Zwjazkowe předsydstwo Domowiny wuradźuje přichodnje přeco pjatk
Budyšin (SN/JaW). Wuradźowanja Zwjazkoweho předsydstwa Domowiny budu so přichodnje pjatk wotměwać. To je jedna z nowosćow, kotrež je nowowuzwoleny gremij po krótkej a wěcownej diskusiji na swojim prěnim posedźenju po hłownej zhromadźiznje třěšneho zwjazka minjenu sobotu w Budyšinje wobzamknył. Wjetšina přitomnych 23 čłonow – sedmjo běchu zamołwjeni – tohorunja wobzamkny, wuradźowanja časowje wot 18 do najpozdźišo 22 hodź. wobmjezować. Wobsahi wobzamknjenjow maja wuběrki do toho přihotować. Kak tele wuběrki wobsadźa, na to chcedźa so na přichodnym wuradźowanju 2. junija w Choćebuzu dojednać.