Němcy (SN/MWj). Lětuši adwent drje budźe w Němcach při wšěch koronowych wobmjezowanjach wosebity čas. Tam ma mjenujcy dypkownje k prěnjemu adwentej nowy wobswětleny swěčkowy wobłuk stać. Z tym budźe naprawa we wobłuku wobydlerskeho etata 2019 města Wojerecy zwoprawdźena a přeće wobydlerjow spjelnjene. Wobłuk ma štyri króć dwaj metraj wulki a z drohowocla być. Doniž njebudźe wjesne srjedźišćo doskónčnje wuhotowane, natwarja swěčkowy wobłuk najprjedy raz prowizorisce za wjesnym zarjadnistwom při hłownej dróze. Kaž je z finalneho namjeta měšćanskeho zarjada spóznać, ma wobłuk jako motiwy wjesnu kapałku, historiski tykowany dom, znaty wjesny wětrnik kaž tež žonu w serbskej drasće a křižerja wopřijimać.
Kamjenc (UM/SN). Na připrawje Kamjenskeje třělcowskeje towaršnosće chcychu dźensa w přitomnosći sakskeho nutřkowneho ministra Rolanda Wöllera (CDU) reaktiwěrowanu stometrowsku čaru přepodać. Koronoweje krizy dla je termin pak wupadnył. Wo „poswjećenju“ prezident towarstwa Dieter Raack ani rěčeć nochce. Tuchwilu njeje čas za wulke swjedźenje. Koło wobdźělnikow by tak a tak mjeńše było, hač móhło wone to pod hinašimi wuměnjenjemi być. „Poswjećenje nachwatamy, hdyž 30lětne wobstaće towarstwa swjećimy“, praji prezident Dieter Raack. Tež tale za 2020 planowana ceremonija je so z woporom korony stała.
Łaz (AK/SN). Dalšu staciju, hdźež móžeš elektroawto nabić, maja nětko we Łazu. Hižo wot lońšeho decembra steji tajka při Łazowskim železniskim zastanišću. Tele dny přepodachu dalšu na dróze Při přibrjohu při Třižonjanskim jězoru. Tam hodźitej so nětko dwě elektrojězdźidle naraz nabić. Wužiwać hodźi so stacija z kartami wšelakich poskićowarjow zwjazka Hubject.
Pytaja dale kmótow
Budyšin. Žónska iniciatiwa pyta dalšich čestnohamtskich swójbnych kmótow abo kmótry. Projekt je před lětom zaběžał, tehdy su dźewjeć tajkich zajimcow dale kubłali a potrěbnym swójbam sposrědkowali. Korony dla pak bě iniciatiwa sposrědkowanje w nalěću přetorhnyła a hakle w septembrje zaso z tym započała. Nětko pytaja znowa zajimowanych, kiž chcedźa čestnohamtsce swójby abo samokubłacych we wšědnym žiwjenju podpěrować.
Doma drogi plahował
Wojerecy. Dokelž bě hudźba w susodstwje jara wótře, wołachu předwčerawšim policiju na Wojerowsku Schweitzerowu. Tam 42lětny slubi, zo budźe nětko měr. Wospjetne telefonaty ludźi wšak swědčachu wo napřećiwnym. Tónraz pak muž njewočini, tak zo dyrbješe policiji klučowa słužba pomhać. W bydlenju namakachu 300 gramow konopje a samo natwarjenu plahowansku staciju drogow. Policisća wšitko sćazachu, mjez druhim tež strašny nóž. Sudniske jednanje slěduje.
Lubowarjo karnewala mějachu dotal snano hišće tróšku nadźije, zo so po wotprajenju lětušich zarjadowanjow te w lěće 2021 tola hišće wotměja. Znajmjeńša w Kulowje je so tale nadźija nětko zhubiła.
Kulow (SN/MWj). Předsydstwo Kulowskeho karnewaloweho towarstwa je na swojim posedźenju předwčerawšim rozsudźiło, 315. póstnisku sezonu 2020/2021 dospołnje wotprajić. „Jako smy kónc awgusta toho lěta zarjadowanja na žurlach za nowember wotprajili, mějachmy hišće nadźiju, druhi dźěl sezony přewjesć móc. Hač do spočatka tydźenja smy tole w towarstwje přihotowali“, rěka we wčera wozjewjenym nowinskim zdźělenju prezidenta karnewaloweho towarstwa Mathiasa Glaaba. Před pozadkom sakskich koronowych postajenjow, kotrež hač do 25. januara 2021 płaća, a hladajo na aktualne wuwiće infekcijow su tule nadźiju spušćili. Ani přihoty ani přewjedźenje zarjadowanjow na žurli abo přećahow njejsu hižo móžne. Přidatnje k zarjadowanjam w nowembru su tuž nětko tež te w januaru a februaru wotprajene. To potrjechi kapičkowe wječory, maskowy bal kaž tež norskej ćahaj póstnisku sobotu a róžowu póndźelu.
Choćebuz (SN). Dwurěčnosć w zjawnosći je město Choćebuz minjeny čas dale zwoprawdźiło. To zwěsći społnomócnjena za serbske naležnosće města Anna Kosacojc-Kozelowa wčera w rozprawje před měšćanskej radu w Choćebuskej měšćanskej hali.
Za wuspěch Kosacojc-Kozelowa ma, zo buchu zajimy serbskeho ludu w zakonju wo skrućenju a změnje struktury wobkedźbowane. To je so dźakowano dobreho zhromadneho dźěła komunow ze serbskimi zastupjerjemi poradźiło, wona wuzběhny. Byrnjež w rozprawje wjacore pozitiwne dypki naličiła, pokaza wona tež na ćeže. Jako bolostne rysowaše Kosacojc-Kozelowa mjez druhim njespokojacy staw na kubłanskim polu. Kritisce wupraji so wona wo tym, zo je na dwěmaj z cyłkownje wosom zakładnych šulow w Choćebuzu přichod wučby serbšćiny chutnje wohroženy. Winu za to widźi wona w šulskich postajenjach, kotrež sej minimalnu ličbu wobdźělnikow žadaja. Tohodla njemóža na šulach serbske skupiny wutworić. Runja Braniborskej Serbskej radźe napominaše tuž wčera krajne knježerstwo tele postajenje wotstronić.
Lubin (SN/JaW). Wokrjes Dubje-Błóta chce so ze spěchowanskim čłonom Domowiny stać. Wotpowědnu próstwu móža zamołwići nětko zarjadej serbskeho třěšneho zwjazka zapodać. To je wčera wokrjesny sejmik w Lubinje wobzamknył. Z tym je delnjołužiski wokrjes scyła prěni, kotryž so wo status spěchowanskeho čłona Domowiny prócuje. Kaž z wobzamknjenja wuchadźa, je tójšto towarstwow wokrjesa, mjez druhim Běłeje Góry (Byhleguhre), Noweje Niwy (Neu Zauche) a Lubina (Lübben), z čłonom Domowiny. „Ze spěchowanskim čłonstwom w Domowinje sadźi wokrjes znamjo za wzajomne zhromadne dźěło a přisłušnosći Serbam. Z přistupom skića so wokrjesej šansa na institucionalnej runinje, wuwiwanje jónkrótneho a mnohotneho kulturneho namrěwstwa Serbow sobu wuhotować.“ Dale wustaja wokrjes we wobkrućenju wobzamknjenja swój krok jako teritorialna korporacija status spěchowanskeho čłonstwa docpěć jako „pioněrski. Wokrjes ma z tym wusahowacu hódnotu w serbskim sydlenskim rumje mjez krajomaj Braniborskej a Sakskej.“