Namysłów (dd/SN). Serbscy studenća a šulerjo nawróćichu so njedźelu z Pólskeje. Na wuprawu přeprosył bě Zwjazk serbskich studowacych – župa „Jan Skala“. Cil wulěta 29 młodostnych bě městačko Namysłów, w kotrymž bě Jan Skala něhdy skutkował a ke kotremuž Serbja dobre zwiski wudźeržuja. Nimo wopyta susodneho kraja přihotowachu młodostni lětušu schadźowanku. Prěni króć běchu studenća šulerjow Budyskeho Serbskeho gymnazija přeprosyli, zo bychu so lěpje mjez sobu zeznali. Po přijězdźe powita pólski partner Mateusz Magda serbsku skupinu a zhromadnje dachu wječor wuklinčeć. Nazajtra wotměchu studenća a šulerjo chórowu probu a pisachu kabaretne přinoški. W derje zdźeržanym tykowanym domje Izba regionalna, hdźež je muzej zaměstnjeny, bu samsny dźeń wustajeńca wotewrjena. Hudźbny kwartet serbskich studentow wobrubi ju ze serbskimi a słowjanskimi ludowymi spěwami, za kotrež žněješe wutrobny aplaws. Pozdźišo informowaše čłon towarstwa přećelow Serbow Pro Lusatia prof. Piotr Pałys młodostnych wo skutkowanju Jana Skale a wo mjezsobnych stykach.