Časowy plan a modality za wólby serbskeho předparlamenta předstajili

Slepo (SN/at). Nimale 300 dnjow su trěbne wot wozjewjenja wólbneho porjada a powołanja wólbneho wuběrka přez radu starostow hač k skonstituowanju serbskeho předparlamenta. To wuchadźa z naćiska časoweho plana, kiž su zastupjerjo Iniciatiwy za demokratisce legitimowane ludowe zastupnistwo Serbski sejm a rady starostow wčera na nowinarskej konferency w Slepom předstajili.

Wobšěrnje zhonichu nowinarjo wo planje sydom dypkow. To su: prawólby prěnjeho serbskeho ludoweho zastupnistwa – předparlamenta –, zdźěłanje wustawkow serbskeho zhromadźenstwa, skonstituowanje Serbskeho sejma, wólby a nadawk „Serbskeje komisije“, wujednanje statneho zrěčenja, docpěće prawo­kmanosće za serbski lud kaž tež narodne wo­zrodźenje. „Docpěć ma so prawokmanosć serbskeho ludu“, zjima dr. Andreas Kluge zaměr wonych sydom dypkow.