosći wo tym informował, zo je so na namołwu gmejny cyłkownje 17 zajimcow za sobudźěło w čestnohamtskim gremiju přizjewiło. Dźěłowa skupina ma gmejnu w prašenjach klimy a energije poradźować, naprawy namjetować a wobzamknjenja přihotować. Dnja 20. měrca planuja zjawne informacije zarjadowanje w hosćencu „Meja“. Dźěłowa skupina je reakcija na klimowu politiku zwjazkoweho knježerstwa: Gmejny su namołwjene, za móžnosćemi efektiwneho wužiwanja energije a nowych móžnosćow tepjenja pytać.
Z ratarjemi so solidarizowali
Policija pozdatny nadpad přepytuje
Budyšin (SN/BŠe). Na internetnej stronje Facebook skedźbni wobydler z Budyšina na pad, kotryž bě so minjenu wutoru njedaloko Mosta swjateho ducha stał. Tam staj pozdatnaj wukrajnikaj młodostneho z nožom nadpadnyłoj. Powěsć so spěšnje w syći rozpřestrě a tež strona AfD reaguje a ma nadpad za „atentat na žiwjenje“. Kaž policija na naprašowanje SN zdźěli, je jim pad znaty a zastojnicy přepytuja njewobkrućeneho podhlada dla w zwisku ze strašnym zranjenjom ćěła. Wozjewjenka policiji předleži.
Z wopisowanja nadpada wuchadźa, zo staj wukrajnikaj młodeho muža narěčałoj a so jeho woprašałoj, hač chce wón drogi kupić. Młodostny spyta ćeknyć, při čimž staj skućićelej jeho z nožom nadpadnyłoj. Młody muž pak móžeše so wuwinyć.
Krótkopowěsće (19.01.24)
Přihotuja jutrowny seminar
Budyšin. Serbske młodźinske towarstwo Pawk hotuje so na lětuši jutrowny seminar Młodźiny europskich narodnych skupin (MENS) w Budyšinje. W martrownym tydźeńju wočakuja někak 60 młodostnych z cyłeje Europy. Z jednaćelku MENS zetkachu so štwórtk zo bychu program a financowanje seminara wothłosowali.
Organizatorojo NFF přeprošuja
Großhennersdorf. Filmowy festiwal Nysa (NFF) wotměje so lětsa wot 14. do 19. meje a to hižo 21. raz. Wjace hač 900 filmowych přinoškow w kategorijach hrajny a dokumentarny film kaž tež krótkofilm je lětsa dóšło – wjace hač hdy prjedy. Na 21 městnosćach podłu Nysy w Čěskej, Pólskej a Němskej njeposkićuje festiwal publikumej jeno filmowe předstajenja, ale tež koncerty, čitanja, wustajeńcy a partyje.
Busy zaso po planje po puću
Budyšin. Hładkich dróhow a wjele sněha dla njejsu wot wčerawšeho popołdnja w Budyskim wokrjesu busy jěli. Informaciju rozšěrichu zamołwići za bliskowobchad mjez druhim po socialnych medijach. Wot dźensnišeho ranja busy zaso po planje jědu, přiwšěm móhło k zapozdźenjam dóńć.
