Krótkopowěsće (20.01.21)
Zaso wjace natyknjenjow
Budyšin. Ličba koronanatyknjenjow w Hornjej Łužicy zaso přiběra. W Budyskim wokrjesu su wčera 188 dalšich infekcijow a dwanaće smjertnych padow zwěsćili. Wot 1 115 schorjenych (+22) lěkuja 132 (-28) w chorowni. Tudyša incidenca wučinja 306,33. Zhorjelski wokrjes je wčera wo 91 nowonatyknjenjach a třoch smjertnych padach informował. Incidenca tam je 238,99.
NSLDź chce 1. apryla wotewrěć
Budyšin. Němsko-Serbske ludowe dźiwadło Budyšin přihotuje so na wotewrjenje 1. apryla. To su intendant Lutz Hillmann, Budyski krajny rada Michael Harig (CDU) a zamołwita přirjadnica Birgit Weber rozsudźili. Tak planuja premjerny kónc tydźenja k jutram, a to zeleny štwórtk z marionetowej inscenaciju „Das Märchen von der Salzprinzessin“ a z předstajenjom „Čmjeła Hana chce na dowol lećeć“.
Zeleny tydźeń digitalny
Policija (19.01.21)
Lulu zaso w zwěrjencu
Běła Woda. Njewšědny pad padustwa, kiž bě so loni w awgusće w Běłowodźanskim zwěrjencu stał, je nětko wujasnjeny. Tehdy běchu so tam njeznaći zadobyli a nukla Lulu pokradnyli. Sančka měješe runje młodźata a njemóžeše je na to hižo zastarać. Na zbožo to sobudźěłaćerjo pytnychu, tak zo małe nukle přežiwichu. Lulu pak bě najprjedy raz fuk. We wobłuku přepytowanjow koncentrowachu so kriminalisća na 21lětneho muža a 22lětnu žonu. Na přikaz sudnistwa přepytachu minjeny pjatk jeju bydlenje, hdźež su pokradnjenu sančku namakali. Sobudźěłaćerka zwěrjenca ju cyle jasnje jako Lulu identifikowaše a móžeše ju wša zbožowna sobu wzać.
Dobre wuměnjenja z tójšto sněhom
Bjez hłowneje zhromadźizny
Chrósćicy. Předsydstwo bratstwa swjateho Bosćana přeproša wšitkich na swjedźeń swjateho Bosćana jutře, 20. januara, do Chrósćic. Bože mšě budu w 7 hodź., 9 hodź. a 19 hodź. Swjedźenski nyšpor budźe w 14 hodź., ale bjez procesiona po wsy. Hłowna zhromadźizna čłonow bratstwa tón dźeń njebudźe. Dźensniše zhromadne modlenje na krutym póstnym dnju na wsach aktualnych postajenjow korony dla móžne njeje. Tohodla měli so wšitcy doma modlić. Wěriwi ze wšitkich serbskich wosadow su přeprošeni, do bratstwa swjateho Bosćana zastupić. Štóž chcył so z čłonom bratstwa stać, njech so na Chróšćanskej farje přizjewi, a to pod telefonowym čisłom 035796/ 80 400.
Film wo putnikowanju widźeć
Dyrbja plan busow přestajić
Budyšin (SN). W Budyskim wokrjesu dyrbja plan busowych linijow korony dla přestajić a jón prózdninam přiměrić. Zymske prózdniny je Sakska w zwisku ze škitnymi naprawami koronapandemije dla skrótšiła a zdobom jich časowy wobłuk změniła. Połlětne šulske prózdniny započnu so tuž 1. februara a skónča so 5. februara. Za to budu jutrowne prózdniny dlěše. Wone započnu so potom hižo 29. měrca a kónča tak, kaž je dotal planowane, 9. apryla.
Budyski wokrjes je změny w busowym planje mjenowanym terminam přiměrił. Hač do 31. januara płaći plan za šule, wot 1. do 7. februara tón za prózdniny. Wot 8. februara maja šulske busy jězdźić a wot 29. měrca do 11. apryla płaći prózdninski plan, potom zaso šulski.
Wo poskitku busowych jězbnych planow w prózdninach informować móža so zajimcy na internetnej stronje předewzaćow VVO a ZVON kaž tež na busowych zastanišćach.
Za wšo docpěte dźakowni
Do šulow, dróhow a dobrowólneje wohnjoweje wobory inwestowali
Hamor (AK/SN). Z 18 wjesnymi dźělemi a 217 kwadratnymi kilometrami je Hamor po płoninje najwjetša gmejna Sakskeje. „2020 bě lěto z mnohimi nowymi wužadanjemi“, bilancuje wjesnjanosta Achim Junker (CDU). „Nam wšitkim měło to pokazać, zo čłowjek stajnje wšitko w horšći nima a zo měli dźakowni za to wšo być, štož přeco hišće mamy.“
Wotkryć móžeše gmejna teren twarskeho plana Klětno-Jazowa při Bjerwałdskim jězoru. W Hamorje přihotowachu bydlensku štwórć při Hasy přećelstwa. Tam maja bórze jednoswójbne domy nastać. Dale saněrowali su Hamorsku zakładnu šulu, w kotrejž dźěše předewšěm wo wohnjoškit. Ponowili su tohorunja někotre kolesowanske šćežki, mjez druhim na Wjelčim kolesowanskim puću a na puću podłu Sprjewje. Wohnjowa wobora Manjow/Rudej dósta nowe transportne jězdźidło.
