Łazowske spěchowanske towarstwo Dom Zejlerja a Smolerja je zaměr swojeho skutkowanja jasnje definowało: wotkrywać sej serbske stawizny, je přeslědźić a wobchować.
Łaz (AK/SN). Spočatk lěta 2018 je towarstwo podobiznu w Druhej swětowej wójnje wotstronjeneje bisty Handrija Zejlerja leć dało a na Łazowskim Zejlerjowym pomniku postajiło. Čestnaj hosćej běštaj tehdy předsyda Domowina Dawid Statnik a Łazowski wjesnjanosta Thomas Leberecht (CDU). „Dźakowano dokładnym slědźenjam smy zwěsćili, zo njebě Budyski wuhotowar pomnikow Wjacław Mocek, ale kamjenjećesar Curt Tausch z Kinsporka bistu tworił. Tak smy historisku dźěru zapłatali“, wuswětla předsyda towarstwa Reinhardt Schneider. Towarstwo zamó z Anku Konz a Mikom Jägerom z Třoch Žonow a z Andreasom Löpku z Wojerec nowych čłonow nawabić. Wot lěta 1994 spěchowanske towarstwo mjeztym skutkuje a ma dźensa 41 čłonow. Ličba wosta minjene lěta stabilna.