Jejka lětsa njedebja
Njebjelčicy. Tak kaž so lětsa žane jutrowne wiki njewotměja, dyrbja tež debjenje jutrownych jejkow wotprajić, kotrež su hewak na mnohich městnach přewjedowali. K tomu słuša tež wóskowanje jejkow z Marju Šefrichowej w Njebjelčicach. Kaž tamniše gmejnske zarjadnistwo zdźěli, stanje so tele zetkanje z woporom koronoweje pandemije. Wšitkim, kotřiž chcedźa so přiwšěm sami w debjenju jutrownych jejkow pospytać, poručeja sej w Njebjelčanskim wjesnym wobchodźe za to trěbne utensilije wobstarać.
Wupožčowanje dale móžne
Budyšin. Lockdowna dla je Budyska měšćanska biblioteka drje dale zawrjena, přiwšěm móža sej tam zajimcy dale knihi, filmy, CDje, časopisy a dalše medije wupožčować. Na internetnej stronje biblioteki, hdźež je wšón bohaty poskitk widźeć, hodźi so kniha, zynkonošak atd. telefonisce abo e-mailnje skazać a k dojednanemu terminej wotewzać. Kak to wšo funguje, zhonja zajimcy pod www.stadtbibliothek-bautzen.de.
Policija (11.03.21)
Třělby kradnyli
Mikow. Njewšědnu rubiznu wupytali běchu sej njeznaći minjene dny w Mikowje (Mücka). W času wot pjatka popołdnja hač do wutory ranja zadobychu so tam do bydlenskeho domu. Přepytawši wšitke rumnosće pak njejsu pjenjezy abo debjenki sobu wzali, ale tři třělby w cyłkownej hódnoće něhdźe 3 000 eurow. Jako wotpowědny kamor namócnje wočinichu, načinichu nimo toho něhdźe 2 000 eurow wěcneje škody.
Drogi namakali
Kamjenc. Podhladneho kolesowarja chcychu policisća předwčerawšim wječor na Wojerowskej dróze w Kamjencu kontrolować. Tón drje najprjedy ćekny, dźakowano pokiwam wobydlerjow pak jeho pozdźišo w bydlenju znateho hromadźe z dalšimaj mužomaj lepichu. Tam wuhladachu zastojnicy na blidźe wjacore titki marihuany. Tak hišće dalšej bydleni w Lessingowym měsće přepytachu, hdźež su tohorunja drogi, zapakowanski material a za to trěbne utensilije zwěsćili. Wšitko to kaž tež mobilny telefon a kontowe wućahi policisća sćazachu. Wšitcy třo změja so nětko přeńdźenja přećiwo zakonjej wo wopojnych srědkach sudnisce zamołwić.
Sušak so palić započał
Mjenje hary za wobydlerjow
Wojerecy/Kinajcht (AK/SN). Přez měšćanski dźěl Kinajcht (Kühnicht) na wuchodźe Wojerec nima přichodnje hižo přechodowy wobchad jězdźić. Na to měri so zdźěłany twarski plan „Kinajchtska sponka“. Loni 25. februara bě Wojerowska měšćanska rada wobzamknyła móžnosć pruwować. Na jeje zašłym posedźenju je wyši měšćanosta Torsten Ruban-Zeh (SPD) wo aktualnym stawje projekta porěčał. „Kinajchtska dróha twori z Hasu Marje Grólmusec srjedźnu a tak centralnu wósku mjez Wojerecami-Nowym městom z nowej wobjězdku a Šibojskim jězorom“, wón rozłoži. „Z dozhotowjenjom wobjězdki B 96 bu wobchad do města přepołoženy, wot čehož běše Kinajchtska dróha wosebje potrjechena, hačrunjež je jeje twarski staw špatny. Nimo toho je tam městno za jězdźenje wobmjezowane.“ Z toho wurostuja wulke njedostatki za wobchadnu wěstotu pěškow a kolesowarjow. Za wobydlerjow nastawaja přidatne wobćeženja střasenja a hary dla.
Zwěrjenc póndźelu zaso wotewru
Wojerecy (SN/MWj). Po 134 dnjach zawrjenja budźe Wojerowski coo wot póndźele, 15. měrca, za wopytowarjow zaso wočinjeny. „Wjeselimy so wopytowarjow skónčnje zaso po zwěrjencu so wuchodźować widźeć. Zwěrjata a sobudźěłaćerjo dyrbjachu dołho na to čakać. Wosebje nas raduje, zo móžemy swójbam po ćežkich měsacach wotměnu, wjeselo a wočerstwjenje skićić“, powěda nawoda zwěrjenca Eugène Bruins.
W Kromolanskim parku pokročuja ze saněrowanjom Rakocec jězora. ...
