Kurt so jako prěni narodźił
Kamjenc. Prěnje dźěćo lěta 2021 w Kamjenskej chorowni maltezow swjateho Jana bě Kurt. Wón narodźi so 1. januara w 23.05 hodź. a je třeće dźěćo swójby. Ze swojim wulkim bratrom móže wón přichodnje zhromadnje narodniny swjećić. Tež wón bě so Nowe lěto narodźił. Dohromady je loni w Kamjenskej chorowni 459 dźěći na swět přišło, mjez 237 hólcami a 222 holcami dwójce dwójnikaj. Najwoblubowanišej mjenje běštej Theo a Hannah.
Praskotak strašny był
Halštrow. Njeznateho praskotaka dla su w prěnich hodźinach noweho lěta w Halštrowje wosebitu jednotku krajneho kriminalneho zarjada (LKA) wołali. Po informacijach policije jednaše so wo wohnjostrojnu bombu typa F4 z wuchodneje Europy. Tale družina rozbuchadłow smě so jeno z wotpowědnej dowolnosću zapalić. Dokelž praskotak rozbuchnył njebě, dyrbjachu městno namakanki zaraćić, prjedy hač ju LKA wotwjeze.
Zetkaja so online
Nowe lěto měrnišo witali
Byrnjež poslednje dny stareho lěta nihdźe žane silwesterske praskotaki njepředawali, su w Hornjej Łužicy hišće poměrnje wjele mjeńšich a wjetšich raketow do njebja pušćeli a tak lěto 2021 witali, kaž tule pola Suchec w delnich Sulšecach. Cyłkownje pak bě přechod do noweho lěta tónraz měrniši, štož je wjetšina ludźi jako přijomne začuwała. Foto: Feliks Haza
Spěchuja dźěći a młodźinu
Město podpěruje dale nošerjow swobodneje młodźinskeje pomocy
Wojerecy (AK/SN). Ze štyrjomi napřećiwnymi hłosami je Wojerowska měšćanska rada na swojim zašłym posedźenju wobzamknyła, kak chce wona w lěće 2021 nošerjow swobodneje młodźinskeje pomocy podpěrać. Tak podpěruja projektowe dźěło Křesćansko-socialneho kubłanskeho skutka (CSB) ze 70 000 eurami, młodźinski klub Ossi ze 130 000 eurami, ewangelske młodźinske dźěło we Wojerecach a Čornym Chołmcu z 10 000 eurami a projektowu wučbu kubłanskeho skutka z 18 000 eurami. Porno tomu nochce město hižo personalne a wěcne wudawki přirodowědneho centruma Natz spěchować, ale jenož hišće jeho wobhospodarjenske wudawki zawěsćić.
Jenož małe kroki móžne byli
Poslednje dny stareho a prěnje dny noweho lěta su na mnohich městnach składnosć, na dźěło zašłych měsacow zhladować. Serbske Nowiny rozhladuja so po dwurěčnych komunach, što su tam zdokonjeli.
Ralbicy-Róžant (JK/SN). Tež hdyž aktualna tema – nowotwar Ralbičanskeje pěstowarnje – komunalne dźěło delanskeje gmejny wobknježi, njejsu druhe nadawki gmejny ležo wostali. Zaměrnje a po planje su so małe kroki ze zdźěla čujomnymi wuskutkami zwoprawdźili. Nimo přihotow za nowotwar pěstowarnje wuzběhny wjesnjanosta Hubertus Ryćer (CDU) na poslednim posedźenju gmejnskeje rady krótko do hód widźomny postup na ležownosći nowotwarow w Sernjanach. Tam su wšitke 16 twarskich ležownosćow młodym swójbam předali, zo bychu sej wone tam domske natwarili. Dźesać domow hižo steji, dalše štyri tam twarja. Prawdźepodobnje so klětu tež poslednja prózdna ležownosć na twarnišćo změni.
Připowědźeny wšak wčerawši sněh w Hornjej Łužicy bě, zo pak ...
