Słódna překwapjenka w lěsu
Listerije – pohlad do swěta bakterijow
Nic jenož na wsach, ale tež w městach maja mnozy doma skót. Něchtóžkuli nimo toho drobny skót plahuje. Wšitcy so wo strowotu swojich dwu- abo štyrinohatych lubuškow prócuja. K tomu přinošować chce naša serija z pokiwami z weterinarneje mediciny. (23)
W cyłym našim wobswěće zetkawamy so bakterijemi. Někotre z nich su naši swěrni přewodźerjo a staraja so wo porjadk, na přikład w našich črjewach. Druzy nadźěłuja nam kaž tež skotej jenož ćeže a starosće. Přeco njemóžeš so před špatnej bakteriju škitać. Je jich druhdy přewjele, ale hdys a hdys je spomóžne, hdyž wo někotrych wěš a infekciju z nimi wobeńdźeš.
Wosebje derje měli so škitać před wonymi bakterijemi, kotrež skót cyle lochko a spěšnje na čłowjeka přenjese. Runje tajka bakterija je listeria monocytogenes. Wona zawinuje najwšelakoriše formy zahorjenjow pola zwěrjatow a čłowjeka a so po wšelakich pućach dale dawać a rozmnoža.
Policija (08.01.24)
Jeleń škodu načinił
Krušwica. Kotre sćěhi móže zražka z wulkim jelenjom měć, dyrbješe pjatk wječor 42lětna žona w Krušwicy nazhonić. Jako bě tam wodźerka Škody krótko po 21 hodź. po puću, stupi jeleń z wulkimi rohiznami na puć. Žona njemóžeše zražce hižo zadźěwać. Wulke zwěrjo načini po informacijach policije něhdźe 10 000 eurow škody a hišće na městnje njezboža zahiny. Kaž policija dale rozprawja, bě cyły prědni dźěl awta hač k prědnjej škleńcy skóncowany. Žona so na zbožo njezrani.
Lisćiki sej zawěsćić
Aktiwist sobu najstarši był
Tradicionalne zetkanje wlečakow na Horje wjele ludźi přiwabiło
Hora (JK/SN). Kóždolětne zetkanje wlečakow na Horje je mnohim lubowarjam starych a staršich traktorow a wlečakow kruty termin spočatk lěta, kotryž nochcedźa skomdźić. Tež hdyž bě lětsa mjenje traktorow wustajenych, mějachu jich šoferojo a dalši zajimcy dosć składnosćow, fachowe rozmołwy wjesć. Dohromady zličichu na wosmym zymskim zetkanju něhdźe tysac wopytowarjow.
Paleta wustajenych wlečakow sahaše znowa wot buldogow typa Lanz z 1950tych lět přez znate a woblubowane traktory z časa NDR hač k najnowšim modelam znatych producentow. Derje zastupjene běchu tež najebać mjeńšeje ličby jězdźidłow wšelake nakładne awta, kotrež zetkanja wlečakow wužija, so prezentować. Za tute bě něšto sušiša nawjes na Horje rezerwowana. Před stanom na łuce běchu wikowarjo natwarili bohaty poskitk narunanskich dźělow za najwšelakoriše typy traktorow.
Wulke wokřewjenje dožiwili
Prěnja njedźela noweho lěta je w Chrósćicach hižo dlěši čas kruty termin za kulturne a dušine dožiwjenje wosebiteho razu, hdyž Chróšćanski cyrkwinski chór do wosadneje cyrkwje přeprošuje. Wčera bě to prěni raz w ponowjenym Božim domje.
Chrósćicy (SN/MWj). Z dwójnym, mócnym a dołho trajacym aplawsom dźakowachu so wopytowarjo hodowneho hudźbneho nyšpora Chróšćanskeho cyrkwinskeho chóra wčera w tamnišej cyrkwi za dušine wokřewjenje wosebiteho razu. Jim poskićichu spěwarki a spěwarjo pod nawodom Michała Cyža kaž tež mnozy dalši sobuskutkowacy wotměnjaty koncert z chórowymi sadźbami, instrumentalnymi přinoškami a hudźbnej hodownej hru. Tež wopytowarjo sami běchu sobuskutkowacy, wšako zaspěwachu pod přewodom pišćelow tři kěrluše.
