Do Łužicy je dóšła zrudźaca powěsć z wendlanskeho Łuchowa (Lüchow). Hakle njedawno z najwyšim wuznamjenjenjom třěšneho zwjazka serbskich towarstwow Mytom Domowiny počesćeny swěrny přećel Serbow dr. Karl Kowalewski nětko w 95. žiwjenskim lěće zemrěł.
Dr. Kowalewski bě spiritus rector a mjeztym tež nestor poćahow Wendlanda ze Serbami. Na moje naprašowanje – tehdy jako referent za serbske naležnosće wokrjesa Wojerecy – z lěta 1991 k móžnosćam, nawjazać styki mjez Wendlandom a Serbami we Łužicy, je wón hnydom pozitiwnje reagował. Zakład za tónle jeho rozsud běchu słowjanske korjenje Wendlanda. Nimo toho je so tež stajnje za to zasadźał, tele słowjanske předstawizny wobydlerjam Wendlanda jako wobohaćenje wuwědomić. Jako tehdyši předsyda Towarstwa k zachowanju kulowcow w Hannoverskim Wendlandźe organizowaše wón z nami kulturnu wuměnu mjez jeho domiznu a Serbami.
