Přihotuje lód na njezwučene wašnje
Wustawki změnili
Bukecy (CS/SN). Druhu změnu wustawkow wo wotwodźowanju wopłóčkow su čłonojo Bukečanskeje gmejnskeje rady na swojim zašłym posedźenju wobzamknyli. Po změnje rozrosće zakładny popłatk na bydlensku jednotku nětko na dźesać eurow. Za kubikny meter wopłóčkow změja wobydlerjo přichodnje 2,79 eurow płaćić.
Změnili su radźićeljo tež wozjewjenske wustawki. Po nich budu zjawne informacije jenož hišće digitalnje wozjewja. Plany, ležownostne karty, rysowanki a podobne pak móža sej zajimcy po potrjebje na gmejnskim zarjedźe wobhladać. Digitalne hamtske łopjeno chcedźa tohorunja na zarjedźe w ćišćanej formje wupołožić. Dołhož pak tydźenik „Mitteilungsblatt“ hišće wuchadźa, chcedźa terminy z Bukečanskeje gmejny tež tam wozjewić.
Dalši dypk wuradźowanja bě stawnica. Marion Zimmermann z Wósporka, kotraž tule funkciju za Wóspork a za Bukecy wukonja, dyrbjachu radźićeljo wobkrućić. Dokelž w Malešecach tuchwilu žana stawnica njeskutkuje, dyrbja tam jeje dźěło sobu přewzać.
Dźěći smědźa so wjeselić
Pančicy-Kukow (SN/MWj). Nimale połtřeća lěta po dotwarje noweho horta w Pančicach-Kukowje dyrbjachu holcy a hólcy na zelenu łuku za swojim twarjenjom hladać. Hrajkanišćo tam mjenujcy dotal pobrachowaše. To so nětko změni. Za nje bě na wčerawšim Mjezynarodnym dnju dźěsća symboliski prěni zaryw. Hromadźe z někotrymi hortowymi dźěćimi wobstarachu to předsydka Křesćansko-socialneho kubłanskeho skutka (CSB) Marja Michałkowa, jednaćel Peter Neunert, předsydka staršiskeje přirady pěstowarnje Katrin Piller, zamołwity CSB za pěstowarnje Ronny Škoda, nawodnica pěstowarnje Petra Bačcyna a mějićel zawoda „Gartenart“ Měrćin Kral, kiž nowe hrajkanišćo hač do lětušeho oktobra natwari. Wjesnjanosta Pančic-Kukowa Markus Kreuz (CDU) zranjenja dla bohužel pódla być njemóžeše.
Archiw zaso přistupny
Budyšin. Jeli incidenca korony dla w Budyskim wokrjesu dale stabilnje pod 100 wostanje, ma archiwny zwjazk wot 7. junija zaso wužiwajomny być. Přistupne pak budu najprjedy jenož akty statneho filialneho archiwa. Akty měšćanskeho archiwa njehodźa so twarskeje naprawy dla wužiwać. Zajimcy měli so na kóždy pad do toho přizjewić (archivverbund @bautzen.de), dokelž maja na čitanskej žurli dale jeno tři městna. Škitne naprawy maja ludźo wobkedźbować, negatiwny koronatest pak trěbny njeje.
Šlagrowa nóc přestorčena
Njeswačidło. Za 10. julij planowanu šlagrowu nóc w Njeswačidle korony dla na 25. september přestorča. Kaž organizatorojo z Njeswačanskeho sportoweho towarstwa a domizniskeho towarstwa zdźělichu, chcedźa potom tepjeny stan stajić. Loni bě šlagrowa nóc wupadnyła.
W přihotach na wólby
Prazwěrjenc zaso wočinja
Woblubowane swójbne wočerstwjenišćo wabi z nowymi atrakcijemi
Mały Wjelkow (SN/MWj). Dołhi čas nanuzowaneho čakanja je skónčnje nimo. Zajutřišim, pjatk, Małowjelkowski prazwěrjenc zaso wopytowarjow wita. „Hač do spočatka nowembra móža so wulcy a mali wopytowarjo na časowu jězbu wot spočatka žiwjenja na zemi hač k hoberskim gigantam podać“, wjeseli so Volker Bartko, jednaćel wobdźělenskeje a wobhospodarjenskeje towaršnosće (BBB), kotraž so nimale 20 lět wo prazwěrjenc sobu stara. Prěni kónc tydźenja móža hosćo nětko z Dirkom Hübnerom kreatiwne dopomnjenki paslić a sej je wězo sobu domoj wzać.
