Domowina znowazałoženje po Druhej swětowej wójnje wopominała

Chrósćicy (SN/bn). „Jara wutrobnje witam was na wopominanje wozrodźenja Domowiny, zwjazka Łužiskich Serbow, dźensa před 75 lětami tule w Chrósćicach. Je zajimawy připad abo samo wo­sebite znamjo, zo je tale naša zhromadźizna prěnje zjawne zarjadowanje třěšneho zwjazka w dobje koronapandemije a w času wosebitych naprawow, zadźěwać rozpřestrěću koronawirusa. Potajkim pokazujemy ze swojim spominanjom zdobom na aktualne wožiwjenje našich zjawnych aktiwitow.“ Z tutymi słowami je předsyda Domowiny Dawid Statnik swjatočnosć składnostnje 75. róčnicy znowazałoženja třěšneho zwjazka wčera na naměsće před Wjeselic sta­tokom w Chrósćicach zahajił, mjenujo ju­bilej „historiski podawk“. Tuchwilne połoženje Domowiny zjimajo Statnik zwěsći, zo je „naš lud nadewšo mnohostronski, kulturnje wysoce wobdarjeny, towaršnostnje na jednym boku jónkrótnje pisany, na tamnym boku na mjezsobnu pomoc a zhromadnosć wusměrjeny.