Znowa natwarjena Šwjelic bróžnja we Wochozach je nimale hotowa. Po informacijach tamnišeho towarstwa zbywaja jenož ­hišće někotre trěbne dźěła. Poprawom chcychu bróžnju na dworowym swjedźenju poswjećić, dyrbjachu pak jón wotprajić. Po wšěm zdaću klětu spočatk lěta chcedźa to nachwatać. 200 lět staru kładźitu bróžnju běchu loni na starym městnje spotorhali a mjez cyrkwju a faru znowa natwarili. Chcedźa ju w přichodźe mjez druhim za wustajeńcy wužiwać. Dwě dwurěčnej informa­ciskej tafli tam hižo stej, dalšej matej hišće k tomu přińć. Foto: Joachim Rjela

We wčera wozjewjenym přinošku pod nadpismom „Pjeć rjadownjow Ralbičanskeje šule w karantenje“ pisachmy, zo „jězbne kóšty a wupad zasłužby, kotrež testa dla nastanu, přew­ozmje wokrjes“. To njewotpowěduje wěrnosći. Kaž Budyski krajnoradny zarjad dźensa hišće raz zdźěli, wón žane z naspomnjenych kóštow njepřewozmje. Dale tam rěka, zo „wupady zasłužby zawrjenja zakładnych šulow a pěstowarnjow dla krajna direkcija na próstwu dźěłodawarja zaruna“. Prosymy wo wodaće za misnjenje. Redakcija SN

Budyšin (SN/JaW). W Budyskim wokrjesu bu wčera marka 60 nowonatyknjenjow z koronawirusom w běhu sydom dnjow wo tři překročena. Tohodla je krajnoradny zarjad krućiše naprawy přećiwo rozšěrjenju wirusa wukazał. Zarjadowanja z wjac hač tysac hosćimi njesmědźa so tuž wotměwać. Nastupajo Ralbičansku zakładnu šulu je połoženje dale napjate. Po tym zo bu­štej wučerce pozitiwnje na wirus testowanej a pjeć rjadownjow do karanteny pósłane, strowotniski zarjad hižo njewuzamkuje, kubłanišćo dospołnje zawrěć.

Za myto nominowanaj

Drježdźany. Slepjanski gmejnski ra­dźićel a Rownjanski wjesny předstejićel Matthias Jainsch kaž tež Wojerowska młodźinska měšćanska rada staj mjez nominowanymi kategorije „Zhromadnje skrućić – kraj wuhotować“ za lětuše Sakske­ wobydlerske myto. Spožčić chcedźa myto mjeztym dźesaty raz w cyłkownje pjeć kategorijach 14. oktobra w Drježdźanskej cyrkwi Našeje knjenje.

Nobelowe myto Louisy Glück

Stockholm. Ameriska basnica, esejistka a mjez druhim hižo z Mytom Pulitzera počesćena Louise Glück je lawreatka lětušeho Nobeloweho myta za literaturu. Šwedska akademija wuznamjeni lyri­karku za jeje „njezaměnjomny poetiski hłós. Wona spřistupnja indiwidualnu eksi­stencu jako uniwersalne dožiwjenje“, jury rozsud wčera wopodstatni.

„Mały Tibet“ blisko Łužicy