Lipsk (mdź/SN). Pod hesłom „Urbi et Orbi – Eksamen za jen Amen“ je Lipšćanske studentske towarstwo „Sorabija“ sobotu do tamnišeho TV-kluba prosyło. Na jubilejne 40. póstnicy studentow je něhdźe 300 hosći přišło. Wšitcy chcychu wědźeć, što jich lětsa wočakuje.
Na małym jewišću běchu so někotři čłonojo Sorabije ze swojimi instrumentami zesydali a zahudźili někotre štučki, prjedy hač z poprawnym programom započachu. Nawal na program najstaršeho Lipšćanskeho studentskeho towarstwa pak bě tak wulki, zo dyrbjachu zamołwići tróšku časa přeprěčić, a su so tuž hižo raz z někotrymi zynkami wo dobru naladu postarali. Jako bě so rynk čakacych před klubom pomjeńšił a kóždy swoje městno našoł, witachu Sorabičenjo rady jědnatkow. Někotre z nich běchu sej samo serbske hesło wumyslili a rapakow na jewišću serbsce wróćo strowjachu.