Wažna tema na hłownej zhromadźiznje župy „Jakub Lorenc-Zalěski“ była
Slepo (SN/at). Wjeselo nad zelenej swěcu za dalše planowanje němsko-serbskeho šulskeho centruma bě z rozprawy župana Manfreda Hermaša minjeny pjatk na hłownej zhromadźiznje župy „Jakub Lorenc-Zalěski w Serbskim kulturnym centrumje Slepo jasnje wusłyšeć. Po jednanju z koncerom Vattenfall bě tamniša gmejnska rada tole minjeny štwórtk rozsudźiła. Poprawom měješe kubłanski kompleks 1. septembra dotwarjeny być. Dołho dosć bě najwažniši dypk nastupajo zaručenje a wuwiće serbšćiny ze zakładneho zrěčenja gmejny z Vattenfallom z lěta 2008 wohroženy. Župan wotbłyšćowaše w tymle zwisku na kóncu pozitiwne wuwiće wot lětušeho apryla. Tehdy bě energijowy koncern zdźělił, zo naprawy z tohole dokumenta hižo spjelnić njemóže. „Z tym běše tež za nas hranica překročena“, Manfred Hermaš rjekny. Pomoc su w sakskim ministerstwje za hospodarstwo a dźěło našli. „W konkretnym padźe njeje ani 24 hodźin zašło, zo je z ,ně‘ připrajenje ,haj, nětko tola‘ nastało“, župan wuzběhny.