Tójšto wotpadkow nazběrali
Spěchowanska doba w gmejnje slědy zawostajiła
Rakecy (JK/SN). „Zo je regionalny management LEADER-regiona Hornjołužiska hola a haty runje w Rakecach zaměstnjeny, je za nas wulke zbožo a tež zakład komunalnych wuspěchow“, rjekny Rakečanski wjesnjanosta Swen Nowotny (CDU) na minjenym posedźenju gmejnskeje rady. Z tutymi słowami witaše regionalneho managera Rudolfa Rychtarja, kotryž poda rozprawu wo wuspěšnym zakónčenju spěchowanskeje doby w regionje. Za čas spěchowanja wot 2014 do 2020 je tež Rakečanska gmejna měła tójšto dobrotow. Mnoho su tam na dobro gmejny a wobydlerjow zwoprawdźili. Cyłkownje je regionalny management komunje přewostajił 750 000 eurow spěchowanskich srědkow z dohromady za cyłu dobu a region k dispoziciji stejacych 12,5 milionow eurow. Z Rakečanskeje gmejny bu 16 próstwow wo spěchowanje zapodatych. Z toho běštej dwě za priwatny bydlenjotwar. Tamne budu swoje slědy na dobro gmejny hišće mnohe lěta zawostajić. Na jednej próstwje ma Rudolf Rychtar tež wosobinski podźěl. Je to Rakečanske strowotniske srjedźišćo, kotrež su wutworili w něhdyšej kupnicy Penny.
Maćična akademija njebudźe
Budyšin. Dale trajaceje pandemije dla dyrbja so přichodne přednoški Maćičneje akademije, kiž bychu so wot nowembra hač do měrca w Budyskim hosćencu „Wjelbik“ wotměli, nažel wotprajić. To zdźěli w mjenje stawizniskeje sekcije Maćicy Serbskeje Trudla Malinkowa. Po normalizowanju wobstejnosćow chcedźa zarjadowanja nachwatać. Terminy sčasom zdźěla.
Čita z twórbow Domaški
Budyšin. Jedyn z najwuznamnišich ludowych powědarjow do Prěnjeje swětowej wójny kaž tež mjez wójnomaj, Romuald Domaška (1869–1945), steji w srjedźišću zabawneho wječora srjedu, 21. oktobra, w 19.30 hodź. w Budyskim Dźiwadle na hrodźe. K 75. posmjertninam wěnuja jemu hudźbno-literarny wječor w rjedźe „Zynki a linki“. Dźiwadźelnik Jurij Šiman čita ze zběrki Domaški „Wokoło stareho młyna“. Hudźbnicy SLA čitanje přewodźeja. Wšitcy zajimcy su wutrobnje přeprošeni
Policija (20.10.20)
Pod wliwom drogow do kupy zajěł
Hrańca. Drogi běchu sobu wina na wobchadnym njezbožu, kotrež je so minjenu sobotu w Hrańcy stało. Krótko po 16 hodź. jědźeše tam 18lětny wodźer Peugeota na statnej dróze S 101, jako do wobchadneje kupy zrazy a při tym wobchadnej znamjeni skóncowa. Dohromady nasta 500 eurow škody, awto bu dospołnje wobškodźene. Přiwołana policija přewjedźe pola młodostneho drogowy test a zwěsći, zo bě wón amfetaminy brał. Jeho jězbnu dowolnosć sej zastojnicy hnydom wobchowachu.
„Jednotu“ dyrbja saněrować
Lisćina twarskich njedostatkow wjacezaměroweje hale přewšo dołha
Chrósćicy (SN/MWj). Runje hakle je Chróšćanska gmejna bywše šulske twarjenje na gmejnski a kulturny centrum přetwariła, to čaka na nju přichodne twarske wužadanje, a to hnydom w susodstwje. Sportowu a wjacezaměrowu halu „Jednota“ dyrbja mjenujcy saněrować. Při tym njeje rěč wo kusk čerstwej barbje, ale wo wulkim twarskim projekće, kaž wjesnjanosta Marko Kliman (CDU) čłonam gmejnskeje rady na jich zašłym posedźenju wuswětli. Woni schwalichu 18 800 eurow za prěnje planowanje projekta, štož je zakład za to, zapodać próstwu wo spěchowanje.
