Statnik: Domowina je Serbski sejm do swojeje dźěławosće zapřijała
Budyšin (SN/at). Z hłownej zhromadźiznu Domowiny a mjezynarodnym folklornym festiwalom Łužica w Chrósćicach, wólbami komunalnych parlamentow a krajneho sejma kaž tež z wotewrjenjom serwisoweho běrowa za serbsku rěč we Wojerecach bě 2019 za Serbow w Sakskej na podawki bohate lěto.
Přikład serwisoweho běrowa je předsydźe Domowiny Dawidej Statnikej wuraz toho, zo kraj kaž tež wokrjesaj Budyšin a Zhorjelc serbske zajimy podpěruja, měnjo to „widźomny wuslědk narodneje politiki Domowiny a serbskeje rady“, kaž wón w rozmołwje z našim wječornikom podšmórny.
