Diskutuja wo modelach zastupnistwa narodnych mjeńšin
Celovec (SN/bn). Towarstwo Mohorjeva/ Hermagoras, kotrehož hłowny nadawk po swójskim podaću je politisce kubłać a rozšěrjeć wědu wo Słowjencach w Korutanskej, wuhotuje w nowembru rjad „Mjeńšiny – Wokno do swěta“.
Lětuše tři zarjadowanja su po krutym systemje natwarjene. Po witanju předsydy towarstwa dr. Karla Hrena předstaja wuzwoleny zastupjer z hodźinskim přednoškom swoju mjeńšinu. W slědowacej moderěrowanej diskusiji rozjimuja wobdźělnicy jednotliwe dypki referata. Zaměr je sej nazhonjenja wuměnjeć, lěpšiny a njelěpšiny rozdźělnych modelow nastupajo organizowanje a financowanje mjeńšin w jednotliwych krajach rozwažować a na tym zakładźe wo móžnym zhromadnym puću rozmyslować.