Kamjenska wotnožka Budyskeje ludoweje uniwersity je wčera wječor wobydlerjow Njebjelčanskeje gmejny na zarjadowanje projekta „zhromadnje myslić, wuknyć, wuwiwać a činić“ přeprosyła.

Njebjelčicy (aha/SN). Zamołwita sobudźěłaćerka za politiske a hospodarske kubłanje Kamjenskeje ludoweje uniwersity Sandra Hübner-Richter je projekt po nowym kubłanskim formaće zdźěłała. Wčera na třećim wot cyłkownje dźesać předwidźanych zarjadowanjow wona na prawy rozsud wjesnjanosty Tomaša Čornaka (CDU) pokaza, zo dźiwa so na strukturne změny w gmejnach a na wsach, a zo so to w Njebjelčicach přewjedźe.

Kolesowar so zranił

Hózk. W Hózku je srjedu wječor wodźer nakładneho awta na hłownej dróze kolesowarja přewidźał a jeho šmórny. Byrnjež z koła padnył, so škodowany na zbožo jenož lochko zrani. Zawołana policija wěcnu škodu na sto eurow trochuje.

Do firmy so zadobyli

Serbske Pazlicy. Minjeny dny běchu so njeznaći do jedneje firmy w Serbskich Pazlicach zadobyli. Kaž Zhorjelska policajska direkcija wčera w nowinarskej rozprawje zdźěli, běchu grat w hódnoće něhdźe 5 000 eurow pokradnyli. Wěcnu škodu trochuja na něhdźe 500 eurow.

Z parka palmy sobu wzali

Mužakow. W nocy na srjedu su njeznaći w Mužakowskim parku palmy pokradnyli. Jedna z eksotiskich rostlin bě po zdaću tak ćežka, zo ju policija z čworom na Zhorjelskej dróze wostajenu nadeńdźe.

Chorobne jězdźidło pokradnyli

Kamjenc. Na Jěžowskim pólnym pućiku w Kamjencu su njeznaći, kaž policija hakle wčera pisa, minjeny dny z garaže elektriski chorobny jězdny stoł typa ­Invacare a k tomu słušace elektriske nabiwadło pokradnyli. Ćělnje zbrašenym za žiwjenje jara wažne a trěbne jězdźidło płaći něhdźe 2 000 eurow.

Worklečanska komuna je w minjenych lětach chětro wjele docpěła

Worklecy (JK/SN). Prěnje nazymske posedźenje Worklečanskeje gmejnskeje rady traješe wčera wječor tež po měnjenju radźićelow chětro dołho. Při tym njebě ani telko dypkow na dnjowym porjedźe. Wina bě wuradźowanje k lětušemu hos­podarskemu planej a wotpowědnym wustawkam k tomu.

Hakle krótko do kónca lěta budu nětko tež we Worklecach po schwalenym planje dźěłać. Prjedy pak hač móžachu jón a wustawki wobzamknyć, mějachu radźićeljo hišće tójšto prašenjow. Při tym so wujewi, zo njeje forma, w kotrejž so plan prezentuje, za radźićelow idealna. Mnohe zwiski a pozadki ličbow so na naćisku plana jenož ćežko do zwiska stajić hodźa a někotra pozicija w planje njeje dosć derje wobkrućena. Tohodla přeja sej radźićeljo jednorišu a přewidnišu formu naćiska hospodarskeho plana. To njebudźe po słowach wjesnjanosty Franca Bruska (CDU) tak jednorje, wšako maja wužiwać předpisane formulary a předłohi. Ale snano dosaha tež, hdyž maja radźićeljo jenož dosć chwile, so z ličbami zaběrać.

Hórnikečanska Energijowa fabrika bě před něšto dnjemi kulisa za wuměłske tworjenje wobdźělnikow lětušeje molerskeje dźěłarnički Spěchowanskeho kruha za serbsku ludowu kulturu.

Hórnikecy (SN/MiR). Do kruha molowacych słušachu tónraz „stari zajacy“ kaž tež nowačcy. A nawodnica dźěłarnički Maja Nagelowa měješe za wšěch wotpowědne pokiwy, kotrež pohnuwachu do zaběry z podatymi objektami a materialom. „Sym jara wjesoła, zo mějachmy mjez jědnaće wobdźělnikami štyri młode žony. Dwě stej so prěni króć na dźěłarničce wobdźěliłoj“, rjekny managerka Domowiny Rejzka Krügerowa, za kotruž bě to tohorunja prěni króć, zo je tónle projekt přihotowała.