Wjesny dźěl Budyšina Słona Boršć zhla­du­je na wotměnjate stawizny, kotrež­ wopřijimaja mjez druhim přisłušnosć ke křesćanskimaj konfesijomaj. Na to je minjeny pjatk we wsy tež poswjećenje křiža pokazało.

Słona Boršć (CS/SN). Wjes Słona Boršć, přisłušaca Budyskemu tachantstwu, bu pjenježneje nuzy dla w lěće 1649 ewangelskemu knježkej jako zawdawk pře­wo­stajena. Wjetšina Słonoboršćanow bě katolskej wěrje přiwšěm dale swěrna. Tak postajichu w lěće 1902 wosrjedź wsy křiž ze serbskim napisom „Jězuso, smil so“. Na městnje, hdźež so wjacore puće křižuja, bě drje tež hižo wjele lět do toho křiž stał. Wšako wjedźe tam mjez druhim dawna putniska šćežka do španiskeho Santiaga de Compostela.

Loni hišće bě křiž z kerkami wobro­sćeny a njebě hižo hladany. Tak je město Budyšin, kotremuž ležownosć słuša, městnosć z křižom sporjadkować dało. Móžno bě to dźakowano spěchowanju 7 500 eurow z komunalneje pawšale Sakskeje. Kaž Budyski financny měšćanosta dr. Robert Böhmer rjekny, bě zhromadne dźěło mjez městom a cyrkwjomaj jara płódne. Tak su křiž nětko we wobłuku ekume­niskeje nutrnosće poswjećili.

Do štoma zajěł

Rakecy. Póndźelu popołdnju je wodźer VWja Caddy na zwjazkowej dróze B 96 mjez Rakecami a Budyšinom w křiwicy z awtom z dróhi zjěł a do štoma zrazył. W jězdźidle zatłusnjeneho šofera dyrbješe wohnjowa wobora z ćežkej techniku wuswobodźić. Z helikopterom dowjezechu jeho wuchowanske mocy do kliniki. Wohnjowej woborje z Rakec a Njeswači­dła stej ze 37 kameradami na městnje pomhałoj. Zwjazkowa dróha bě něhdźe hodźinu za zjawny wobchad dospołnje zawrjena.

Puć zrunany za přihot infrastruktury a medije při Hórnikečanskim jězoru

Łaz (AK/SN). Gmejna Łaz prócuje so dale zaměrnje wo to, towarstwowe žiwjenje kaž tež turizm při Hórnikečanskim jězoru zaso wožiwić. K tomu je so tamniša gmejnska rada na swojim minjenym pose­dźenju jasnje wuznała. Tak gremij jednohłósnje wobzamkny, přepodać nadawki za infrastrukturne wotkrywanje towarstwoweho centruma při južnym přibrjohu Hórnikečanskeho jězora njedaloko Koblic (Koblenz) a Wulkich Ždźarow (Groß Särchen). Nadawk dósta Budyska wotnožka firmy Strabag. Cyłkowne kóšty za nadawk wučinjeja 1 081 000 eurow. Hłowne ćežišćo nadawka je wot­krywanje za pitnu wodu a wopłóčki, za dróho­twar kaž tež krajinotwar.

Zańdźeny pjatk běše zaso tak daloko, dźěl hornjołužiskich baćonow dósta pjeršćenje, hačrunjež njeběše přijomne wjedro. Wjacore šwihele běchu k tomu wjedli, zo akterojo kaž młodźata chětro zmoknychu, kaž je to na wobrazu widźeć. Wšitko pak ničo njepomhaše, ornitologa Stefan Siegel, kiž tele dźěło hižo wjacore lěta tu pola nas wukonja, bě ekstra z Zschopauwa přijěł. Tež wotpowědna technika, kotruž firma Lift Manager kóžde lěto sponseruje, bě na městnje.

Prěnja stacija bě Komorow pola Klukša. Dale dźěše mjez druhim přez Šćeńcu (Steinitz) a Komorow pola Rakec do Ralbic. Tamniši porik baćonow běše hižo w zańdźenych lětach jedyn z najproduktiwnišich, štož dorost nastupa. Lětsa měješe samo pjeć młodźatow. Na přichodnych stacijach, kaž w Sernjanach, Nuknicy a Chasowje, běchu jich tři młodźata. Dohromady su 34 młodych baćonow na jědnaće městnach wopjeršćenili. Bohužel njemějachu wjac pjeršćenjow k dispoziciji, dokelž bě so dźěl skazanych mjez Finskej a Němskej zhubił.