Krótkopowěsće (11.03.21)
Sadźeja na lěkarske praksy
Budyšin. 1 339 ludźi wobdźěli so na masowym tesće we Wojerecach, při čimž zwěsćichu štyri pozitiwne pady. Nastupajo šćěpjenje ludnosće pře koronu sadźa Budyski krajnoradny zarjad na praksy domjacych lěkarjow, nic na dalše lokalne šćěpjenske centrumy. Wčera rozprawjachu z wokrjesa Budyšin wo 61 koronanatyknje- njach a wo incidency 93,6. RKI poda dźensa 74,4. Wokrjes Zhorjelc wozjewi 61 nowoinfekcijow a indicencu 97,73. Po RKI je tamniša incidenca dźensa 88,6.
Dalši dohlad dóstał
Budyšin. Z předsydu Domowiny Dawidom Statnikom je Budyski superintendent Tilmann Popp wčera rjad rozmołwow dale wjedł, kotryž bě z nastupom zastojnstwa před połdra lětom zahajił. Wuměna myslow słužeše mjezsobnemu zeznaću. „Mi bě to połdrahodźinska spomóžna rozmołwa a dalši dohlad do toho, što Serbow tuchwilu jima“, zdźěli superintendent našemu wječornikej.
Kedźbu před „asfaltowarjemi“
Policija (10.03.21)
Wjelkow dla so nabojeli
Sepicy. Za třoch dyrdomdejnikow skónči so předwčerawšim wječor geocachingowy wulět na wojerskim zwučowanišću w Sepicach (Schwepnitz) z přizjewjenjom pola policije. Mužojo w starobje 24 do 33 lět běchu tam ze swojimi techniskimi nastrojemi po puću a za wěstymi dypkami w krajinje pytachu. Kaž woni pozdźišo rozprawjachu, słyšachu w bliskosći wjelki ruć. Z toho so woni mócnje nabojachu, njezwěrichu sej hižo wróćo k awtu a su radšo policiju zazwonili. Zastojnicy Kamjenskeho policajskeho rewěra nańdźechu trójku strowu a čiłu, ale wjelki tam žane njewuhladachu. Dokelž pak je na wojerskim zwučowanišću přebywać zakazane, změja so geocachingarojo nětko mylenja domoweho měra dla zamołwić.
Biblioteku zaso wočinja
Kamjenc (SN/MWj). Wot póndźele, 15. měrca, Kamjensku Lessingowu biblioteku za publikum zaso k zwučenym časam wočinja. Pytać za kmanej knihu budźe potom runje tak móžno kaž so přizjewić abo popłatk zapłaćić. Kaž nawodnica Marion Kutter zdźěli, so zajutřišim, pjatk, awtomatiske podlěšenje wupožčenych medijow skónči.
Jako městnosć přebywanja a komunikacije njebudźe biblioteka hišće wužiwajomna. Tež zarjadowanja so žane njewotměja. Wopytowarjo dyrbja swój přebytk na minimum redukować, medicinski nahubnik wužiwać kaž tež předpisy wotstawkow a hygieny dodźeržeć. Zo njeby přewjele ludźi naraz w bibliotece było, dóstanje kóždy wopytowar korbik. Nimo toho ma wón wosobinske daty zawostajić, štož móže k čakanskim časam wjesć. Dyrbjała-li incidenca zaso stupać, dyrbja biblioteku krótkodobnje zaso zawrěć.
Znowa nachribjetniki pjelnili
Budyšin (CS/SN). Mjeztym hižo pjatnaty raz přewjeduja tuchwilu nachribjetnikowu akciju ewangelskeho cyrkwinskeho wobwoda Budyšin/Kamjenc za partnerski wobwod Meru w Tansaniji. Byrnjež lětuše wobstejnosće koronapandemije dla trochu wobćežniše byli, su wěriwi z wjacorych wosadow kaž tež dźěći ze šulow a pěstowarnjow něhdźe 3 000 šulskich nachribjetnikow napjelnili.
Wosebje wuzběhnyć smě so Serbska zakładna šula Budyšin. Tam su hižo krótko po zahajenju akcije 11. nowembra 2020 na wšěch 76 nachribjetnikow spakowali. Dalše tysac nachribjetnikow móžachu dźakowano pjenježnym daram kupić a pjelnić. Kóžda toboła wobsahuje šalku, taler, łžicu kaž tež trjenjo, zešiwki a wšelake pisaki.
Nachribjetniki dowjezechu minjene dny do bróžnje w Smochćicach. Dźesać dobrowólnych pomocnikow spakowa je tam do přećahowanskich kartonow. Něhdy běchu za to bananowe kisty wužiwali. To pak hižo dowolene njeje, dokelž mějachu wone dźěrki za přewětrjenje. Nowe kartony je nětko přećahowanska firma Gäbler ze sprjewineho města sponserowała.
