Z plakatami na štomach we wobłuku Budyskeje Paulijoweje mnozy wobydlerjo dale přećiwo tomu protestuja, zo ma so wjetšina štomow podrězać. Spočatk januara je twarski wuběrk města Budyšin wobzamknył, planowanje wo zakładnym wutwarje dróhi dale wjesć.
Budyšin (SN/MiR). Prěnje trěbne pruwowanja wobstejnosćow za wutwar dróhi běchu wčera dopołdnja připowědźene, a tak bě tež wotrězk Paulijoweje zaraćeny a parkowanje wobmjezowane. Tola w tym wobłuku za parkowanišćom pytacy njetrjebachu dołho čakać. Wšako běše přepruwowanje hižo w rańšich hodźinach zakónčene. Fachowcy wobhladachu sej na testowej jězbje křižowanišćo Paulijowa/Ericha Pfaffowa. Tam su při bokach jězdneje na křižowanišću prowizorisce markěrowali, kak ma kroma chódnika pozdźišo wjesć.
Budyšin (SN). Swobodny stat Sakska je z nowym škitnym postajenjom korony dla zakaz alkohola noworjadował. Budyski wokrjes je na to reagował. Kaž krajnoradny zarjad informuje, wostanje alkohol pić w zjawnosći dale zakazane na městnach, kotrež je wokrjes definował. Po tym zo su komuny wotpowědne městnosće pomjenowali, je Budyski wokrjes wčera nowy powšitkowny wukaz wozjewił. Njewotwisnje wot podatych lokalitow – te leža w Budyšinje, hdźež su to tuchwilu Žitne wiki, Butrowe wiki, Bohata, Hłowne torhošćo, Drjewowe wiki a Walske zelenišća, w Kamjencu a Njedźichowje – płaći zakaz zdobom na wšitkich busowych zastanišćach, dwórnišćach, torhošćach a tankownjach kaž tež před zachodom wobchodow wulko- a drobnowikowanja inkluziwnje k tomu słušacych parkowanišćow a parkowanskich domow. We Wojerecach su Łužiske naměsto postajili, wobkrući tamniša radnica na naprašowanje.
Nowy powšitkowny wukaz je dźensa płaćiwosće nabył, a to nachwilnje wobmjezowanje hač do 14. februara w 24 hodź.
Předsydstwo dźěłać započało
Chrósćicy. Nawodnicy dźěćacych dnjowych přebywanišćow w nošerstwje Serbskeho šulskeho towarstwa su wčera w Chróšćanskej „Jednoće“ nowe předsydstwo SŠT zeznali. Kubłarki a kubłarjo rozłožichu ramikowe wuměnjenja za skutkowanje kubłanišćow. Fachowa poradźowarka Kerstin Šołćina předstaji swój wobłuk, w kotrymž wot spočatka měsaca dźěła.
Niwow infekcijow spaduje
Budyšin. 69 koronanatyknjenjow zwěsćichu wčera w Budyskim wokrjesu. Dalšej pacientaj staj zemrěłoj. Kaž krajnoradny zarjad dale zdźěli, je wot 596 schorjenych wosobow (+3) 154 (-10) w chorowni. Tudyša incidenca wučinja 135,33. We wokrjesu Zhorjelc zličichu wčera 84 dalšich infekcijow a 17 smjertnych padow. Incidenca tam je 134,53.
Serbsce w sto sekundach
Baćona w zymje wuhladać? Haj, w Hornjej Łužicy na Hušćanskim kuble Sommereichen to wšědnje móžemy. Ale blisko wón nikoho njepušći a hnydom ćeknje. Wšako jedna so wo dźiwjeho ptaka. Starosćić so wo njeho přiwšěm njetrjebamy. Ptak ma pjerja, kotrež jeho wohrěwaja. Nimo toho tež někotre dny bjez cyroby wuńdźe. Je-li pak wonka wšitko zamjerznjene abo sněh leži, dóstawa baćon w Husce dźeń stare ćipki. Dźakowano swójbje Busch, kotraž wjele prócy a kóštow nałožuje, móže wón derje žiwy być.
