Choćebuz (HA/SN). Wjace hač 45 wjetšich a mjeńšich projektow chce Domowina klětu w Delnjej Łužicy spěchować. Pjenjezy za to bjerje z fondsa, kotremuž energijowy koncern Vattenfall tež za lěto 2016 srědki w dotalnym wobjimje přewostaja. Zakład toho je dojednanje wobeju stron, zo tež klětu wuspěšne zhromadne dźěło dale powjedźetej, kaž su na wčerawšim posedźenju předsydstwa župy Delnja Łužicy w Choćebuzu připowědźili.

W zwisku z planowanym cofnjenjom Vattenfalla z Łužicy hrožeše wěsty čas strach, zo dalše projekty njefinancuja. Předsydstwo župy na swojim wurjadnym a njezjawnym wuradźowanju zdobom rozsudźi, kotre ze zapodatych projektow su po postajenych směrnicach spěchowanjahódne, hač w połnym wobjimje abo dźělnje. Tak rozjimachu cyłkownje 55 próstwow, kotrež běchu Domowinska župa, jednotliwe skupiny, towarstwa,­ Rěčny centrum WITAJ, Choćebuska wotnožka Serbskeho instituta a dalše delnjoserbske institucije zapodali. Mjez požadarjemi stej tež Spěchowanske towarstwo za serbsku rěč w cyrkwi a serbske towarstwo Ponaschemu.