Towarstwo Stup dale a město we wuskosćach

Drježdźany (SN/MiR). Dźěćace dnjowe přebywanišćo na Geisingskej 25 w Drježdźanach pyta serbski kubłarski dorost. Kónc zańdźeneho lěta stej dwě kubłarce zarjadnišćo wopušćiłoj. Carolin Kupkec je přistajenje we Łužicy namakała, Sarah Rječkec poda so do starych zwjazkowych krajow. Wona bě w lěće 2013 jako prěnja serbska kubłarka dźěći ze šěsć Drježdźanskich swójbow ze serbskorěčnym pozadkom w pěstowarni kubłała. Lětsa nalěto woteńdźe hišće Marko Njek, tohorunja do Łužicy. Dale jako kubłarka w pěstowarni wostanje Nadja Lebzec.