Do silwestra hišće tankowali
Krótkopowěsće (04.01.21)
Staw w pokładni zwěsćić
Drježdźany. Sakska ma po słowach ministerskeho prezidenta Michaela Kretschmera (CDU) po koronapandemiji staw w pokładni zwěsćić. Hdyž su z najhóršeho won, měli sej kóšty wobhladać, rjekny premier Kretschmer powěsćerni dpa w Drježdźanach. Za Zwjazk a kraje dźe wo priority a doby, w kotrychž dołh wróćo płaća, zo njeměli přichodne generacije za to rukować.
CDU najbóle dowěrjeja
Lipsk. Sakscy wolerjo stronje CDU dale najbóle dowěrjeja. Po rozprawje w dźensnišim wudaću Leipziger Volkszeitung by wona při wólbach krajneho sejma 34 procentow docpěła. Jako druha najsylniša slěduje AfD ze 26 procentami. Lěwica by na jědnaće procentow přišła, Zeleni na dźesać a SPD na 7,7. FDP by z pjeć procentami znowa do krajneho sejma zaćahnyła. Knježerstwowa koalicija CDU, SPD a Zelenych by wjetšinu z 51 procentami zakitowała.
Sakscy Zeleni z rekordom čłonow
Policija (30.12.20)
Chłódźak zhubiła
Běła Woda. Z chłódźakom na puću dyrbješe so předwčerawšim policija w Běłej Wodźe zaběrać. 58lětna wodźerka wosoboweho awta typa Dacia bě techniski nastroj na awtowym připowěšaku transportowała. Po wšěm zdaću pak njebě jón na nim prawje přiwjazała, přetož na Srjedźnym puću wona chłódźak zhubi. Spočatnje pak to žona ani pytnyła njeje. Hakle kedźbliwej swědce wón wosrjedź dróhi napadny a wona policiju zazwoni. 58lětna dyrbi nětko z pokutu ličić, dokelž njebě chłódźak na připowěšaku prawje zawěsćiła. Hač móže wona nětko swoje silwesterske napoje přiwšěm chłódźić, bohužel znate njeje.
Nowa technika za šulu
W gmejnje wjele docpěli, něštožkuli pak tež ležo wostało
Wulka Dubrawa (CS/SN). Hišće do hód móžeše Wulkodubrawska gmejna digitalizowanje swojeje zakładneje šule wotzamknyć. „W kubłanišću mamy nětko dospołnje nowy kompjuterowy kabinet z nowymi serverami. Interaktiwne tafle zmóžnjeja cyle hinaše wuknjenje. Mamy tam nětko štyri kruće zatwarjene interaktiwne tafle kaž tež dwě mobilnej. Nimo toho smy 20 nowych tabletow wobstarali“, zjima wjesnjanosta Lutz Mörbe (njestronjan) tuchwilne połoženje w šuli. Něšto wjace hač 97 000 eurow je komuna do digitalizowanja kubłanišća inwestowała, z toho 82 000 za nastroje a 15 000 za instalaciju. Byrnjež so kónčna kontrola w času lockdowna wotměwa, móžachu šulerjo nowu techniku hižo do toho wuspytać. Wot 180 chowancow Wulkodubrawskeje zakładneje šule so 40 na dobrowólnej wučbje serbšćiny wobdźěla. Wutwar šěrokopasmoweje syće, kotryž bě wuměnjenje za digitalizowanje šule, je sej w nachilacym lěće wjele prócy žadał.
Prěni štom hižo podrězany
Wojerecy. Lědma zo su hody nimo, su wčera na Wojerowskim Łužiskim naměsće tam stejacy hodowny štom podrězali. Sobudźěłaćerjo Wojerowskeho komunalneho twarskeho zawoda a kameradojo powołanskeje wohnjoweje wobory přijědźechu z wjacorymi jězdźidłami a šmrěk zrumowachu. Štom na staroměšćanskim torhošću porno tomu wostanje hač do 6. januara stejo.
Jeničke zarjadowanje přewjedli
Pančicy-Kukow. Zelowa njedźela w awgusće bě jeničke zarjadowanje, kotrež móžachu lětsa w zežiwjenskim a zelowym centrumje w Pančicach-Kukowje přewjesć. Za to mějachu w běhu lěta wjace wopytowarjow hač w zašłosći.
