Z jejom so „wjećił“
Łuty. Hdyž přespěšnje jěducych šoferow z błyskačom lepja, to potrjechenych wězo mjerza, njeje pak přiwšěm žana přičina so za to wjećić, kaž činješe to předwčerawšim muž we Łutach. 54lětneho běchu připołdnju „fotografowali“, dokelž bě tam na Gerharda Hauptmannowej z awtom přespěšnje jěł. Poł hodźiny pozdźišo so wón na wone městno z kolesom nawróći a ćisny jejo wo durje jězdźidła, z kotrehož policisća kontrolowacu techniku posłužowachu. Jich jězdźidło drje so při tym njewobškodźi, přiwšěm wupisachu mužej skóržbu. W njej rěka, zo bě wón „powšitkownosć wobćežował“.
Kulow (AK/SN). Přećiwo planowanemu škričkowanskemu sćežorej za tak mjenowanu 5G-techniku w Mučowje je iniciatiwa „Hórnikečanski jězor bjez prudźenja – Žadyn škričkowanski sćežor w Mučowje“ dosć podpismow za wobydlerske požadanje zezběrała, samo wjace hač trěbne. Po pruwowanju přez město Kulow je 1 010 hłosow płaćiwych. W oktobru zapodate wobydlerske požadanje je tuž prawnisce dowolene, kaž Kulowska měšćanska rada předwčerawšim wobzamkny. Nimo toho radźićeljo přihłosowachu, zo je móžno 28. februara 2021 wobydlerski rozsud přewjesć. „To pak njewoznamjenja, zo scyła žadyn sćežor do Mučowa njepřińdźe, ale zo njepřińdźe tam, hdźež smy jón jako město namjetowali“, podšmórny Kulowski měšćanosta Markus Posch (CDU).
Smochćicy. Znaty komponist Gustav Mahler je wjele sinfonijow, spěwow a chórowych kruchow stworił. Prjedy hač přestupi 1897 ke katolskej cyrkwi, bě wón žid. Dohlad do jeho žiwjenja poda referent Smochčanskeho kubłanišća swj. Bena Ansgar Hoffmann póndźelu, 14. decembra, w 19.30 hodź. Korony dla wotměje so přednošk online a budźe přez Youtube-kanal kubłanišća wusyłany. Zajimcy njech přizjewja so pod telefonowym čisłom 035935/ 22 315 abo z mejlku pod .
Hišće raz do SKI
Budyšin. Štóž chce sej w Budyskej Serbskej kulturnej informaciji hišće tón abo tamny hodowny darik wobstarać, dyrbi so do spěcha měć. Kaž SKI zdźěli, změja tam jutře, sobotu, 12. decembra, wot 10 do 14 hodź. lětsa posledni raz za hodownu nakup wočinjene.
To bě sobu najkrótše posedźenje Chróšćanskeje gmejnskeje rady w nachilacym so lěće, kotrež su wčera we wjacezaměrowej hali „Jednota“ přewjedli.
Chrósćicy (JK/SN). Radźićeljo mějachu na blidźe próstwu tamnišeje gmejnskeje wohnjoweje wobory, zo chce wokrjesnemu wohnjowobornemu zwjazkej Budyšin přistupić. Chróšćanska wohnjowa wobora je nimo Ralbičansko-Róžeńčanskeje a wjesnych woborow Kulowa sobu jenička, kotraž dotal hišće z čłonom tohole zwjazka njeje. Lěpšiny a zaměr kaž tež skutkowanje zwjazka je přitomnym radźićelam předsyda zwjazka Gerd Schöbel wčera rozłožił.
Dypk zaso cofnjeny
Budyšin. Budyski wokrjes je swoje srjedu wozjewjene postajenje korigował a dypk nastupajo wopyt a wuhotowanje kemšow cofnył, dokelž bě so krajne knježerstwo z krajnymaj cyrkwjomaj hižo dojednało. Wčera zwěsćichu w Budyskim wokrjesu 318 nowonatyknjenow korony dla a dalšich pjeć smjertnych padow. Zhorjelski wokrjes měješe 346 nowoinfekcijow, 14 pacientow je zemrěło.
Posedźenje jako livestream
Budyšin. Koronapandemija nuzuje nětko k dalšej premjerje w Domowinskim skutkowanju. Prěni raz móža zajimcy dźensa wot 17.30 hodź. posedźenje jeje zwjazkoweho předsystwa přez livestream sćěhować. To budźe pak na internetnej stronje třěšneho zwjazka http://www.domowina.de/hsb/start/ pak direktnje přez Youtube posedźenje Zwjazkoweho předsydstwa Domowiny-YouTube.
Łužicu zhromadnje wuwić
Njeswačidło (JK/SN). Na žurli wjesneho hosćenca zetkachu so předwčerawšim Njeswačanscy gmejnscy radźićeljo k swojemu poslednjemu lětušemu posedźenju. Kaž wjesnjanosta Gerd Schuster (CDU) k zahajenju rjekny, njetrjebali so samo na sebi zetkać, dokelž wažnych wobzamknjenjow njeje. Po tym zo pak bě posedźenje w nowembrje wupadnyło, je tola hišće trjeba było wo někotrych naležnosćach gmejny rěčeć. Tak wutoru wječor přiwšěm k wjacorym wobzamknjenjam wuradźowachu, zakónčejo we wšěch wobłukach napjate lěto.