TCM swoju hłownu wólbnu zhromadźiznu přewjedło

Radwor (SN/MkWj). Čłonojo Towarstwa Cyrila a Metoda (TCM) su na swojej wčerawšej hłownej a wólbnej zhromadźiznje w Radworju dotalneho předsydu, 69lětneho Jurja Špitanka ze Zejic, znowa do tohole zastojnstwa wuzwolili. Jemu poboku budźe přichodne tři lěta dalšich šěsć čłonow předsydstwa: Tomaš Rječka, Rolf Hrjehor, Guido Zahrodnik, Alfons Korjeńk, Monika Kralowa a farar Gabriš Nawka. Dobre třiceći čłonow bě na hłownu zhromadźiznu na Radworskej farskej žurli přišło.

Jurij Špitank móžeše w swojej rozprawje na dosć wuspěšne skutkowanje TCM w minjenym lěće pokazać. Předewšěm přihot a předstajenje Pasiona stej sej wot wšitkich wobdźělnikow wulke napinanja a wjele dźěła žadałoj. Na wšě 310 sobuskutkowacych postara so wo to, zo je so nabožny podawk zwoprawdźił. Cyłkowne kóšty 62 000 eurow běchu zamołwići z pomocu swójskich kaž tež spěchowanskich srědkow a pjenježnych darow znosyli. Wuraznje dźakowaše so Špitank Załožbje za serbski lud a bonifacijowemu skutkej za skutkownu podpěru.