Budyšin. Křesćan Krawc předstaji zajutřišim, 5. awgusta, swoju knihu „Was wir in uns tragen“ w Budyskej Smolerjec kniharni, a to nimale po zwučenym wašnju w 19 hodź. na městnje. W Ludowym nakładnistwje Domowina wušła zběrka portretow je přełožk publikacije „Sej statok stajili“ a wopřijima tohorunja re­portažu wo „Chróšćan zběžku“. Wopytowarjo měli płaćiwe postajenja hygieny wobkedźbować.

Pomhaja pěstowarni

Budyšin. Na iniciatiwu Budyskeho Lionsoweho kluba su so štyri kluby regiona k zhromadnej akciji zjednoćili pomhać wot přepławjenja potrjechenej kónčinje nad rěku Mosel. Budyski klub wobdźěli so z 5 000 eurami. Dorostowa organizacija kluba Leo Club je 2 000 eurow přinošowała. Pjenjezy su za dospołnje skóncowanu pěstowarnju w porynsko-pfalcskim Salmtalu. Dalše pjenežne dary na konto Lionsoweho kluba pod čisłom DE39 8509 0000 5091 8010 37 su rady witane.

Sernjany (CŠ/SN). W Sernjanach wotměchu minjeny kónc tydźenja swój wjesny swjedźeń w mjeńšim kruhu. Wšako bě hłownje za wjesnjanow samych mysleny. Hibanje a sport steještej při tym w srjedźišću.

Sobotu přeprosychu najprjedy koparjow na wurisanje do tak mjenowaneje socceroweje areny. To je začinjeny dźesać króć 15 metrow wulki štyriróžk, w kotrymž bul cyle spěšnje běži. A to bě něšto za starych knjezow. Wótre wóčko a spěšne přihrawki wjedźechu jich na prěnje městno před Róžeńčanskej młodźinu. Dohromady bě pjeć cyłkow nastupiło. Paralelnje mějachu popołdnju dźěćace poskitki, a to tajke prawe klasikarje. Plackowaj mužej tam běštaj a zdobom drjewjana žerdź, na kotruž móžachu dźěći lězć, zo bychu sej słódkosće abo darik wottorhnyli. Něhdźe 200 dźěći a jich staršich, ale tež młodźi a starši ze susodnych wsow je so na swjedźenišću za wohnjowej woboru zabawjało. Wšako mějachu za nich tež samopječeny tykanc a kofej spřihotowany.

Za přećelow sporta w Ralbičanskim stadionje dobre rozrisanje namakali

Ralbicy (JK/SN). Na minjenym posedźenju gmejnskeje rady Ralbicy-Róžant wuprajichu so wjesnjanosta Hubertus Ryćer (CDU) a dalši radźićeljo za to, podpěrać tamnišu sportowu jednotku při rozrisanju problema přihladowarskich trawersow. Wosebje hladajo na 100lětne wobstaće sportoweho towarstwa, kotrež chcedźa za dwě lěće swjećić, je pomoc gmejny trěbna. Tak wjesnjanosta radźićelow informowaše, zo su zhromadnje z komornicu Francisku Čapikowej hišće raz gmejnske financy přehladali a zwěsćili, zo hodźa so aktiwity projektoweje skupiny pod nawodom inženjera Stanija Statnika z 20 000 eurami podpěrać. To přitomneho inženjera wulce zwjeseli. Hromadźe z dalšimi čłonami projektoweje skupiny běchu wo nowych trawersach rozmyslowali a su dobre rozrisanje namakali.

Hosćency a korčmy su za towaršnostne žiwjenje wažne městna, wšako so tam ludźo rady zetkawaja. Často maja tež zajimawe stawizny. W swojej lětnjej seriji tajke gastronomiske předewzaća předstajamy, dźensa hotel a hosćenc „Při młynje“ w Nowej Łuce. (7)

Štyri kilometry sewjerozapadnje Wojerec dojědźeš sej do Noweje Łuki w gmejnje Halštrowska Hola. Přeprěčiš-li móst přez Halštrowsku wodu steji na lěwej stronje hotel a hosćenc „Při młynje“. Stawizny hosćenca napřećo bywšemu młynej sahaja do lěta 1861. To bě tam hižo dźědowy wuj nětčišeje mějićelki hosćenca Roswity Kochoweje hosći witał. Dom samy je wudwór, słušacy k Wojerowskemu hrodej. Po Prěnjej swětowej wójnje wjedźeštaj jón Awgust a Marie Koar, kotrajž staraštaj so tež wo palencarnju a ratarstwo. Dokelž njeměještaj žane dźěći, zdźědźištaj wobsydstwo swojemu bratrowcej Wilhelmej Koarjej. Wón bě pilny a angažowany. Z mandźelskej Hanu ­a dźěsćomaj Ernu a Maksom je wón hosćenc a ratarstwo tež přez ćežke lěta wjedł. Z industrializaciju a přiběracym wudobywanjom brunicy ludźo hosćenc dale a bóle wopytowachu.