Pokradnjene awto namakali
Kamjenc. Dźakowano dobremu techniskemu wuhotowanju su minjeny kónc tydźenja awto zaso namakali, kotrež běchu njeznaći w Kamjencu pokradnyli. Wobsedźer 60 000 eurow droheho jězdźidła pjatk rano pytny, zo jeho Audi na zwučenym městnje njesteji. Na to aktiwěrowaše wón ze smartfonom app, z kotrejž hodźi so městnosć awta zwěsćić. Po tym steješe Audi A 4 dźesać kilometrow za Zhorjelcom w Pólskej. Tamniši zastojnicy namakachu Audi skónčnje na wopisanym městnje zawodźěty. Wot paduchow pak njebě ničo widźeć.
Wojerecy (SN/MWj). K silwesterskej darowanskej akciji namołwja tele dny Wojerowski zwěrjenc. Pod hesłom „Darować město praskać“ wón k tomu pozbudźa pjenjezy za silwesterske praskotaki „njepřepraskać“, ale je radšo zwěrjećim wobydlerjam coowa z darom přewostajić. Na te wašnje bychu darićeljo zdobom namołwu zwjazkoweho knježerstwa sćěhowali. Woni kaž tež 16 krajnych knježerstwow namołwjeja so lětsa silwesterskeho wohnjostroja wzdać a tak wuchowanske mocy, policiju a předewšěm chorownje za čas pandemije wolóžić.
Z akciju „Darować město praskać“ so we Wojerowskim coowje runočasnje nadźijeja, zo móža zawrjenja korony dla pobrachowace dochody zdźěla narunać. Podpěrać móža zajimcy zwěrjenc z online-darami na internetnej stronje www.kulturzoo-hy.de, pod telefonowym čisłom 03571/209 377 00 abo e-mailnje pod . Mjez wšitkimi darićelemi wulosuja pjatk, 11. decembra, rjany hodowny dar za lubowarja zwěrjatow: kmótřistwo za najlubše zwěrjo inkluziwnje wosebite wodźenje z direktorom.
Hamor (AK/SN). Swoje sadźby za ležownostny a přemysłowy dawk gmejna Hamor wot klětušeho zwyši. Na te wašnje wočakuje něhdźe 100 000 eurow wjace dochodow. Na wčerawšim posedźenju tamnišeho gmejnskeho parlamenta je dźesać radźićelow za to hłosowało, štyrjo běchu přećiwo tomu, a jedyn so hłosa wzda. Za ležownostny dawk A maja wobydlerjo nětko 315 procentow město 310 proc. płaćić. Sadźba za ležownostny dawk B zwyši so wo dźesać na 430 proc. a za přemysłowy dawk wot 390 na 415 proc.
„Sym zasadnje přećiwo zwyšenju dawkow, dokelž škodźimy tak našim přemysłownikam“, rjekny radźićel Thomas Stenzel. Klětu, tak wón argumentowaše, budźetej hižo tepjenski wolij a bencin dróšej. To njeměli nětko tež hišće dawki zwyšić. Radźićel Thomas Vater zwyšenje tohorunja kritizuje. „Na jednym boku inwestujemy do wjele naprawow, na tamnym zwyšimy dawki. To so tola kusa“, měnješe Klětnjan.
Posledni ze 24 sobudźěłaćerjow zarjadniskeho zwjazka Při Klóšterskej wodźe je tele dny do saněrowaneho běrowoweho twarjenja w Pančicach-Kukowje zaćahnył. Serbske Nowiny su sej přetwarjeny dom nětko raz bliže wobhladali.
Pančicy-Kukow (SN/MWj). Wulki serbski a němski napis, pjeć woponow sobustawskich gmejnow, žaluzije před woknami a přetwarjeny hłowny zachod su wonkowne znamjenja saněroweho twarjenja zarjadniskeho zwjazka Při Klóšterskej wodźe w Pančicach-Kukowje. Hač na maličkosće je přetwar domu wotzamknjeny, wobkruća předsyda zarjadniskeho zwjazka Měrko Domaška. Něhdźe 1,2 milionaj eurow je pjeć sobustawskich gmejnow do projekta inwestowało.
Koronapandemije dla schadźowaše so wokrjesny sejmik Budyšin wčera w tudyšej „Krónje“. Po zahajenju posedźenja wopominachu wokrjesni radźićeljo dr. Cordulu Heß z frakcije SPD, kotraž bě na chorosć kowid-19 zemrěła.
Budyšin (SN/at). Za naslědnika dr. Cordule Heß wobkrućichu Jürgena Wähnerta, kiž wčera přitomny njebě. Sejmik měješe hišće wo dalšim naslědnistwje rozsudźić. Dlěje hač 20 lět přisłušeše jemu bywši Hodźijski wjesnjanosta Peter Beer. Staroby dla wón prosy, jeho k 31. decembrej ze zastojnstwa wuwjazać. Krajny rada Michael Harig (CDU) mjenowaše Beera w dźaknych słowach „kritiskeho ducha, kiž budźe wokrjesnemu sejmikej pobrachować“. Jeho městno w frakciji Swobodnych wolerjow nastupi 1. januara 2021 Gunnar Schneider, kotrehož Harig po wobkrućenju spřisaha.
Dalše hladarnje potrjechene
Budyšin. W dalšich dźewjeć hladarnjach su wot minjeneho kónca tydźenja něhdźe 150 koronainfekcijow zwěsćili, kaž Budyski krajnoradny zarjad wčera informowaše. Za póndźelu podachu ličbje 67 nowych natyknjenjow a šěsć dalšich smjertnych padow. Aktualnje schorjenych je 2 063 (+164), z kotrychž 168 (+17) w chorownjach lěkuja. We wokrjesu Zhorjelc bě wčera 16 nowoinfekcijow.
FUEN chwali Domowinu
Budyšin. Połoženje mjeńšin za čas korony staj wčera předsyda Domowiny Dawid Statnik a prezident Federalistiskeje unije europskich narodnych mjeńšin FUEN Loránt Vincze rozjimałoj. W telefonaće dźakowaše so Vincze Serbam, zo su dale „aktiwny stołp dźěławosće FUEN“, zdźěli Domowina. Nětko koncentruje so FUEN na to, zo Europski parlament iniciatiwu Minority SafePack 14. decembra wobjedna.
Za wopytowarjow zawrjene