15. jubilej wobstaća je skupina Čłonstwo za integraciju ludoweje ...
Wosebity wječork
Chrósćicy (SN/mb). Załoženski direktor Astrocentruma Łužica Günther Hasinger na naprašowanje dpa zdźěli, zo hižo 15 ludźi za wulkoprojekt změny strukturow dźěła. Lětsa chcedźa hač do 50 dalšich ludźi přistajić. Dołhodobnje změje institucija něhdźe tysac sobudźěłaćerjow, mjez nimi 350 wědomostnikow. Srjedu wot 18.30 hodź. móžeš so w Chróšćanskej „Jednoće“ z planowanym předewzaćom zeznajomić. A to w rjedźe „ŠPIN 2030“ sakskeho ministerstwa za wědomosć, kulturu a turizm. Zastup je darmotny, přizjewjenje njeje trěbne.
Diskutować budu wo štyrjoch temach. Pod hesłom „městna wuknjenja a dobywanja dorosta“ dźe wo to, z kim a hdźe ma so Astrocentrum zrealizować. „Serbsce? Nó wězo!“ – znata kampanja posrědkuje titul diskusije, kak hodźa so kultura a ideje Serbow hišće lěpje do planowanja Astrocentruma zapřijeć. Dalšej temje stej zdobywanje fachowcow wottud a wot druhdźe a wopytowarske centry.
W Hornjołužiskej klinice serbske zajimy zesylnić
Předewzaćelska skupina Hornjołužiskeju klinikow Budyšin a Biskopicy ma wot 1. januara 2024 noweho jednaćela. Jörg Scharfenberg je podał na nowinarskej konferency dohlad do wužadanjow kaž tež wuhlad do wuwića předewzaća.
Budyšin (SN/MiR). Za Jörga Scharfenberga je jasne: „Mój předchadnik Reiner Rogowski je mi derje hladane polo přepodał. Klinikum je so w běhu zašłych lět wurjadnje wuwiwał.“ Prěnje štyri dny noweho nadawka su za Scharfenberga byli dosć intensiwne, na kotrychž je wulki dźěl sobudźěłaćerjow zeznał. „Čuju so přewšo witany“, wón žurnalistam rjekny. Wón ma team jako zakład wuspěcha, tež w přichodźe. W běhu prěnich sto dnjow swojeho skutkowanja chce wón předležacy medicinski koncept přepruwować, dodaća zapřijeć a za přichod nastajić. „Wočakujemy lětsa mnohe změny z boka politiki, zwjazkoweje kaž tež krajneje, kotrež mamy za sebje přepruwować a wotpowědnje našej předewzaćelskej strategiji zapřijeć.“
Krótkopowěsće (08.01.24)
FDP: Migracija a energija ćežišći
Budyšin. Sakscy liberalni maja so za lětuše wólby krajneho sejma přihotować. Z tym zwisowace wužadanja chcedźa přiwzać a zmištrować. To je designowany načolny kandidat Robert Malorny sobotu na zetkanju sakskeje FDP w Budyšinje podšmórnył. Jako ćežišći je wón wobłukaj migraciju a energiju mjenował, tu njejstej knježerstwje w kraju a Zwjazku aktiwnje dosć jednałoj.
Muž po rozestajenju zemrěł
Biskopicy. 50lětny muž je po rozestajenju w nocy na njedźelu w Biskopicach na swojich zranjenjach w chorowni zemrěł. 18lětny bu ćežko zranjeny. Jeho medicinisce dohladuja, kaž je policija wčera zdźěliła. Na Starym torhošću běchu so do toho wjacori ludźo mócnje do hłosow dóstali. Po prěnich přepytowanjach su zastojnicy 44lětneho muža zajeli.
„Ruske bajki“ wotpokazali