Přespěšnje a pod drogami jěł
Wojerecy. We wobłuku kontrole spěšnosće su policisća předwčerawšim na Kinajchtskej dróze we Wojerecach pod wliwom drogow stejaceho šofera lepili. Hdźež je tempo na 30 km/h wobmjezowane, zadźeržachu wodźerja transportera, kiž bě 16 km/h přespěšnje po puću. Zastojnicy přewjedźechu pola 32lětneho drogowy test, kotryž je pozitiwje na amfetaminy reagował. Tuž njezměje so muž nětko jeničce přespěšneho jězdźenja dla zamołwić, ale tež wodźenja awta pod wliwom wopojnych srědkow dla, kaž policija w swojej rozprawje pisa.
Smochćicy (SN/MWj). Kaž so za čas koronapandemije nimale wšo a wšitko internetnje wotměwa, tak lětsa tež ekumeniski póstny seminar Smochčanskeho kubłanišća swjateho Bena online přewjedu. Kaž z nowinskeje zdźělenki kubłanišća wuchadźa, rěka lětuše hesło „Swoboda a zamołwitosć křesćanskeho čłowjeka – kak móžemy zhromadnje žiwi być?“ Runja minjenym lětam wotměje so seminar po třoch póndźelach stajnje w 19.30 hodź. a zahaji so 22. februara. Prěni referent budźe Harald Lamprecht, społnomócnjeny ewangelskeje krajneje cyrkwje za prašenja swětonahlada a sekty a jednaćel Ewangelskeho zwjazka Sakskeje. Jeho přednošk wěnuje so prašenju „Hdźe smy poprawom žiwi?“.
Slepo (AK/SN). W Slepjanskej zakładnej šuli „Dr. Marja Grólmusec“ zwěsćeja za přichodne šulske lěto 2021/2022 wjele naprašowanjow a wulku ličbu přizjewjenjow. To zdźěli wjesnjanosta Jörg Funda (CDU) na wčerawšim posedźenju tamnišeje gmejnskeje rady. „Wulki zajim překroča dwučarowosć“, wón rozłoži. „Spočatk januara smy k naležnosći widejokonferencu z krajnym zarjadom za šulu a kubłanje přewjedli. Tam so jasnje wujewi, zo krajny zarjad žanych přidatnych wučerjow njepřizwoli. Nimo toho nima šula žane dźěći z Braniborskeje, kaž na přikład z Lěska (Lieskau) pola Grodka, přiwzać.“ Stawiznisce pak słuša Lěsk k wosom wsam Slepjanskeje wosady, štož měli po słowach gmejny sobu wobkedźbować. „Rozmyslujemy wo tym, w přichodnym šulskim lěće třeću rjadownju 1. lětnika wutworić“, Jörg Funda podšmórny. „Krajny zarjad drje to wotpokazuje, chcemy pak so wo rozrisanje prócować.“
Kamjenc (jwo/SN). Serbam, kotřiž so tele dny w Kamjenskim šćěpjenskim centrumje pře koronu šćěpić dadźa, móže so stać, zo jeho tež serbsce narěča. 26lětny Daniel Nuk z Radworja skutkuje tam wot spočatka januara jako pomocnik Němskeho čerwjeneho křiža (DRK). To ma móhłrjec dwě přičinje. Jónu su wón a jeho staršej loni nazymu sami na koronu schorjeli. „Tehdy sej wuwědomich, zo njeje to někajka jednora zymica, ale wjele chutniša naležnosć“, měni młody muž. Nimo toho bě wón nazymu swój studij mjezynarodneho financneho managementa zakónčił. Dokelž je z požadanjemi wo dźěłowe městno wšitko dlěje trało, hač bě sej to předstajił, přizjewi so Daniel pola DRK a je nětko wšědnje w Kamjencu zasadźeny. Dokelž dźěła skerje w serwisowym wobłuku, tam žane medicinske wukubłanje njetrjeba.