Nowa direktorka powołana
Zhorjelc. Kulturna stawiznarka dr. Agnieszka Gąsior přewozmje 1. meje 2021 zastojnstwo direktorki Šleskeho muzeja w Zhorjelcu. Jelenjogórska wědomostnica bě dotal mjez druhim sobudźěłaćerka Leibnitzoweho instituta za stawizny a kulturu wuchodneje Europy na Lipšćanskej uniwersiće. Wona naslěduje dr. Markusa Bauera, kiž je instituciju wot jeje załoženja 1999 nawjedował.
Dalše pady w Hornjej Łužicy
Budyšin. Wo třoch nowych natyknjenjach z koronawirusom je Budyski strowotniski zarjad wčera rozprawjał. Po tym je aktualnje 44 wosobow schorjenych, dwě z nich lěkuja w chorowni. Zwěsćenej dalšej infekciji na nětk dohromady 15 wozjewi wčera Zhorjelski wokrjes, jednu wosobu tam stacionarnje zastaruja. W karantenje bě wčera 188 wosobow w Budyskim a 39 w Zhorjelskim wokrjesu.
Přemysłowy dawk sobu najwyši
Serbska cyrkej na Kamjentnej hasy w Budyšinje bu 1240 jako „Cyrkej našeje lubeje Knjenje na Selowych wikach“ dokumentarisce wobkrućena, mjeztym zo jeje spočatki do 11. lětstotka sahaja. Wot 1985 je wona jako filialny Boži dom tachantskej cyrkwi přirjadowana. Kermušu jako dźeń poswjećenja cyrkwje pak swjećachu minjenu njedźelu po dawnym wašnju.
Hižo někotre lěta wuhotuja w Budyskej Serbskej cyrkwi nimo kermušnych kemšow tež wosebity hudźbny nyšpor, lětsa tohorunja. „Dźakować mamy so Bohu za wšě dary a dobroty. Dźakować chcemy so runje tak wšěm, kotřiž so wo Boži dom staraja a so wo njón starosća“, rjekny tachantski farar, prelat Wito Sćapan. Wosadni so serbsce kaž němsce modlachu a spěwachu.
Łaz (AK/SN). Sakska gmejna Łaz chce 70 000 eurow lětušeje pawšale Swobodneho stata Sakska za sylnjenje wjesneho ruma wužiwać zaměrnje za Wulkoždźarowsku Zakładnu šulu „Při Hórnikečanskim jězoru“ a za wjesne dźěle. To su gmejnscy radźićeljo wčera potwjerdźili. 50 000 eurow trjebaja za podruž kontejneroweje připrawy při šuli. Za šulerjow trěbny je narunanski twar, nutřkowneho wobnowjenja šulskeho domu dla. Za 15 wjesnych dźělow chce gmejna 20 000 eurow nałožić. Wobzamknjenje za wužiwanje pawšale bě trěbne, dokelž njeběchu so radźićeljo na swojim posedźenju 14. julija dojednać móhli.
Z drogami po puću był
Běła Woda. Policija je póndźelu wječor pozdźe młodeho muža w Běłej Wodźe zadźeržała. Wón bě zastojnikam ducy na Schweigowej hasy napadnył. W titce měješe 19lětny pohłušenskej srědkaj marihuanu a crystal.
Křiž pokradnyli
Budyšin. Paduši su minjeny tydźeń na kěrchowje na Budyskej Lubijskej dróze železny křiž pokradnyli. 50 centimetrow wysoki symbol steješe tam wot 1940tych lět. Policija prosy swědkow wo pomoc.
Worklecy (JK/SN). Zarjadniski zwjazk Při Klóšterskej wodźe je na swojim wčerawšim posedźenju we Worklecach wažne wuhibki do přichoda čłonskich gmejnow stajił. Dnjowy porjad, kotryž mějachu radźićeljo wčera wotdźěłać, njebě runje krótki. Na kóncu posedźenja pak bě jasne, zo su wo přichodźe zwjazka a jemu přisłušacych gmejnow wažny rozsud tworili.
Wojerecy (SiR/SN). Projekt „Pytać za slědami“ we Wojerecach zaběra so lětsa z wodomjetami (Springbrunnen). Mjeztym přewjeduja jón tam štwórty króć. Projekt młodym wobdźělnikam zmóžnja so intensiwnje ze swobodnje wolenej towaršnostnej temu bliže zaběrać a wuslědki zjawnje předstajić. Po prěnich lětach, jako steještej zašłosć NDR ze stawiznami a wuwićom šulow we Wojerecach kaž tež tema „Bjez rěče – Serbja w nacionalsocializmje“ w srjedźišću, maja lětsa hesło „Kupacy so we wodomjetach – dźěćatstwo w NDR“. Při tym hraje skrótšenka Hoywoj wosebitu rólu. Pismik „j“ z přełožka „Wojerecy“ ma symbolisce stać za dwurěčnosć města. Młodźi wobdźělnicy projekta, kotryž tamniša Kulturna fabrika (Kufa) pod nawodom Iny Züchner organizuje, rešeršuja, rozmołwjeja so z časowymi swědkami, zběraja nazhonjenja z nahrawanjom zwukow a wobrazow, a zhonja wo stawiznach města.
Prěnje komunalne wólby w meji 1990, po měrliwej rewoluciji, běchu za dalši žiwjenski puć Njebjelčana Tomaša Čornaka rozsudne. Wón bu za wjesnjanostu Njebjelčanskeje gmejny wuzwoleny a skutkuje jako tajki hač dodźensa. Za połdra lěta pak wón k přichodnym wólbam wjesnjanosty hižo njenastupi.
Kak sće k tomu přišoł so w komunalnej politice angažować?