Dalše přiwótřenje
Budyšin (SN). W Budyskim wokrjesu je strowotniski zarjad wčera 24 nowych infekcijow w zwisku z koronawirusom přizjewił. Z tym so ličba nowych infekcijow w běhu sydom dnjow na 100 000 wobydlerjow na 49,3 powyši. Hranica postajenych 50 je nimale docpěta. Wobydlerjo Budyskeho wokrjesa maja so prawdźepodobnje na nowe přiwótřene postajenja nastajić, kajkež wot wčerawšeho hižo w Zhorjelskim wokrjesu płaća. Tam ležeše hódnota wčera pola 56,58 nowych infekcijow. Na wjetšich zarjadowanjach, zhromadźiznach a swjedźenjach smědźa so jasnje mjenje ludźi wobdźělić. To samsne płaći za priwatne zeńdźenja. Dźensa připołdnju chcychu zamołwići na nowinarskej rozmołwje aktualne połoženje w Zhorjelskim wokrjesu rozłožić.
W Budyskim wokrjesu ličba pacientow w chorownjach přiběra. Mjeztym so tam dźesać wosobow lěkuje. Ličba wopodstatnjenych infekcijow je so na 880 zwyšiła, 249 z nich je tuchwilu schorjenych. Cyłkownje 751 wosobow je w karantenje.
Krótkopowěsće (20.10.20)
Dalekubłanje za zwukopisak
Budyšin. We wobłuku medijoweje akademije Serbskeho rozhłosa a Sakskeho wukubłanskeho kanala SAEK je wučerka Milenka Cyžowa dźensa dopołdnja w Budyšinje dalekubłanje za zwukopisak BOOKii přewjedła. Nimo někotrych zajimcow w rumnosćach SAEK běchu so tež tójšto serbskich wučerkow a wučerjow, sobudźěłaćerjow LND kaž tež nakładnistwa Tessloff online wobdźělili.
Prózdniny w Hornim Hajnku
Horni Hajnk. Wosom dźěći je na poskitk Budyskeho Rěčneho centruma WITAJ přizjewjenych. Wot wčera do pjatka zabawjeja so wone w nazymskich prózdninach w domje Jurja Brězana w Hornim Hajnku. Šulskej socialnej dźěłaćerce RCW chcetej z nimi w běhu tohole tydźenja do přirody hić, wšelake hry hrać a kreatiwni być. Korony dla su wjacori starši wobdźělenje swojich dźěći na prózdninskim poskitku wotprajili.
Idealne wuměnjenja w centrumje
Kermušna zabawa witana była
Dochodow lětsa tójšto mjenje
Kulow (AK/SN). Z přemysłoweho dawka změje město Kulow lětsa tójšto mjenje dochodow hač loni. To podšmórny měšćanosta Markus Posch (CDU) na zašłym posedźenju měšćanskeje rady. „W hospodarskim planje mějachmy spočatnje 2,3 miliony eurow zaplanowane. Mjezystaw dochodow z přemysłoweho dawka kónc septembra wučinješe něšto mjenje hač milion eurow“, Posch rozłoži. „Po našich nazhonjenjach njemóžemy w poslednich třoch měsacach lěta hižo z přewulkimi dochodami ličić.“
Swobodny stat Sakska komuny při wurunanju jich deficitow koronapandemije dla podpěruje. Kulow móže tak z něhdźe 500 000 eurami ličić. Prěnju sumu we wobjimje 250 000 eurow je město mjeztym dóstało. Markus Posch so nětko tež druheje połojcy nadźija.
Kulturny centrum ma nowy foyer
Slepo (JoS/SN). Mjeztym 23 lět wobsteji w Slepom Serbskim kulturny centrum (SKC) ze swojimi poskitkami. W běhu lět pokazachu tam njeličomne wustajeńcy a organizowachu najwšelakoriše zarjadowanja a tematiske wiki. Tež towarstwa a institucije maja tam swój domicil. Po tak dołhim času, praji nawodnica SKC Sylwija Panošina, bě na městnje, wo nowych konceptach rozmyslować.
Tak prezentuje so nětko zachodny foyer w nowych a čerstwych barbach. „Nastorki smy sej pola swojich partnerow zdobyli, Zeisigec blidarnja z Brězowki je nas při zwoprawdźenju podpěrała“, Sylwija Panošina powěda. W nowym foyeru tworja barby, swěca a funkcionalita jednotu. Nade wšěm steja horjeka wulkoformatowe fota z motiwami Slepjanskeho regiona, kotrež bě Frank Stein zapopadnył. Tež wabjenski material aktualnych turistiskich poskitkow je přewidnje prezentowany. Na integrowanej wobrazowce móža wopytowarjo kulturneho centruma krótke filmy widźeć, mjez druhim wot Rudija Krawca. Pjenježnu podpěru za nowy foyer dóstachu wot załožby Doma w Slepom, Rownom, Mułkecach.
