Na małej swjatočnosći składnostnje „sławneho jubileja“ Wochožanskeje Domowinskeje skupiny předsyda Domowiny Dawid Statnik w swojich postrownych słowach wobžarowaše, zo njeje serbska rěč we wsy hižo prezentna. „Ale, štož wostanje, hdyž rěč dźe, je čłowjek. A tam, hdźež je čłowjek, móžeš wo stawiznach rěčeć. A hdźež su stawizny, je domizna“, Statnik mjez druhim rjekny. Takle dźa­kowaše so wón za wulki angažement sku­piny wosebje při hajenju serbskich nałožkow w holanskej kónčinje a wu­zběhny, zo tež Wochožanska drasta k tomu­ słuša. Předsyda Domowiny so nadźija, zo přidruži so jej snadź tež zaso rěč, kotruž móhli ludźo nawuknyć. „Sće-li na tym dypku, da smy hnydom na městnje a wam pomhamy – chcemy was pod­pěrać.“