Krótkopowěsće (20.05.21)
Serbske pjenjezy schwalene
Drježdźany. Sakski krajny sejm je wčera nawječor etat statneho ministerstwa za wědomosć, kulturu a turizm 2021/ 2022 wobzamknył. Po tym je „serbski“ hornc swobodneho stata lětsa z 8,492 milionami eurow a klětu z 8,015 milionami pjelnjeny. Su to srědki Załožbje za serbski lud, za inwesticije a lětuše Zejlerjowe myto. Dwójny etat je parlament dźensa dopołdnja doskónčnje schwalił.
Druhi dźeń pod hódnotu 100
Budyšin. Budyski wokrjes je wčera wo 144 nowych natyknjenjach z koronawirusom informował, mjez nimi je 72 dodatnych přizjewjenjow PCR-testow minjenych dnjow. Tudyša incidenca wučinja po RKI dźensa 75,4. Budyski wokrjes je tuž druhi dźeń za sobu pod hódnotu 100. W Zhorjelskim wokrjesu wozjewichu wčera ličbu 78 infekcijow, šěsć zwisuje z korekturu statistiki. Incidenca tam je po RKI dźensa 93,0.
Žana nóc bajow
Při Holešowskim haće zaso spěwate ptački zwěsćeja
Holešow (SN/MWj). Njeswačanska přirodoškitna stacije přewjeduje tuchwilu při Holešowskim haće zaso tak mjenowany monitoring spěwatych ptačkow. Za to ma hač do kónca awgusta dohromady dwanaće terminow, na kotrychž da při haće wulke saki nastajeć, do kotrychž ptački lětaja. Při njedawnej prěnjej akciji popadnychu cyłkownje 46 ptačkow. Z nich dósta 34 prěni raz rynku na nóžku tyknjenu, dwanaće ptačkow tajku rynku hižo měješe, dokelž běchu je w zašłosći hižo raz popadnyli, zdźěli Cornelia Kobalz z přirodoweje centrale Budyskeho wokrjesa. Mjez zwěsćenymi družinami běchu mały rokotak (Teichrohrsänger), sknadźik (Goldammer) a sykorka (Meise). Wot lěta 2018 so spěchowanske towarstwo Njeswačanskeje ptačernje na cyłoněmskim projekće wobdźěla.
Ručež słónco schadźa, přirodoškitarjo ptački ze sakow bjeru, zo bychu mjez druhim jich družinu a splah zwěsćili. Ptački dóstawaja swoju rynku a móža skónčnje zaso wotlećeć. Hdyž pozdźišo tele ptački na samsnym abo hinašim městnje znowa popadnu, hodźi so z toho wuwiće wěsteje populacije wotwodźeć.
Policija (19.05.21)
Za pěstowarnju a bydlenja
Bywšu kupjel chcedźa zmysłapołnje wužiwać
Łaz (AK/SN). Rozsud Łazowskeje gmejny z 9. měrca 2010 bě bolostny. Kupjel njedaloko Małeje Sprjewje dyrbjachu zawrěć. Přewulka bě kóždolětna přiražka z gmejnskeje kasy. Nimo toho bě konkurenca łužiskeje jězoriny přesylna. Za dalše wužiwanje kupjele bě wjacorych idejow, zwoprawdźili žanu z nich njejsu. „Kupjel pod dźensnišimi wuměnjenjemi wožiwić njeje móžno. Tohodla chcu nětko koncept za dalše wužiwanje nastorčić. Předstajić móhł sej wjacegeneraciski kompleks z pěstowarnju, dnjowym hladanjom a bydlenjemi z wobstajnym hladanjom“, rozłoži Łazowski wjesnjanosta Thomas Leberecht (CDU) na zašłym posedźenju gmejnskeje rady. Po jeho słowach trjebaja poskitki za młode swójby, nimo toho dyrbja na staršu generaciju myslić. Jako zakład by so něhdźe 19 000 kwadratnych metrow wulki teren bywšeje kupjele derje hodźał.
Radźićeljo so schadźuja
Jedyn dźeń před kameru stać
Turistiski zwjazk Łužiska jězorina pyta domoródnych, kotřiž chcyli raz jako fotowy model skutkować. Z fotografijemi chcedźa za jězorinu w brošurach a socialnych syćach wabić.
Zły Komorow (SN/MWj). Za nowe fota pyta turistiski zwjazk Łužiska jězorina ludźi z regiona, kotřiž rady před kameru steja a maja lóšt, so jedyn dźeń jako fotowy model na wšelakich městnach jězoriny fotografować dać. Za to pytaja aktiwne pory w starobje wot 40 lět a starše, swójby z dźěćimi w starobje třoch do 14 lět kaž tež dźědow a wowki z wnučkami w starobje třoch do dźesać lět. Nazhonjenja z fotografowanjom njejsu trěbne. Skerje měli zajimcy přirodnje wustupować a žadyn strach před kameru njeměć. Fotografować chcedźa jich w typiskich dowolowych situacijach, kaž na přikład na přibrjoze, při kolesowanju abo padlowanju, při wopyće w muzeju abo kofejowni a w podobnych situacijach.
W Pančicach-Kukowje su poněčim kontury spóznajomne, w kotrej ...
Za mnohotnosć Łužicy so zasadźeli
Krótkopowěsće (19.05.21)
Ministerka Giffey wotstupiła
Berlin. Po diskusijach wo móžnym wotpóznaću doktorskeho titula je zwjazkowa swójbna ministerka Franziska Giffey dźensa wotstupiła. Kaž jeje ministerstwo zdźěli, bě Giffey zwjazkowu kanclerku Angelu Merkel (CDU) prosyła, ju ze zastojnstwa pušćić. Giffey je wot lěta 2018 swójbna ministerka a wot lońšeho předsydka Berlinskeje SPD. Wona kandiduje za wyšu měšćanostku stolicy.
Wot jutřišeho click & meet
Budyšin. Podkročeneje ekstremneje hódnoty koronainfekcijow dla smědźa w Budyskim wokrjesu wot jutřišeho štwórtka dotal zawrjene wobchody zaso za kupcow z terminom a dnjowoaktualnym negatiwnym testom (click & meet) wotewrěć. We wokrjesu zličichu hač do wčerawšeho jědnaće natyknjenjow a jedyn smjertny pad. Incidenca po RKI je dźensa 58,0. Wokrjes Zhorjelc rozprawješe wčera wo 88 infekcijach a štyrjoch zemrětych, incidenca tam je dźensa 102,1.
Nowy blog Domowiny