Za nowe puće wotewrjeny
Hdyž młody čłowjek dźensa hnydom njewě, kotry powołanski puć je za njeho prawy, ma wón na zbožo wjacore móžnosće, to wuslědźić. W Njebjelčicach je Aaron Schulz swój puć po wšěm zdaću namakał.
Njebjelčicy (mwe/SN). Drježdźanjan Aaron Schulz tuchwilu w Njebjelčanskej gmejnje dobrowólne ekologiske lěto wukonja. Po tym zo bě młodostny loni po abiturje pola firmy swoje dobrowólne lěto započał, rozhladowaše so za dalšim dźěłom. Při tym storči na drustwo Permagold, kotrež ma swoje sydło w Njebjelčicach. Mjez druhim wobhospodarja wone jako projekt permakulturnu plantažu, k čemuž słuša tež zwičnjenje biožiwidłow. „Wotewrjene wucho Njebjelčanskeho wjesnjanosty Tomaša Čornaka za nowe ideje we wobłuku agrarneho hospodarstwa a k wuhotowanju krajiny mje wabješe“, młody muž powěda. „Runje z teje přičiny sym tu, sym za nowe puće wotewrjeny.“
Krótkopowěsće (19.01.21)
Mjenje natyknjenjow
Budyšin. W Budyskim wokrjesu zwěsćichu wčera 79 dalšich koronainfekcijow. Aktualnje schorjenych je 1 093 (-205) ludźi, z kotrychž 160 (-11) w chorowni lěkuja. Inicidenca wučinješe tu 298,3. Z jědnaće schorjenymi na tysac wobydlerjow je gmejna Worklecy najbóle potrjechena. Wokrjes Zhorjelc měješe wčera sydom nowonatyknjenjow a dźesać smjertnych padow. Incidenca bě tam 252,05.
Lěto župow a Chróšćan zběžk
Budyšin/Wojerecy. Lěto župow k stotej róčnicy załoženja regionalnych cyłkow Domowiny chcedźa w juliju na Wojerowskim torhošću z wotkryćom tafle zahajić. To zdźěli wčera zarjad Domowiny. Hač tón kónc tydźenja tež regionalny swjedźeń jako narunanje folklorneho festiwala w Chrósćicach přewjedu, rozsudźi třěšny zwjazk w měrcu. Z wobšěrnym programom chcedźa lětsa tež na 20. róčnicu Chróšćan zběžka dopominać.
Delnjoserbšćina digitalnje
Chcedźa jasne znamjo wšelakorosće pokazać
Wojerecy (SN/AK). Po wupadźe lońšeho zarjadowanja Dźeń a nóc tolerancy korony dla chcedźa je 14. apryla we Wojerecach zaso přewjesć. „Planujemy cyłodnjowski akciski dźeń“, informuje sobuorganizatorka a nawodnica za politisko-historiske projekty w Regionalnym dźěłanišću za kubłanje, demokratiju a perspektiwy žiwjenja (RAA) Cindy Paulick. Hłowny organizator je Iniciatiwa za ciwilnu kuražu Wojerecy. „Chcemy pokazać, kak wšelakore Wojerecy su a tak zdobom jasnje na demokratiju, tolerancu a mnohotnosć pokazać. Akcije maja lokalne a regionalne wědomje za temu sylnić, wone maja być wuraz wulkeho towaršnostneho angažementa přećiwo prawicarskemu ekstremizmej kaž tež diskriminaciji. Zarjadowanja budu koronapandemije dla hinaše hač hewak. „To rěka, zo njezmějemy wjele ludźi na jednym městnje, skerje budu to digitalne formaty.“ Iniciatiwa je 11. januara wobsahi rozjimała. Bychu-li kulturnu šulu Kulturneje fabrika a Lessingoweho gymnazija zaso wotewrěć móhli, přewjedu zarjadowanje „Azyl w Kraju pisanosće“.
Policija (18.01.21)
Paduši na pohrjebnišću pobyli
Budyšin. Nic zemrětych přiwuznych wopytać, ale kradnyć bě wotpohlad njeznatych, kotřiž pobychu minjeny pjatk na Budyskim Michałskim pohrjebnišću při Mužakowskej dróze. W žarowanskej hali wotšrubowachu woni tři zapinaki swěcy a dwaj nastrojej, na kotrymajž wisa nuznikowa papjera. Nimo toho wobškodźichu na mužacym nuzniku durjowu ručicu a špihelowe wobswětlenje. Kelko škody je dohromady nastało, dotal znate njeje.