Bytostny dypk we wjesnym wobrazu
Na Mjezynarodnym dnju dźěsća móže lědma rjeńšeho termina być, hač nowe hrajkanišćo swojemu zaměrej přepodać. Tak su w Ćisku pola Wojerec wčera móhłrjec wšitko zjednoćili.
Ćisk (AK/SN). Na nawsy w Ćisku napřećo Ćišćanskemu statokej móža so dźěći wot wčerawšeho na nowym hrajkanišću „Lutki“ wucychnować. „Sydom lět smy jako wjesna rada wo nje wojowali. Dotalne hrajkanišćo z lěta 1996 dźeń a bóle rozpadowaše. Tohodla so nad nowym wuhotowanjom jara wjeselimy“, praji wjesny předstejićer Jens Zahrodnik wčera składnostnje dnja dźěsća k wotewrjenju. Z małym programom su chowancy Ćišćanskeje pěstowarnje „Lutki“ wobydlerjow, zastupjerjow města Wojerec a wobdźělenych firmow zawjeselili.
Wotchadnicy Běłowodźanskeje wyšeje šule „Bruno Bürgel“ a ...
Wulki rozdźěl
Krótkopowěsće (02.06.21)
Incidenca zaso pod połsta
Budyšin. Budyski krajnoradny zarjad je dźensa w twarjenju na Tuchorskej 23 prěnje z připowědźenych městnow k wobkrućenju dospołneho šćěpjenskeho statusa pře koronu wotewrěł. Za to je trjeba sej termin w interneće wobstarać. We wokrjesu bě hač do wčerawšeho pjeć natyknjenjow. Incidenca po RKI je dźensa 45,0. Wokrjes Zhorjelc wozjewi wčera 14 infekcijow a pjeć smjertnych padow. Incidenca tam wučinja po RKI dźensa 37,6.
Nowy nawoda běrowa
Wrócław. Thomas Guddat nawjeduje wot wčerawšeho zwjazowacy běrow Sakskeje we Wrócławju. 1960 w Stuttgarće rodźeny Guddat je wjelelětny čestnohamtski předsyda Němsko-pólskeho zjednoćenstwa sudnikow. Za swój angažement wo njewotwisnosć pólskeje justicy spožči jemu Krajna rada prawnistwa lěta 2017 medalju „Meritorius for Justice – Bene Merentibus Iustitiae“.
Wo prawicarskim ekstremizmje
Policija (01.06.21)
6 000 eurow w spódnich cholowach
Wóspork. Bjez dowolnosće w Němskej dźěłał bě muž z Ukrainy, kotrehož je zwjazkowa policija předwčerawšim dopołdnja w busu na awtodróze A 4 pola Wósporka lepiła. Wuprajenja 43lětneho, što je w Němskej činił a dokal chce, so spřećiwjachu. Při kontroli namakachu na to 6 000 eurow, kotrež měješe Ukrainjan w spódnich cholowach schowane. Wot toho policisća 400 eurow sćazachu a kazachu mužej domoj jěć. Přiwšěm hišće chłostanske jednanje na njeho čaka.
Wobšudnicy 70 000 eurow wulišćili
Žitawa. Njeznaći su minjeny štwórtk w Žitawje rentnarskimaj mandźelskimaj 70 000 eurow wulišćili. Při telefonje jimaj wěsty „knjez Meier“ napowěda, zo běštaj dźowka a přichodny syn wobchadne njezbožo zawiniłoj, při kotrymž je so dźěćo ćežko zraniło. Mandźelskaj měještaj wšě swoje nalutowane pjenjezy jako kawciju přewostajić, zo njebyštaj „zawinowarjej“ do jastwa dyrbjałoj. Pozdźišo přińdźe „knjez Kowalski“ k rentnarjomaj, wotewza pjenjezy a so z nimi zhubi. Wšón čas njejsu njeznaći jeju wot telefona pušćili.
