Ze zakryćemi chce Domowina skutkowanje swojich gremijow zaso wožiwić
Budyšin (SN/at). Domowinske žiwjenje w tydźenjach koronapandemije dospołnje na internet a widejo wobmjezować, to njeńdźe, kaž bě tele dny z Budyskeho Serbskeho domu słyšeć. Narodna organizacija chce tohodla wotsrjedź meje spytać krok po kroku zetkanja wolenych gremijow w najwušim kruhu a z trěbnym wotstawkom zaso přewjedować.
Jednaćel Domowiny Marko Kowar je minjeny tydźeń připowědźił: „Třěšny zwjazk skaza w regionalnym předewzaću škitne maski, zo by swojich wolenych čestnohamtskich čłonow w ćežkim połoženju podpěrał.“
