Budyšin (SN/at). Lětuše planowane projekty stejachu w srjedźišću wuradźowanja předsydstwa župy „Jan Arnošt Smoler“ wčera w Budyskim Serbskim domje. Kaž regionalna rěčnica Domowiny za teritorij Budyskeje župy Sonja Hrjehorjowa na naprašowanje zdźěli, přihoty za swójbne popołdnjo zaměrnje postupuja. Zarjadowanje je za 18. nowember w Hodźiju předwidźane. Wothłós z gmejny je dosć pozitiwny, kaž zwěsćichu po prěnich rozmołwach z wjesnjanostu Geraldom Meyerom (njestronjan) a ze zastupjerjemi pěstowarnje a towarstwow.

Župne předsydstwo je so za cil lětušeje kubłanskeje jězby rozsudźiło. Tak po­dadźa so 23. septembra do Ochranowa. Dalši namjet, w reformaciskim lěće do Lutheroweho města Wittenberga jěć, njebu wot wjetšiny přiwzaty.

Ptačokwasne předstajenje Serbskeho ludoweho ansambla za dźěći w Budyšinje je mjez čłonami župneho předsydstwa pobrachowaceje serbskeje rěče dla kritiku zbudźiło. Woni wobžaruja, zo njeje zarjadowanje šulerjam, kotřiž serbšćinu wuknu, składnosć skićiło ju na jewišću w spěwach abo druhich dźělach programa SLA dožiwić.